སྟོན་པ་གཤེན་རབ་མི་བོའི་རྣམ་ཐར།
༄༅། །སྟོན་པ་གཤེན་རབ་མི་བོ་ཕྱི་ལོའི་སྔོན་གྱི་ལོ་ ༡༦༠༡༧ ཙམ་ལ་བོད་ཡུལ་གངས་རི་ཏེ་སེའི་ཉེ་འགྲམ་དུ་ཡབ་ཞང་ཞུང་གི་རྒྱལ་པོ་རྒྱ་བོན་ཐོད་དཀར་དང་། ཡུམ་བྱམས་མ་རྣམ་སྤྲུལ་ཡུམ་ཆེན་རྒྱལ་བཞེད་མ་གཉིས་ཀྱི་སྲས་སུ་སྐུ་བལྟམས། ཡབ་རྒྱ་བོན་ཐོད་དཀར་གྱིས་མཚན་མཁན་བྲམ་ཟེ་གདན་དྲངས་ནས་བརྟག་པར་གཞན་དང་མི་འདྲ་བ་སྤྲུལ་པའི་སྐུ་རུ་གསུངས་ཏེ།སྟོན་པ་གཤེན་རབ་མི་བོ་ཞེས་མཚན་གསོལ། གཤེན་ནི་རིགས་རུས། རབ་ནི་མཆོག་གམ་མགོན་དུ་གྱུར་པ། མི་བོ་ནི་རླབས་ཆེ་བའི་མི་སྟེ། དམུ་རུས་གཤེན་ལས་འཁྲུངས་པའི་སྟོན་པ་བླ་ན་མེད་པའམ་སངས་རྒྱས་སམ་རླབས་ཆེན་གྱི་མི་སྣ་ལ་གོསྐུ་ན་ཕྲ་དུས་ནས་ཡབ་ཀྱི་རྒྱལ་ས་བཟུང་བས་ཞང་ཞུང་རྒྱལ་པོ་ཞེས་གྲགས། སྔོན་རྒྱལ་ཁབ་བཅུའི་སྲས་མོ་ཁབ་ཏུ་བཞེས་ཚུལ་མཛད་དེ། སྲས་བརྒྱད་དང་། སྲས་མོ་གཉིས་བཅས་རིགས་སྲས་བཅུ་འཁྲུངས། དགུང་ལོ་སོ་གཅིག་བར་ཞང་ཞུང་རྒྱལ་ཁབ་ཆེ་ཆུང་ཐམས་ཅད་(ཕྱིས་རྒྱལ་ཁབ་བཅོ་བརྒྱད་དུ་གྲགས།)དབང་དུ་བསྒྱུར་ཏེ་ལས་རྒྱུ་འབྲས་ཀྱི་བོན་ལ་བརྟེན་ནས་རྒྱལ་སྲིད་བསྐྱངས་པར་མཛད། སྒྲ་ཚད་བཟོ་གསོ་ལ་སོགས་པའི་རིག་པའི་གནས་ལྔ་ཐེག་པ་རིམ་དགུ་བཅས་ཀྱི་སྲོལ་གཏོད་ནས་སངས་རྒྱས་གཡུང་དྲུང་བོན་གྱི་བསྟན་པ་སྤེལ། དགུང་ལོ་སོ་གཅིག་པར་ཉིད་ཀྱི་དབུ་སྐྲ་ཉིད་ཀྱིས་བསིལ་ནས་རབ་ཏུ་བྱུང་ནས་འདུལ་ཁྲིམས་ཀྱི་སྡོམ་པ་བསྲུང་། ལོ་དགུའི་རིང་དཀའ་སྤྱད་གནང་། བོན་སྒོ་བཞི་མཛོད་ལྔ་དང་། ཕྱི་འདུལ་བ་མདོ། ནང་གསང་བ་སྔགས། གསང་བ་རྫོགས་པ་ཆེན་པོའི་བོན་བཅས་ཐར་པ་དོན་དུ་གཉེར་བའི་མཐའ་ཀླས་སྐྱེ་དགུའི་དོན་གསུངས་པར་མཛད་ནས་མཁའ་ཁྱབ་འགྲོ་དྲུག་སེམས་ཅན་ཐམས་ཅད་བདེ་བའི་ལམ་དུ་འདྲེན་པ་མཛད་པའོ།། །།
ཕྱག་ན་རྡོ་རྗེ།
