༄༅། །བན་ཆེན་ཕུན་ཚོགས་དར་རྒྱས་གླིང་དགོན་ནི། དུས་རབས་བཅུ་བདུན་པར་སངས་རྒྱས་མཉན་སྤྲུལ་བཞི་པ་དགེ་ལེགས་རྒྱ་མཚོས་མདོ་ཁམས་སྒ་སྟོད་དུ་ཕྱག་བཏབ་ཅིང་།བྱེས་སུ་ཕྱི་ལོ་༡༩༨༦ལོར་གྲུབ་དབང་སངས་རྒྱས་མཉན་པ་རིན་པོ་ཆེ་མཆོག་གིས་བལ་ཡུལ་འཕགས་པ་ཤིང་ཀུན་གྱི་ཉེ་འདབས་སུ་གཙུག་ལག་ཁང་གི་རྟེན་དང་བརྟེན་པ་བཅས་གསར་བཞེངས་གནང་།དེ་ཡ་གྱལ་བལ་ཡུལ་ཡང་ལེ་ཤོད་ཀྱི་སྒྲུབ་སྡེ་འོད་གསལ་གླིང་དང་།བཙུན་མའི་སྒྲུབ་སྡེ་ཨཱརྱ་ཏཱ་ར་གླིང་། གཞི་རིམ་སློབ་གྲྭ་མཁྱེན་རབ་པད་ཚལ་གླིང་བཅས་གསར་བཞེངས་གནང་། ཕྱི་ལོ་༢༠༠༤ལོར་ཡང་ལེ་ཤོད་ཨ་སུ་རའི་སྒྲུབ་ཕུག་གི་ཉེ་འདབས་སུ་བཤད་གྲྭ་ནང་བསྟན་ཐོས་བསམ་གླིང་གི་རྟེན་དང་བརྟེན་པ་བཅས་གསར་བཞེངས་གནང་། སློབ་གཉེར་གནང་ཕྱོགས་ནི།གྲྭ་ཚང་དུ་བཀའ་གཏེར་གསར་རྙིང་གི་རྒྱུད་སྡེ་རྣམས་འདོན་སྒྲིག་དང་། གར་ཐིག་དབྱངས་གསུམ། གཏོར་བཟོ་བཤམས་བཀོད། བསྐྱེད་རྫོགས་ཀྱི་ཉམས་ལེན་ཐོག་བརྡ་དག་སྙན་གསུམ་དང་། གཞུང་ཆེན་ཁག་ལ་རང་རང་སོ་སོའི་རྒྱུད་ཚོད་དང་བསྟུན་ཏེ་ཐོས་བསམ་སློབ་གཉེར་གནང་བཞིན་ཡོད་པ་མ་ཟད། ལོ་ལྟར་བོད་ཟླ་དང་པོའི་སྨོན་ལམ་ནས་བཟུང་རྒྱུད་སྡེ་རྣམས་ཀྱི་རས་བྲིས་དང་རྡུལ་ཚོན་གང་རུང་ལ་བརྟེན་པའི་སྒྲུབ་མཆོད་ཁག་སྨིན་སྒྲུབ་གནང་བཞིན་ཡོད། སྒྲུབ་གྲྭ་རུ་ཕྱག་ཆེན་སྔོན་འགྲོ་ནས་བཟུང་ལོ་གསུམ་ཕྱོགས་གསུམ་གྱི་རིང་ཐབས་ལམ་ནཱ་རོ་ཆོས་དྲུག་དང་། གྲོལ་ལམ་ཕྱག་རྒྱ་ཆེན་པོ། རྩ་གསུམ་ལྷ་ཚོགས་རྣམས་ཀྱི་བསྐྱེད་རྫོགས་བསྙེན་སྒྲུབ་བཅས་ཉམས་སུ་བཞེས་བཞིན་ཡོད། བཤད་གྲྭ་རུ་གཙོ་བོ་རང་ལུགས་མདོ་སྔགས་གཞུང་ཆེན་བརྒྱད་དང་། དེ་བཞིན་བརྡ་དག་སྙན་གསུམ་དང་རྒྱལ་རབས་ཆོས་འབྱུང་སོགས་ལ་སློབ་གཉེར་གནང་གི་ཡོད། དེ་བཞིན་དགེ་འདུན་པ་ཐུན་མོང་ནས་དམ་ཆོས་འདུལ་བའི་གཞི་གསུམ་གྱི་ཕྱག་ལེན་ཉམས་བཞེས་ཐོག