༄༅། །ཕྱག་ན་རྡོ་རྗེ་ནི། པདྨ་དང་ཉི་མའི་གདན་ལ་གཡས་བསྐུམས་གཡོན་བརྐྱང་གི་སྟབས་ཀྱི་བཞེངས་པ། སྐུ་མདོག་སྔོན་པོ་ཞལ་གཅིག་ཕྱག་གཉིས་གཡས་རྡོ་རྗེ་རྩེ་ལྔ་པ་ནམ་མཁའ་ལ་འཕྱར་བ། གཡོན་སྡིགས་མཛུབ་ཐུགས་ཀར་མཛད་པ། དམར་ལ་ཟླུམ་པའི་སྤྱན་གསུམ་དང་ལྡན་ཞིང་། སྐྲ་སེར་གྱེན་དུ་བརྫེས་པ། ཀླུ་ཆེན་པོ་བརྒྱད་དང་རིན་པོ་ཆེས་བརྒྱན་ཅིང་། སྟག་ལྤགས་ཀྱི་ཤམ་ཐབས་ཅན། མི་སྐྱོད་པས་དབུ་བརྒྱན་ཅིང་། ཡེ་ཤེས་ཀྱི་མེ་དཔུང་འབར་བའི་དབུས་ན་བཞུགས་པའོ། ། བྱུང་རིམ་དང་ཕན་ཡོན། ཕྱག་རྡོར་གྱིས་ཛ་ཝ་རི་བ་ལ་བརྒྱུད་དེ་བོད་དུ་དར། ཁྱད་པར་ལྷོོ་བྲག་གྲུབ་ཆེན་ལས་རྗེ་བླ་མས་གསན་ཏེ་ཐུགས་ཀྱི་ལྷར་མཛད་པ་ནས་དབེན་ས་སྙན་བརྒྱུད་དུ་བྱུང་པ་ཡིན། ཉེ་བརྒྱུད་ས་སྐྱ་པ་ནས་ཕེབས་སོ། གདོན་བགེགས་ཀྱི་རིགས་མ་ལུས་པ་འཇོམས་པ་དང་། མཆོག་དང་ཐུན་མོང་གིས་དངོས་གྲུབ་སྩོལ་བའི་ལྷག་པའི་ལྷ་མཆོག་ཏུ་གྱུར་བ་ཞིག་ཡིན་ནོ། བཏུས་པའི་ཁུངས། ༡༽པཎ་ཆེན་བློ་བཟང་དཔལ་ལྡན་བསྟན་པའི་ཉི་མ། ཡི་དམ་རྒྱ་མཚོའི་སྒྲུབ་ཐབས་རིན་ཆེན་འབྱུང་གནས་ཀྱི་ལྷན་ཐབས་རིན་འབྱུང་དོན་གསལ་ལས་གླེགས་བམ་གཉིས་པ། ཤོག་གྲངས་ ༥༠༥ ནས ༥༡༠ བར་གསལ། ཕྱི་ལོ་ ༢༠༡༩ ཀྲུང་གོའི་བོད་རིག་པ་དཔེ་སྐྲུན་ཁང་།
བདེ་མཆོག་ལཱུ་ཨི་པ།
༄༅།། དཔལ་འཁོར་ལོ་བདེ་མཆོག་ལཱུ་ཨི་པ་ནི། སྐུ་མདོག་མཐིང་ག་ཞལ་བཞི་ཕྱག་བཅུ་གཉིས། རྩ་ཞལ་ནག་པོ། གཡོན་ཞལ་ལྗང་ཁུ། རྒྱབ་ཞལ་དམར་པོ། གཡས་ཞལ་སེར་པོ། ཞལ་རེ་རེ་ལ་སྤྱན་གསུམ་གསུམ་དང་ལྡན་པ། ཕྱག་བཅུ་གཉིས་ཀྱི་དང་པོ་གཉིས་རྡོ་རྗེ་དང་དྲིལ་བུ་འཛིན་པས་ཡུམ་ཕག་མོ་དམར་པོ་གྲི་ཐོད་འཛིན་པ་ལ་འཁྱུད་པ། དེའི་འོག་མ་གཉིས་ཀྱིས་གླང་ལྤགས་སྡིགས་འཛུབ་དང་བཅས་པའི་ཕྱག་གིས་བརྒྱངས་ཏེ་འཛིན་པ། ཕྱག་གཡས་ལྷག་མ་བཞི་ན་ཌ་མ་རུ་དང་། དགྲ་སྟ། གྲི་གུག མདུང་རྩེ་གསུམ། ཕྱག་གཡོན་ལྷག་མ་བཞི་ན་ཁ་ཊྭཱཾ་ག་དང་། ཐོད་པ། ཞགས་པ། ཚངས་པའི་མགོ་རྣམས་འཛིན་པ། སྣ་ཚོགས་རྡོ་རྗེས་མཚན་པའི་རལ་པའི་ཐོར་ཅོག་ཅན། དབུ་རེ་རེ་ལ་རྡོ་རྗེ་ནག་པོའི་ཕྲེང་བ་སྟོད་སྨད་དུ་གནས་པ་གཉིས་ལས་བརྒྱུས་པའི་ཐོད་པ་སྐམ་པོ་ལྔས་བརྒྱན་ཅིང་། དབུའི་གཡོན་དུ་ཅུང་ཟད་ཡོ་བའི་ཟླ་བ་ཕྱེད་པ་འཆིང་བ་ཞལ་རྣམ་པར་འགྱུ་བ། མཆེ་བ་བཞི་གཙིགས་པ་གར་དགུའི་ཉམས་དང་ལྡན་པ། མགོ་བོ་རློན་པ་ལྔ་བརྒྱའི་དོ་ཤལ་དང་སྟག་གི་པགས་པའི་ཤམ་ཐབས་ཅན། རུས་པའི་རྒྱན་དྲུག་གིས་བརྒྱན་པ། འཇིགས་བྱེད་སྔོན་པོ་དང་དུས་མཚན་མ་དམར་མོའི་གདན་ལ་གཡས་བརྐྱངས་ཀྱིས་བཞུགས་པ། འཁོར་མཁའ་འགྲོ་མ་བཞི་དང་། ཐུགས་ཀྱི་འཁོར་ལོའི་རྩིབས་བརྒྱད་ལ་དཔའ་བོ་བརྒྱད་དང་དཔའ་མོ་བརྒྱད། སྒོ་བཞི་དང་མཚམས་བཞི་ལ་མཁའ་འགྲོ་མ་བརྒྱད་བཞུགས་པའོ།། །།
གུ་རུ་རིན་པོ་ཆེ།
གུ་རུ་རིན་པོ་ཆེ་ནི། རྒྱ་གར་འཕགས་པའི་ཡུལ་གྱི་ཨོ་རྒྱན་གྱི་ཡུལ་དུ་རྒྱལ་པོའི་སྲས་སུ་འཁྲུངས། མཚན་ལྟས་མཁན་གྱིས་སྲས་འདིའི་རྒྱལ་སྲིད་མི་བཟུང་ཞིང་གསང་སྔགས་ཀྱི་རྣལ་འབྱོར་པ་ཆེན་པོ་ཞིག་འོང་པར་ལུང་བསྟན། སྐུ་ན་ཆུང་དུས་རིག་གནས་ཆེ་ཆུང་དང་བརྟག་པ་བརྒྱད་ལ་སོགས་པ་གང་ལ་ཡང་དཀའ་ཚེགས་མི་དགོས་པར་མཁྱེན། གསང་སྔགས་ཀྱི་སློབ་དཔོན་མང་པོ་བསྟེན་ཏེ་སྒོམ་སྒྲུབ་ཡུན་རིང་མཛད་ནས་གྲུབ་པ་ཐོབ་པའི་རྟགས་མཚན་མང་པོ་ཐོན་ཏེ་དགེ་འདུན་གྱི་སྡེ་དང་བཅས་པ་སྐྱེད་ཚལ་ཞིག་ཏུ་བཞུགས་པའི་ཚེ་རྒྱལ་བློན་བར་དཀྲུགས་ཤིང་བྱས་ནས་རྒྱལ་པོས་དམག་བཏང་སྟེ་གནས་དབྱུང་དང་སློབ་དཔོན་བཟུང་ནས་མཚོན་ཆ་བསྣུན་པ་དང་། མེར་བསྲེགས་པ་སོགས་བྱས་ཀྱང་རྫུ་འཕྲུལ་བསྟན་ནས་ཅི་ཡང་མ་གནོད། དེ་ནས་བཟུང་བྲག་ཕུག་དང་དུར་ཁྲོད་སོགས་སུ་བཞུགས་ནས་ལྷ་འདྲེ་གདུག་ཅན་ཐམས་ཅད་དབང་དུ་བསྒྱུར། གྲུབ་པ་ཐོབ་པའི་སློབ་དཔོན་བརྒྱད་ལས་མཆོག་དང་ཐུན་མོང་གི་དངོས་གྲུབ་བརྒྱད་ཐོབ་སྟེ་རྒྱ་གར་ཡུལ་དབུས་མ་གྷ་དྷ་དང་། བྱང་ཤར། ལྷོ་ཕྱོགས་བལ་ཡུལ་དང་བཅས་སུ་ཕེབས་ཏེ་མུ་སྟེགས་པ་མང་པོ་ལ་རྩོད་པ་དང་ལྷ་འདྲེ་མང་པོ་བཏུལ་ཏེ་དམ་ལ་བཏགས། དུས་རབས་བདུན་པའི་ནང་བོད་རྒྱལ་ཁྲི་སྲོང་ལྡེ་བཙན་གྱིས་བོད་དུ་གདན་དྲངས་པར་བྱོན་ནས་བོད་ཀྱི་བསྟན་མ་བཅུ་གཉིས་དང་ཡར་ལྷ་ཤམ་པོ་སོགས་ལྷ་འདྲེ་མང་པོ་དམ་ལ་བཏགས་ཏེ་ནང་པའི་བསྟན་པ་སྐྱོང་བའི་སྲུང་མར་བསྐོས། རྒྱལ་བློན་བཙུན་མོ། བོད་འབངས་སྐྱེ་བོ་ཡོངས་ཀྱིས་ཕོ་བྲང་བྲག་དམར་དུ་གདན་དྲངས། བསྙེན་བཀུར་ཕུན་སུམ་ཚོགས་པ་ཞུས། རྗེས་སུ་བསམ་ཡས་གཙུག་ལག་ཁང་བཞེངས་པའི་ས་འདུལ་དང་རྨང་བཏང། ལེགས་པར་གྲུབ་པར་མཁན་སློབ་གཉིས་ཀྱིས་རབ་གནས་མཛད་ཅིང་ངོ་མཚར་ཅན་གྱི་ལྟས་མང་པོ་བྱུང་། སློབ་དཔོན་གྱིས་རྫུ་འཕྲུལ་ལ་བརྟེན་ནས་ཆུ་མེད་སར་ཆུང་དང་ངམ་ཤོད་ཀྱི་བྱེ་ཐང་དང་གྲམ་ཐང་རྣམས་ནགས་ཚལ་དང་སྤང་ཐང་དུ་བསྒྱུར། ལྷ་སྲས་མུ་ཁྲི་བཙན་པོ་དམག་དཔོན་དུ་བསྐོས་ནས་བྷ་ཏ་ཧོར་གྱི་སྒོམ་གྲྭ་བཅོམ་ནས་དེར་ཡོད་པའི་ནོར་རྫས་རིན་ཐང་ཆེ་བ་རྣམས་བོད་དུ་དྲངས་པས། ནོར་བདག་རྒྱལ་པོ་པེ་ཧར་ཡང་ཀ་ཅའི་རྗེས་སུ་འབྲངས་ནས་བོད་དུ་འོངས་པ་དེ་ལ་བསམ་ཡས་གཙུག་ལག་ཁང་གི་སྲུང་མར་བསྐོས། རྒྱལ་པོ་དང་བཙུན་མོ། སད་མི་མི་བདུན་སོགས་ལ་གསང་སྔགས་ཀྱི་དབང་བསྐུར་གནང་བས་རྗེ་འབངས་ཉེར་ལྔ་ཞེས་བོད་ཀྱི་གྲུབ་ཐོབ་ཉི་ཤུ་རྩ་ལྔ་ཐོག་མར་བྱུང་། སློབ་དཔོན་ཆེན་པོ་འདི་བོད་དུ་ལོ་ལྔ་བཅུ་ཙམ་བཞུགས་ནས་རྗེས་སུ་བློན་པོ་ཆོས་ལ་མི་དགའ་བ་རྣམས་ཀྱིས་རྒྱལ་པོ་ལ། སློབ་དཔོན་འདི་མཐུ་དང་ནུས་པ་ཆེ་བས་རྒྱལ་སྲིད་ལ་ཉེན་ཁ་ཆེ་བས་ཁོང་རང་གི་ཡུལ་དུ་བསྐྱལ་ན་ལེགས་ཚུལ་ནན་ཞུས་བྱས་པས་སློབ་དཔོན་ཕྱིར་རྒྱལ་གར་དུ་ཕེབས་སྐྱེལ་ཞུ་དགོས་བྱུང་སྟེ་ལམ་བར་ནས་ལྐོག་གསོད་བྱེད་ཐབས་བྱས་ཀྱང་རྫུ་འཕྲུལ་བསྟན་ནས་གསོད་མ་ཐུབ་པར་སློབ་དཔོན་མཁའ་ལ་འཕུར་ཏེ་སྲིན་ཡུལ་དུ་ཕེབས་སོ། །
གནས་ཆུང་རྒྱལ་པོ་སྐུ་ལྔ།
༄༅། །དབུས་ཕྱོགས་ཐུགས་ཀྱི་རྒྱལ་པོའི་སྤྲུལ་པ་གནས་ཆུས་རྒྱལ་པོ་སྐུ་ལྔ་ནི། སྐུ་མདོག་དམར་པོ་ཞལ་གཅིགཕྱག་གཉིས། དར་གྱི་བེར་དང་དོམ་གྱི་སློག་པ་གོས་སུ་གྱོན་པ། དབུ་ལ་དར་ནག་གི་ཐེབས་ཞུ་གསོལ་བ། ཕྱག་གཡས་བདུད་ཞགས་དང་གཡོན་སྤུ་གྲི་ཐོགས་པ། གླང་ཆེན་སྣ་རིང་ལ་ཆིབས་ནས་རོལ་ཏུ་གློག་དམར་ཁྲིད་པ། ཤར་དུ་སྐུའི་རྒྱལ་པོ་མོན་བུ་པུ་ཏྲ་སྐུ་མདོག་མཐིང་ནག་བདེན་ཏྲི་ནག་པོའི་གོས་དང་དར་ནག་གི་ཐེབས་ཞུ་གསོལ་བ། ཕྱག་གཡས་ན་རྡོ་རྗེ་དང་ཤེར་གཤང་གི་གསེག་ཤིང་ཐོགས་པ་སེངྒེ་ལ་བཅིབས་ནས་རོལ་ཏུ་དོམ་ནག་ཁྲིད་པ། ལྷོར་ཡོན་ཏན་གྱི་རྒྱལ་པོ་ཤིང་བྱ་ཅན་སྐུ་མདོག་མཐིང་ནག་སྦྲུལ་དང་སྟག་གི་གོས་ཅན་དབུ་ལ་ཐང་ཐེབ་ཁྱུང་མགོ་ཅན་གསོལ་བ། ཕྱག་གཡས་དགྲ་སྟ་དང་གཡོན་བདུད་ཞགས་ཐོགས་པ་བདུད་རྟ་རྟིང་དཀར་ལ་བཅིབས་ནས་རོལ་ཏུ་གཡུ་འབྲུག་ཁྲིད་པ། ནུབ་ཏུ་གསུང་གི་རྒྱལ་པོ་དགྲ་ལྷ་སྐྱེས་གཅིག་དམར་པོ། དར་ནག་གི་བེར་ཅན་དབུ་ལ་སྨྱུག་ཞུ་གསོལ་བ། ཕྱག་གཡས་སྦའི་འགྱིང་འཁར་དང་གཡོན་བ་དན་གྱི་བེང་ཆེན་ཐོགས་པ་དྲེལ་ནག་རྐང་དཀར་ལ་བཅིབས་ནས་རོལ་ཏུ་སྤྱང་མོ་ཁྲིད་པ། བྱང་དུ་འཕྲིན་ལས་ཀྱི་རྒྱལ་པོ་བེ་ཧར་སྐུ་མདོག་དཀར་ནག་དམར་བའི་ཞལ་གསུམ་ཕྱག་དྲུག་པ་དར་དཀར་གྱི་རལ་ག་དང་སྟག་ལྤགས་ཀྱི་ཤམ་ཐབས་ཅན་དབུ་ལ་ཚགས་ཞུ་གསོལ་བ། ཕྱག་གཡས་པ་གསུམ་ན་ལྕགས་ཀྱུ་མདའ་དང་རལ་གྲི། གཡོན་པ་གསུམ་ན་སྤུ་གྲི་གཞུ་དང་བེར་ཀ་ཐོགས་པ། སེངྒེ་དཀར་མོ་ལ་བཅིབས་ནས་རོལ་ཏུ་འཚུབ་མ་ཁྲིད་པ། བཞི་གའི་འཁོར་དུ་ཡུམ་བློན་ཕོ་ཉ་རུ་འདྲེན་གར་མཁན་སྐྱོ་སངས་འབག་ལ་སོགས་པའི་འཁོར་གྱིས་བསྐོར་བ། ཆོས་སྲུང་འདི་རྒྱལ་པོ་ཁྲི་སྲོང་ལྡེའུ་བཙན་གྱི་དུས་རྒྱ་གར་བེ་ཧར་ནས་ཅ་ལག་ཅིག་ཁུར་ཡོང་བ་དེའི་རྗེས་སུ་འབྲང་བའི་ཚུལ་གྱིས་བོད་ཁམས་སུ་བྱོན་པར་སློབ་དཔོན་པདྨ་འབྱུང་གནས་ཀྱིས་བཀའ་བསྒོས་དམ་བཏགས་གཉེར་གཏད་ཀྱིས་བོད་ཀྱི་སྲུང་མར་བསྐོས་པ་ནས། བོད་རྒྱལ་ཁབ་ཆེན་པོའི་བསྟེན་གསོལ་བྱེད་པའི་སྲུང་མར་གཙོ་བོར་གྱུར་ཅིང་སྐུ་ཁོག་ཞུགས་པ་རྣམས་ནས་ད་བར་བསླུ་བར་མ་བྱུང་ཞེས་སྐྱེས་ཆེན་དམ་པ་མང་པོས་གསུངས། བསྐང་གསོལ་དང་འཕྲིན་བཅོལ་སོགས་ལ་སོགས་གསོལ་བསྟོད་བྱས་ན་འཕྲལ་གྱི་འདོད་དོན་དང་བར་ཆད་མཐའ་དག་སེལ་བ་སོགས་ཀྱི་ཕན་ཡོན་ལྡན་ཞིང་། ངེས་པ་དོན་ལ་རྒྱལ་བ་རིགས་ལྔའི་འཕྲིན་ལས་ཀྱི་སྤྲུལ་པ་དང་། ཐབས་དང་ཤེས་རབ་བཞིན་ལག་འཇིག་རྟེན་དྲེགས་པའི་རོལ་པར་ཤར་བ་ཡིན་ཚུལ་སོགས་ཀྱི་བྱུང་བ་མང་དུ་ཡོད། བོད་ཀྱི་ལོ་གསར་པའི་ཚེས་གསུམ་ལ་བསྟན་སྲུང་ལོ་སར་དུ་གཏན་ཁེལ་གྱིས་ཆོས་སྐྱོང་ཁོག་ཞུགས་ཀྱིས་རྒྱལ་བ་ཡབ་སྲས་གཉིས་ཀྱི་སྐུ་ཚེ་ལ་བར་ཆད་ཡོད་མེད་དང་བོད་བསྟན་སྲེིད་ཆེད་ལུང་བསྟན་ཞུ་ཞིང་བསྐང་གསོལ་ཟབ་རྒྱས་འཚོགས་སྲོལ་ཡོད་པའོ།། །། བཏུས་པའི་ཁུངས། ༡༽ རྩོམ་སྒྲིག་པ་འགྱུར་མེད་ཆོས་ཀྱི་རྡོ་རྗེ། བོད་བརྒྱུད་ནང་བསྟན་ལྷ་ཚོགས་ཆེན་མོ། ཤོག་གྲངས་ ༡༠༨༥ ནས་ ༡༠༨༧ བར་གསལ། ཕྱི་ལོ་ ༢༠༠༡ མཚོ་སྔོན་མི་རིགས་དཔེ་སྐྲུན་ཁང་ནས་པར་འགྲེམས་བྱས། ༢༽ དུང་དཀར་བློ་བཟང་འཕྲིན་ལས། བོད་རིག་པའི་ཚིག་མཛོད་ཆེན་མོ་ཤེས་བྱ་རབ་གསལ། ཤོག་གྲངས་ ༡༤༨ ནས་ ༡༤༩ བར་གསལ། ཕྱི་ལོ་ ༢༠༠༢ ཀྲུང་གོའི་བོད་རིག་པ་དཔེ་སྐྲུན་ཁང་ནས་པར་འགྲེམས་བྱས།
མགོན་པོ་ཕྱག་དྲུག་པ།
༄༅། །མགོན་པོ་ཕྱག་དྲུག་པ་ནི། ཞལ་གཅིག་སྤྱན་གསུམ། ཕྱག་དྲུགཕྱག་གཡས་པའི་དང་པོ་ན་གྲི་གུག བར་པ་ན་མི་མགོའི་འཕྲེང་བ། ཐ་མ་ན་ཌ་མ་རུ། ཕྱག་གཡོན་པ་དང་པོ་ན་ཐོད་པ། བར་པ་ན་མདུང་རྩེ་གསུམ། ཐ་མར་ཞགས་པ་བསྣམས་པ། སྐུ་ལ་གླང་ཆེན་དཀར་པོའི་གོ་བ་བཀླུབས་ཤིང་། སྐུ་སྨད་ལ་སྟག་གི་པགས་པའི་ཤམ་ཐབས་གསོལ་བ། དབུ་ལ་ཐོད་སྐམ་ལྔས་བརྒྱན་ཞིང་ཐོད་རློན་ལྔ་བཅུ་རྩ་གཅིག་གིས་དོ་ཤལ་བྱས་པ། ཞབས་འོག་ཏུ་ཚོགས་བདག་མནན་པ། ཤིང་ཙན་དན་རྐང་གཅིག་གི་དྲུང་ན་མེ་དཔུང་རབ་ཏུ་འབར་བའི་དབུས་སུ་དྲག་པོའི་ཚུལ་དུ་བཞུགས་པ་ཞིག་ཡིན། འཕགས་པ་སྤྱན་རས་གཟིགས་ཆོས་སྐྱོང་གི་རྣམ་རོལ་དང་དེའི་འཁོར་དུ་བཞུགས། སྐྱེས་བུ་ཆེན་པོའི་བྱང་ཆུབ་ཀྱི་སེམས་རིན་པོ་ཆེའི་སྲུང་མ་ཡིན། ལྷ་འདི་ཡེ་ཤེས་པ་ཆོས་སྐྱོང་བའི་སྲུང་མ་ཡིན་པས་ཚེ་འདི་ཕྱིའི་བར་ཆད་དང་འཇིགས་ཉེན་ནས་སྐྱོབ་ཅིང་བདེ་ལེགས་ཐམས་ཅད་ལྷུན་གྱིས་འགྲུབ་འོང་བ་སོགས་འཕྲིན་ལས་ཤིན་ཏུ་མྱུར་བར་གསུངས་སོ། ། བཏུས་པའི་ཁུངས། ༡༽ ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་གི་རྩིམ་སྒྲིག་པ་རྣམས། གངས་ཅན་ཤེས་རིག་བང་མཛོད། ཆོས་ཀྱི་སྒེའུ་ཁུང་གླེགས་བམ་དང་པོ། ཤོག་གྲངས་ ༧༡ ན་གསལ། ཕྱི་ལོ་ ༢༠༡༦ ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་ནས་པར་འགྲེམས་བྱས།
སློབ་དཔོན་ཤཱཀྱ་འོད།