གུ་རུ་ཆོས་དབང་གི་བླ་མ་གསང་འདུས་ཀྱི་སྒོ་ནས་ཚེས་བཅུ་ཆེན་མོའི་གར་འཆམ་དང་། མཆོག་གླིང་གི་ཟབ་བདུན་ཕུར་པའི་སྒྲུབ་ཆེན་གྱི་གཏོར་རྒྱག་འཆམ་དང་ལས་བཞིའི་སྦྱིན་སྲེག་བཅས་རེས་མོས། སྒྲུབ་བརྒྱུད་ཀརྨ་ཀཾ་ཚང་གི་ཐུན་མིན་ཕྱག་བཞེས་དཔལ་ཡེ་ཤེས་ཀྱི་མགོན་པོའི་བདུན་སྒྲུབ་དང་འབྲེལ་བའི་གར་འཆམ་གཏོར་རྒྱག་དང་ལས་བཞིའི་སྦྱིན་སྲེག་བཅས་གནང་སྲོལ་ཡོད། དེང་སྐབས་གྲུབ་དབང་སངས་རྒྱས་མཉན་པ་རིན་པོ་ཆེ་མཆོག་དང་༸སྐྱབས་རྗེ་བསྟན་དགའ་ཆུང་སྲིད་རིན་པོ་ཆེ་མཆོག་དབུ་བཞུགས་ཐོག་དགེ་འདུན་པ་ཞལ་གྲངས་༤༥༦ཙམ་བཞུགས་པའོ།། །།

༄༅། །བཀའ་བརྒྱུད་ཚེ་མཆོག་གླིང་དགོན་ནི། བཀའ་བརྒྱུད་སྤྲུལ་སྐུ་༸སྐྱབས་རྗེ་བསྟན་འཛིན་ཉི་ཟླ་རིན་པོ་ཆེ་མཆོག་གིས་ཕྱི་ལོ་༡༧༧༠ལོར་འཕགས་བོད་མཐའ་མཚམས་གྲོ་མོ་སྨད་དུ་ཕྱག་བཏབ། དགོན་པ་འདི་མཉམ་མེད་དྭགས་པོ་བཀའ་བརྒྱུད་ཀྱི་ནང་ཚན་དོན་བརྒྱུད་དཔལ་ལྡན་འབྲུག་པའི་སྟོད་འབྲུག་གི་ཆོས་བརྒྱུད་འཛིན་པ་ཞིག་ཡིན། ཕྱི་ལོ་༡༩༥༩ལོར་བོད་ལྗོངས་ཆོས་ལྡན་གྱི་ཞིང་དུ་རྒྱ་དམར་གཞུང་གིས་བཙུན་འཛུལ་དྲག་པོ་བྱས་ལ་བརྟེན་ནས་བོད་ཀྱི་དགོན་སྡེ་སྤྱི་མཚུངས་ལྟར་དགོན་པ་འདི་ཡང་མིང་གི་ལྷག་མར་སོང་གཤིས།བཀའ་བརྒྱུད་སྤྲུལ་སྐུ་སྐུ་ཕྲེང་བདུན་པ་༸སྐྱབས་རྗེ་འཇིགས་མེད་ངག་དབང་བསྟན་པའི་རྒྱལ་མཚན་མཆོག་གིས་དབུས་པའི་དགོན་པ་འདིའི་དགེ་འདུན་པ་མི་ཉུང་བ་ཞིག་བྲོས་བྱོལ་དུ་ཕེབས་དགོས་བྱུང་ཡོད། རྒྱ་གར་དུ་བཀའ་བརྒྱུད་ཚེ་མཆོག་གླིང་གི་དགེ་འདུན་སྐུ་ན་བགྲེས་སོང་ཞིག་གི་གཟིམས་ཤག་ཏུ་དགེ་འདུན་པ་རྣམས་ལྷན་འཛོམས་ཀྱིས་ཚེས་བཅུ་ཉེར་ལྔ་སོགས་ཆད་མེད་ཀྱིས་ལོ་མང་རིང་བཞུགས་ཤིང་། ཕྱི་ལོ་༡༩༨༧ལོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེའི་བྱིན་རླབས་དང་། དད་ལྡན་མང་པོའི་གཏོང་ཕོད་རྒྱབ་སྐྱོར་ལ་བརྟེན་ནས་འབྲས་ལྗོངས་རྒྱལ་ས་སྒང་ཏོག་ཏུ་འབྲུག་པ་བཀའ་བརྒྱུད་ཀྱི་ཆོས་བརྒྱུད་འཛིན་པའི་བྱེས་ཀྱི་དགོན་པ་འདི་གསར་བཞེངས་ལེགས་གྲུབ་བྱུང་།ཕྱི་ལོ་༢༠༠༥ལོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྦས་ཡུལ་འབྲས་མོ་ལྗོངས་སུ་ཆིབས་བསྒྱུར་སྐབས་ཀྱང་དགོན་པ་འདིར་ཕེབས་ནས་བཀའ་སློབ་ལམ་སྟོན་གྱི་རྗེས་འཛིན་བསྐྱངས། དེང་སྐབས་དགེ་འདུན་པ་ཞལ་གྲངས་༢༡ལྷག་ཙམ་བཞུགས་པའོ།། །།

༄༅། །འབྲི་གུང་གྲུ་འཛིན་ཐེག་མཆོག་གླིང་ངམ་སྨྱུང་གནས་ལྷ་ཁང་ནི། སྦིར་བོད་ཚོགས་ཀྱི་གཞིས་མི་ཚེ་འདས་ཡོ་རེ་ཚང་བརྩོན་འགྲུས་སེངྒེ་ལགས་ཀྱིས་༸སྐྱབས་རྗེ་དབོན་སྤྲུལ་རིན་པོ་ཆེ་མཆོག་ལ་དེ་གའི་ས་གནས་སུ་འདི་ཕྱི་གཉིས་ཀྱི་༸སྐྱབས་གནས།འཛམ་གླིང་ཞི་བདེའི་དེད་དཔོན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཕྱྭའི་ཞབས་རིམ་དང་། གཞན་ཡང་ཆོས་ཕྱོགས་དང་འབྲེལ་བའི་ཞབས་རིམ་ཞུ་སྒོ་ཁག་གི་ཆེད་དུ་འདུ་འཛོམས་ཞུ་ས་དགོས་གལ་སྙན་གསེང་སྐྱབས་འཇུག་ཞུས་དོན་ལྟར་རིན་པོ་ཆེ་ནས་ས་ཆ་རིན་མེད་གནང་། ཕྱི་ལོ་ ༢༠༠༨ ལོར་འདས་པོ་ཁོང་རང་ཉིད་ཀྱིས་དཔལ་འབྱོར་རོགས་དངུལ་ཐབས་འཚོལ་གནང་སྟེ་གསར་བཞེངས་གནང་སྟེ། སྒྲུབ་བརྒྱུད་བསྟན་པའི་གསལ་བྱེད་༸སྐྱབས་རྗེ་འབྲི་གུང་ཆེ་ཚང་རིན་པོ་ཆེ་མཆོག་གདན་འདྲེན་ཞུས་ནས་དབུ་འབྱེད་གནང་། མི་མང་གིས་ལོ་ལྟར་སྨྱུང་གནས་དང་། ཚེས་བཟང་དུས་བཟང་སྐབས་ཞབས་རིམ་གསོག་སྒྲུབ་གནང་དང་གནང་བཞིན་པ་ཡིན།། །།

༄༅། །གནས་ནང་ཕུན་ཚོགས་ཆོས་གླིང་དགོན་ནི། རྗེ་ཞྭ་དམར་སྐུ་ཕྲེང་དང་པོ་རྟོགས་ལྡན་གྲགས་པ་སེངྒེ་མཆོག་གིས་སྟོད་ལུང་བདེ་ཆེན་རྫོང་ཁོངས་སུ་ཕྱག་བཏབ། ཀརྨ་པ་ཆོས་གྲགས་རྒྱ་མཚོས་དཔའ་བོ་ཆོས་དབང་ལྷུན་གྲུབ་མཆོག་བཀའ་བརྒྱུད་མར་པ་ལོ་ཙཱ་བ་ཡབ་སྲས་ཀྱི་གདན་ས་ཆེན་པོ་སྲས་གྲོ་བོ་ལུང་གི་བསྟན་པའི་བདག་པོ་མངའ་གསོལ་ཞིང་། དེའི་སྐུ་ཕྲེང་དགུ་པ་མཆོག་གིས་ལྷ་ས་དང་ཉེ་བ་སྟོད་ལུང་བདེ་ཆེན་རྫོང་ཁོངས་གནས་ནང་དགོན་གྱི་གདན་ས་བསྐྱངས། སྐུ་ཕྲེང་དགུ་པ་ཡན་ལ་ཞྭ་དམར་སྐུ་ཕྲེང་རིམ་བྱོན་གྱིས་གདན་ས་བསྐྱངས། བྱེས་ཀྱི་གདན་ས་འདི་ནི་བལ་ཡུལ་མཆོད་རྟེན་བྱ་རུང་ཁ་ཤོར་གྱི་ཉེ་འགྲམ་དུ་དཔའ་བོ་སྐུ་ཕྲེང་བཅུ་བཞི་པ་གཙུག་ལག་སྨྲ་བའི་དབང་ཕྱུག་མཆོག་གིས་ཕྱི་ལོ་༡༩༨༥ལོར་ཕྱག་བཏབ། དེང་སྐབས་དཔའ་བོ་གཙུག་ལག་སྐུ་ཕྲེང་བཅོ་ལྔ་པ་བསྟན་འཛིན་ཀུན་བཟང་ཆོས་ཀྱི་ཉི་མ་མཆོག་དབུ་བཞུགས་ཀྱིས་དབང་ལུང་སོགས་སྩོལ་བཞིན་པ་དང་།གྲྭ་པའི་ཞལ་གྲངས་༢༥ཡོད།། །།

༄༅། །དཔལ་རི་དགོན་ཐུབ་བསྟན་བསམ་འགྲུབ་ཆོས་འཁོར་གླིང་ནི། རྒྱལ་དབང་ཀརྨ་པ་བདུད་འདུལ་རྡོ་རྗེས་ལུང་གིིས་ཟིན་པ་རི་པ་བག་ཡོད་སྐུ་ཕྲེང་བཞི་པ་མཆོག་གིས་ཕྱི་ལོ་༡༧༦༥ལོར་མདོ་ཁམས་ནང་ཆེན་རྒྱལ་པོའི་མངའ་འོག་བེ་ཧུ་ཉེར་ལྔའི་ཁོངས་འབྲོང་སྨད་བེ་ཧུ་ཞེས་རི་བོ་གླང་ཆེན་ཟུར་དུ་འགྱིངས་པ་འདྲ་བའི་གནས་སུ་ཕྱག་བཏབ། རྒྱ་གར་དུ་རི་པ་བག་ཡོད་སྐུ་ཕྲེང་བརྒྱད་པ་ཀརྨ་བཤད་སྒྲུབ་ཆོས་ཀྱི་སེངྒེ་གཞན་ཕན་མཐའ་ཡས་རིན་པོ་ཆེ་མཆོག་གིས་ཕྱི་ལོ་༡༩༩༤ལོར་རྒྱ་གར་ལྷོ་ཕྱོགས་ཀོ་ལི་གྷལ་དོན་ལྡན་གླིང་དུ་ཕྱག་བཏབ། དེང་སྐབས་བོད་དང་རྒྱ་གར་བཅས་ཀྱི་དགེ་འདུན་པ་ཞལ་གྲངས་༢༢ཙམ་བཞུགས་པའོ།། །།