༄༅། །སློབ་དཔོན་ཤཱཀྱ་འོད་ནི། ཕྱི་ལོའི་དུས་རབས་བདུན་པ་དང་བརྒྱད་པའི་ནང་རྒྱ་གར་ནུབ་ཕྱོགས་སུ་རྒྱལ་རིགས་སུ་འཁྲུངས། ནཱ་ལནྡཱར་མཁན་པོ་བསོད་ནམས་གྲགས་པ་ལས་རབ་ཏུ་བྱུང་ཞིང་བསྙེན་པར་རྫོགས། མ་གྷ་དྷའི་མཁན་པོ་བསོད་ནམས་གྲགས་པ་དང་སློབ་དཔོན་ཞི་བ་འོད་གཉིས་བསྟེན་ནས་སྡེ་སྣོད་གསུམ་སྦྱངས་པས་འདུལ་བའི་གཞུང་ལུགས་སྨྲ་བའི་ཁྱུ་མཆོག་ཏུ་གྱུར། སློབ་དཔོན་རྡོ་རྗེ་བཞད་པ་ལས་གསང་སྔགས་ཀྱི་གཞུང་རྣམས་གསན་པས་ཤིན་ཏུ་མཁས་པར་གྱུར་ཏེ་པྲ་བྷ་ཧ་ཏི་ཞེས་གྲགས་ཤིང་མཆོག་གི་དངོས་གྲུབ་བརྙེས། ནཱ་ལནྡཱའི་གཙུག་ལག་ཁང་དུ་འདུལ་བའི་བསྟན་བཅོས་སུམ་བརྒྱ་པ་དང་དེའི་རང་འགྲེལ་འོད་ལྡན། དགེ་ཚུལ་ཀ་རི་ཀ་སོགས་ཆོས་ཚན་ལྔ་ལྷག་མཛད་པ་རྣམས་བོད་སྐད་དུའང་བསྒྱུར་ཡོད། ཁ་ཆེའི་ཡུལ་དུ་ཕེབས་ནས་འགྲོ་དོན་རྒྱ་ཆེར་བསྐྱངས། འདུལ་བ་ཤིན་ཏུ་མཁས་པས་དགེ་འདུན་གྱི་སྡེ་སྤེལ་བ་དང་ཚུལ་ཁྲིམས་ཀྱི་བསླབ་པ་ལ་གནས་པའི་སློབ་མ་ཤཱཀྱ་བཤེས་གཉེན་དང་། སློབ་དཔོན་པདྨ་འབྱུང་གནས། ཛི་ན་མི་ཏྲ་སོགས་བསྟན་འགྲོར་མཛད་རྗེས་ཆེ་བའི་སྐྱེས་ཆེན་མང་དུ་འཕེལ། རྗེ་བཙུན་འཇམ་པའི་དབྱངས་ཀྱིས་ཞལ་གཟིགས། འཛམ་གླིང་མཛེས་པར་བྱེད་པའི་རྒྱན་དྲུག་དང་མཆོག་གཉིས་ཞེས་བསྔགས་པ་ལས་སློབ་དཔོན་འདི་ཡིས་སངས་རྒྱས་པའི་བསྟན་པའི་ནང་མཛོད་དམ་ཆོས་འདུལ་བའི་གཞུང་ལ་ཐོས་བསམ་སློབ་གཉེར་མཐར་ཕྱིན་གནང་བས་སངས་རྒྱས་བཅོམ་ལྡན་འདས་ཀྱི་སྐུའི་གཡོན་དུ་བཞུགས་པར་འོས་པས་མཆོག་ཅེས་གྲགས། སངས་རྒྱས་ཀྱི་བསྟན་པའི་གཞི་མ་ཚུལ་ཁྲིམས་ལ་བརྩོན་པར་མཛད་བཞིན་དུ་སྐུ་མྱ་ངན་ལས་འདས་པའོ།། །།
གནས་བརྟན་ཀླུའི་སྡེ།
༄༅། །འཕགས་པ་གནས་བརྟན་ཀླུའི་སྡེ་ནི། ཕྱག་གཡས་མཁར་གསིལ། ཕྱག་གཡོན་བུམ་པ་བསྣམས་པ། འཁོར་དགྲ་བཅོམ་པ་སྟོང་དང་ཉིས་བརྒྱ་དང་ལྷན་རྒྱལ་པོའི་ཁབ་ཀྱི་རི་ཆེན་པོ་ཞིག་ལ་བཞུགས། གནས་བརྟན་འདི་རྒྱ་གར་བྱང་ཕྱོགས་སྲེག་མའི་གྲོང་ཁྱེར་ཞེས་བྱ་བའི་རྒྱལ་རིགས་སུ་སྐུ་འཁྲུངས། རྒྱལ་པོའི་བྱ་བ་ལ་ཞུགས་ན་སྡིག་པའི་ལས་མང་པོ་ལ་འཇུག་དགོས་པར་གཟིགས་ཏེ། སངས་རྒྱས་བཅོམ་ལྡན་འདས་དགུང་ལོ་ང་ལྔ་བཞེས་པའི་དུས་སྐུ་མདུན་ནས་བསྙེན་པར་རྫོགས་ཤིང་དགྲ་བཅོམ་ཐོབ། རྒྱལ་ཆེན་བཞིའི་ལྷ་རྣམས་ཀྱིས་རིན་པོ་ཆེའི་གཏེར་གྱི་བུམ་པ་ཕུལ་བ་གདུལ་བྱའི་དོན་དུ་ཕྱག་ཏུ་བསྣམས་པར་གྲགས། གནས་བརྟན་འདི་ལ་གསོལ་བ་བཏབ་ན་སྡིག་པ་སྟོབས་ཆེན་འདག་པ་དང་གདུལ་བྱ་ཆེ་བ་དག་ལ་ཕན་ཡོན་ནམ་བྱིན་རླབས་འབྱུང་།། །།