༄༅། །འཛི་སྒར་བཀྲ་ཤིས་ཐུབ་བསྟན་ཆོས་འཁོར་དགེ་འཕེལ་གླིང་ནི། དཔལ་རྒྱལ་བ་ཀརྨ་པ་སྐུ་ཕྲེང་བཅུ་དྲུག་པ་མཆོག་གིས་ངོས་འཛིན་གནང་བ་༸སྐྱབས་རྗེ་འཛི་སྒར་སྐུ་ཕྲེང་དགུ་པ་འཇིགས་མེད་མི་ཕམ་བསྟན་པའི་ཉི་གཞོན་མཆོག་གིས་སྦིར་སྡེ་དགེའི་ཁོངས་གཏོགས་ཅོན་ཏ་ར་གཞིས་མི་ནས་ས་ཆ་ཕུལ་བ་བཞིན།ཕྱི་ལོ་༡༩༧༤ལོར་སྦིར་སྡེ་དགེའི་གཞིས་ཁོངས་སུ་བྱེས་ཀྱི་གདན་ས་དང་པོ་འདི་ཉིད་ཕྱག་བཏབ་སྟེ། བཤད་སྒྲུབ་སྔགས་གསུམ་གྱི་མཛད་པ་བསྐྱངས་ས་གཙོ་བོར་གནང་། ཕྱི་ལོ་༡༩༨༠ལོ་ནས་གནས་ཆེན་མཚོ་པདྨ་རུ་དགོན་པ་གསར་བཞེངས་གནང་སྟེ་དགོན་པ་གནས་སྤོ་དང་། སྦིར་སྡེ་དགེའི་གཞིས་ཁོངས་ཀྱི་འཛི་སྒར་དགོན་པར་གྲྭ་པ་བཞི་སྡེ་ཞིག་གཏན་བཞུགས་ཀྱིས་མགོན་ཁང་དང་། དུས་མཆོད། ཉིན་རེའི་གནང་སྒོ་ཁག་རྒྱུན་ཆད་མེད་པར་བསྒྲུབས་དང་སྒྲུབ་བཞིན་པའོ།། །།

༄༅། །བཤད་གྲྭ་ཐུབ་བསྟན་ལེགས་བཤད་འབྱུང་གནས་སམ་འབྲུག་མཐོ་སློབ་དྷརྨ་ཀཱ་ར་ནི། རྒྱལ་བ་མདོ་ཁམས་པ་མཆོག་སྟོན་འཁོར་བཅས་རྒྱ་གར་དུ་བཙན་བྱོལ་ལ་འབྱོར་སྟབས། མཁན་པོ་བརྩོན་འགྲུས་དང་།མཁན་པོ་ཆོས་དར། མཁན་པོ་རིན་ཆེན་སོགས་ཀྱིས་ཀ་ལིང་སྤུང་དང་ཌ་ལ་ཧའོ་སི་བཅས་སུ་འཆད་ཉན་གྱི་རྒྱུན་བསྐྱངས། ཕྱིས་སུ་མཁྱེན་བརྩེ་ཡེ་ཤེས་རིན་པོ་ཆེ་མཆོག་གིས་ཁམས་སྒར་བཀྲ་ཤིས་ལྗོངས་སུ་བཤད་གྲྭའི་གཙུག་ལག་ཁང་དང་། དགེ་འདུན་པའི་བཞུགས་ཤག་སོགས་ཀྱི་མཐུན་འགྱུར་མཛད། རིམ་བཞིན་བོད་དང་།འབྲུགལ་དྭགས།གར་ཞ།ཁུ་ནུ།སྤི་ཏི། རྟ་མང་།ཤར་པ་བཅས་དཔལ་འབྲུག་པ་བཀའ་བརྒྱུད་ཀྱི་གདུལ་ཞིང་དུ་གཏོགས་པ་མཐའ་དག་ནས་སློབ་གཉེར་པ་མང་པོ་འདུས་ཤིང་། མཁན་པོ་མཁས་གྲུབ་དང་མཁན་པོ་རིན་ཆེན་སོགས་གདན་ཞུས་ཀྱིས་བཤད་གྲྭའི་འཆད་ཉན་གྱི་རྒྱུན་མུ་མཐུད་བསྐྱངས་ཤིང་།སློབ་ཚོགས་མང་དུ་འཕེལ་བས་སློབ་གླིང་གསར་པ་བཞེངས་དགོས་བྱུང་སྟེ།ཕྱི་ལོ་༢༠༡༩ལོར་བཤད་གྲྭ་གསར་པར་གནས་སྤོས། དེང་སྐབས་རྒྱུན་བཞུགས་དགེ་འདུན་པ་ཞལ་གྲངས་༢༡༡ཙམ་གྱིས་ཀུན་མཁྱེན་བླ་མའི་ཡིག་ཆའི་གཞུང་བསྲངས་ཤིང་། བུ་སྟོན་རིན་པོ་ཆེ་དང་འཕགས་བོད་མཁས་གྲུབ་མང་པོའི་གསུང་གིས་ཟུར་རྒྱན་བྱས་ཏེ།ལོ་རེར་ཟླ་བ་གཉིས་ཕུད་མཁན་སློབ་ཡོངས་འདུས་ཀྱིས་བསླབ་པ་སློབ་གཉེར་གནང་དང་གནང་མུས་ཡིན།།།།