དཔལ་ལྡན་ཟླ་བ་གྲགས་པ།
༄༅། །དཔལ་ལྡན་ཟླ་བ་གྲགས་པ་ནི། ཕྱི་ལོའི་དུས་རབས་དྲུག་པའི་འགོར་རྒྱ་གར་ལྷོ་ཕྱོགས་ས་མན་ངྷར་(Kerala)ཞེས་པར་ཡབ་བྲམ་ཟེའི་རིགས་སུ་འཁྲུངས། མཚན་མཁན་གྱིས་སངས་རྒྱས་པའི་བསྟན་པ་ལ་ཞུགས་ན་སྐྱེས་བུ་ཆེན་པོར་འགྱུར་ཞེས་ལུང་བསྟན་པ་བཞིན་ཡབ་ཡུམ་གཉིས་ཀྱིས་ནཱ་ལནྡཱར་བཏང་། དེའི་མཁན་པོ་ཟླ་བ་མགོན་པོ་ལས་རབ་ཏུ་བྱུང་བས་ཟླ་བ་གྲགས་པ་ཞེས་གསོལ། རིམ་གྱིས་བསྙེན་པར་རྫོགས། སློབ་དཔོན་ཆོས་སྐྱོང་དང་སློབ་དཔོན་ཟླ་བ་མགོན་པོ་ལས་བཀའ་སྡེ་སྣོད་གསུམ་དང་གསང་སྔགས་རྒྱུད་སྡེ་བཞི་ལ་སྦྱངས་པ་མཐར་སོན་གནང་། སློབ་དཔོན་སངས་རྒྱས་བསྐྱངས་ཀྱི་དངོས་སློབ་ཀ་མ་ལ་བུད་དྷི་ལས་འཕགས་པ་ཀླུ་སྒྲུབ་ཀྱི་དབུ་མའི་གཞུང་ལུགས་མན་ངག་དང་བཅས་པར་སྦྱངས་པ་མཐར་ཕྱིན་པར་མཛད། ཉིན་མཚན་མེད་པར་ཏིང་ངེ་འཛིན་ལ་མཐའ་གཅིག་ཏུ་གཞོལ་བས་རིང་པོར་མ་ཐོགས་པར་རྗེ་བཙུན་འཇམ་དཔལ་དབྱངས་དང་འཕགས་པ་ཀླུ་སྒྲུབ་ཀྱི་ཞལ་ཡང་གཟིགས་ཤིང་གདམས་པ་མང་དུ་གསུངས། དགེ་འདུན་པའི་ཞལ་ཏ་པ་མཛད་སྐབས་རྩིག་པར་བ་མོ་ཞིག་བྲིས་པ་དེ་ཉིད་ལས་འོ་མ་བཞོས་ཏེ་དགེ་འདུན་ལ་བསྙེན་བཀུར་ཞུས། ནཱ་ལནྡཱའི་མཁན་པོ་མཛད་ཅིང་འཕགས་པ་སྤྱན་རས་ཀྱིས་ཞལ་གཟིགས། ཙནྡྲ་གོ་མི་དང་ལོ་བདུན་རིང་རྩོད་པ་གནང་། རྗེ་བཙུན་འཇམ་དཔལ་དབྱངས་དང་སངས་རྒྱས་བསྐྱངས་ཀྱི་སྐུ་སྐྱེར་གྲགས། འཕགས་པ་ཀླུ་སྒྲུབ་ཀྱི་དགོངས་པ་བཞིན་དབུ་མ་འཇུག་པ་རང་འགྲེལ་དང་། དབུ་མ་རྩ་ཤེ་འགྲེལ་པ་ཚིག་གསལ་སོགས་མཛད་ནས་དབུ་མ་ཐལ་འགྱུར་བའི་ཤིང་རྟའི་སྲོལ་ཕྱེ། གཞན་ཡང་གསང་འདུས་རྩ་རྒྱུད་ཀྱི་འགྲེལ་པ་སྒྲོན་གསལ་དང་དབུ་མ་ཚིག་གསལ་གཉིས་ལ་བོད་ཀྱི་མཁས་པས། གནམ་ལ་ཉི་ཟླ་གཉིས། ས་ལ་གསལ་བ་རྣམ་གཉིས་གྲགས་པ་སོགས་ལེགས་བཤད་ཀྱི་བསྟན་བཅོས་ཉི་ཤུ་ལོངས་ཙམ་བརྩམས་པ་རྣམས་བོད་སྐད་དུ་བསྒྱུར་ནས་བོད་ཀྱི་མཁས་པའི་སློབ་གཉེར་གྱི་གཞུང་ཤིག་ཏུ་གྱུར། མཆོག་གི་དངོས་གྲུབ་བརྙེས་ཤིང་དགུང་ལོ་མཐོ་ཙམ་བཞུགས་པའོ།། །།