༄༅། །བཙུན་དགོན་དཔལ་སྤུངས་ཡེ་ཤེས་རབ་རྒྱས་གླིང་ནི། རྒྱ་གར་དུ་བྱམས་མགོན་རྡོ་རྗེ་འཆང་གི་ཐུགས་དགོངས་ལྟར་གདན་སའི་ཚོགས་པས་ཕྱི་ལོ་༢༠༠༧ལོར་རྒྱ་གར་བྱང་ཕྱོགས་ཧི་མཱ་ཅལ་མངའ་ཁོངས་ཀུ་ལུ་བྷ་ཇོ་ར་ས་གནས་སུ་བྱེས་ཀྱི་དགོན་སྡེ་འདི་ཉིད་གསར་བཞེངས་གནང་ཞིང་།དཔལ་སྤུངས་ཡེ་ཤེས་རབ་རྒྱས་གླིང་ཞེས་པའི་མཚན་གསོལ་མཛད། ཕྱི་ལོ་༢༠༡༣ལོར་འགོ་བཙུགས་ཀྱིས་གཙུག་ལག་ཁང་དང་།ཡང་ཐོག་གཟིམ་ཆུང་།བཙུན་མའི་ཤགའཛིན་ཁང་སོགས་གདན་སའི་འཛིན་སྐྱོང་ཚོགས་པས་མཐུན་འགྱུར་དང་ལས་སྣེ་ཡོངས་ཀྱིས་འབད་བརྩོན་ལ་བརྟེན་ནས་ཕྱི་ལོ་༢༠༡༨ལོར་ཕྱི་ནང་རྟེན་དང་བརྟེན་པ་བཅས་གསར་བཞེངས་ལེགས་གྲུབ་བྱུང་། དེང་སྐབས་བཙུན་མ་ཞལ་གྲངས་༡༧༥ཙམ་གྱིས་ཡི་གེ་འབྲི་ཀློག་ནས་བཟུང་ཨིན་ཡིག་དང་ཧིནྡཱི།ཨང་རྩིས་བཅས་ལོ་རིམ་གསུམ་པ་བར་དང་། རིག་གནས་དང་གཞུང་ཆེན་བཀའ་པོད་ལྔ་བཅས་ལ་ལོ་རིམ་དགུ་བར་གཏན་འབེབས་ཀྱིས་སྦྱང་བརྩོན་གནང་བཞིན་པ་མ་ཟད། སྨན་རྩིས་རིག་གནས་དམིགས་བསལ་ཐོག་གདན་སའི་རིག་གནས་མཐོ་སློབ་ཏུ་ཆེད་ཞུགས་བྱས་ཏེ།ལོ་རིམ་བརྒྱད་མཐར་ཕྱིན་རྗེས་སྨན་རྩིས་བསྡུས་ར་བ་དང་། བཀའ་བཅུ་པ་བཅས་ཆེད་ཐོན་བྱ་རྒྱུའི་མཐུན་ཆ་ཚང་ཡོད། དཔལ་སྤུངས་པའི་སྔ་སྲོལ་ལྟར་ཆོ་ག་ཕྱག་ལེན་དང་འབུད་རྡུང་བཀྲོལ་གསུམ། གཏོར་བཟོ་རྒྱན་བཀོད་སོགས་སྒྲུབ་སྡེ་བྱང་ཆུབ་བསམ་གཏན་གླིང་དུ་མར་མི་དྭགས་གསུམ་གྱི་བླ་སྒྲུབ་དང་། ཡི་དམ་ཕག་བདེ་རྒྱུད་གསུམ་གྱི་བསྙེན་སྒྲུབ། ཟབ་ལམ་ནཱ་རོ་ཆོས་དྲུག་དང་ཤངས་པའི་གསེར་ཆོས་ནི་གུ་ཆོས་དྲུག་སོགས་གདན་སའི་མཐོང་བ་བརྒྱུད་པ་ལྟར་ལོ་གསུམ་ཕྱོགས་གསུམ་གནང་གྲུབ་པ་བཅས། བཙུན་མ་རྣམས་ཀྱིས་མཐོང་བ་བརྒྱུད་པའི་ཆོ་ག་ཕྱག་ལེན་དང་གཞུང་ཆེན་ཁག་ལ་སློབ་གཉེར་གནང་གྲུབ་རྗེས་སྐྱོར་དཔོན་དང་།སློབ་དཔོན། མཁན་མོ་སོགས་གདན་སའི་བཙུན་པའི་སྡེ་དང་གཅིག་མཚུངས་ལྟར་གནང་སྟེ། གདན་ས་དཔལ་སྤུངས་ཤེས་རབ་གླིང་གི་འཛིན་སྐྱོང་ཚོགས་པ་དང་བླ་བྲང་གིས་གཟིགས་སྐྱོང་འོག་བཙུན་དགོན་འདི་དར་རྒྱས་འགྲོ་བཞིན་ཡོད།། །།

༄༅། །དཔལ་བཀའ་བརྒྱུད་བཤད་སྒྲུབ་བཀྲ་ཤིས་དར་རྒྱས་ཕུན་ཚོགས་གླིང་ནི། བྱང་སྟག་ལུང་ཡར་ཐང་གི་ཆོས་རྗེ་ཁྲི་རབས་བཞི་པ་རྗེ་བཙུན་སངས་རྒྱས་དབོན་གྱིས་ཕྱི་ལོ་༡༢༧༦ལོར་ཁམས་དབྱི་ཤོད་རི་བོ་ཆེར་ཕྱག་བཏབ། དེ་ནས་བཟུང་སྟག་ལུང་ཡར་ཐང་མར་ཐང་གཉིས་སུ་གྱེས། ནང་རྟེན་ནཱ་རོའི་རུས་རྒྱན་དང་། ཇོ་བོ་རྗེའི་དབུ་ཞྭ་དང་ཕྱག་དྲིལ། རྗེ་ཕག་མོ་གྲུབ་པའི་སྐུ། སྟག་ལུང་ཐང་པ་རིན་པོ་ཆེའི་དངུལ་སྐུ་ཐེར་མ་སོགས་དང་།གསུང་རྟེན་གསེར་དངུལ་ཤ་སྟག་ལས་བྲིས་པའི་པོད་ཆེན་ཁྲི་ལྔ་ཙམ་དང་།ཐུགས་རྟེན་གསེར་དངུལ་ཙནྡན་དཀར་དམར་སྨན་འཇིམ་ལས་གྲུབ་པའི་མཆོད་རྟེན་བརྒྱ་ཕྲག་ཙམ་བཅས་སྐུ་གསུང་ཐུགས་རྟེན་བྱིན་ཅན་མང་དུ་བཞུགས། བལ་ཡུལ་དུ་འཕགས་མཆོག་སྐུ་ཕྲེང་བདུན་པ་བསྟན་འཛིན་འཇིགས་མེད་གྲགས་པ་མཆོག་དང་ཁམས་རི་བོ་ཆེའི་ཆོས་ཚོགས་ཀྱི་མི་མང་ཐུན་མོང་ནས་ཕྱི་ལོ་༢༠༠༠ལོར་བལ་ཡུལ་མཆོད་རྟེན་བྱ་རུང་ཁ་ཤོར་གྱི་ཉེ་འགྲམ་རམ་མེ་ཀྲིས་ཞེས་པའི་ས་གནས་སུ་ཁམས་རི་བོ་ཆེའི་བྱེས་ཀྱི་གདན་ས་འདི་ཉིད་གསར་བཞེངས་གནང་། དེང་སྐབས་འཕགས་མཆོག་སྐུ་ཕྲེང་བདུན་པ་དབུ་བཞུགས་ཐོག་ཕྱི་ལོ་༢༠༡༡ལྟར་ན།དགེ་འདུན་པ་ཞལ་གྲངས་༥༢ཙམ་གྱིས་རང་ལུགས་ཆོས་སྤྱོད་སོགས་ལ་སློབ་གཉེར་གནང་བཞིན་ཡོད།། །།