སྟོན་པ་གཤེན་རབ་མི་བོའི་རྣམ་ཐར།
༄༅། །སྟོན་པ་གཤེན་རབ་མི་བོ་ཕྱི་ལོའི་སྔོན་གྱི་ལོ་ ༡༦༠༡༧ ཙམ་ལ་བོད་ཡུལ་གངས་རི་ཏེ་སེའི་ཉེ་འགྲམ་དུ་ཡབ་ཞང་ཞུང་གི་རྒྱལ་པོ་རྒྱ་བོན་ཐོད་དཀར་དང་། ཡུམ་བྱམས་མ་རྣམ་སྤྲུལ་ཡུམ་ཆེན་རྒྱལ་བཞེད་མ་གཉིས་ཀྱི་སྲས་སུ་སྐུ་བལྟམས། ཡབ་རྒྱ་བོན་ཐོད་དཀར་གྱིས་མཚན་མཁན་བྲམ་ཟེ་གདན་དྲངས་ནས་བརྟག་པར་གཞན་དང་མི་འདྲ་བ་སྤྲུལ་པའི་སྐུ་རུ་གསུངས་ཏེ།སྟོན་པ་གཤེན་རབ་མི་བོ་ཞེས་མཚན་གསོལ། གཤེན་ནི་རིགས་རུས། རབ་ནི་མཆོག་གམ་མགོན་དུ་གྱུར་པ། མི་བོ་ནི་རླབས་ཆེ་བའི་མི་སྟེ། དམུ་རུས་གཤེན་ལས་འཁྲུངས་པའི་སྟོན་པ་བླ་ན་མེད་པའམ་སངས་རྒྱས་སམ་རླབས་ཆེན་གྱི་མི་སྣ་ལ་གོསྐུ་ན་ཕྲ་དུས་ནས་ཡབ་ཀྱི་རྒྱལ་ས་བཟུང་བས་ཞང་ཞུང་རྒྱལ་པོ་ཞེས་གྲགས། སྔོན་རྒྱལ་ཁབ་བཅུའི་སྲས་མོ་ཁབ་ཏུ་བཞེས་ཚུལ་མཛད་དེ། སྲས་བརྒྱད་དང་། སྲས་མོ་གཉིས་བཅས་རིགས་སྲས་བཅུ་འཁྲུངས། དགུང་ལོ་སོ་གཅིག་བར་ཞང་ཞུང་རྒྱལ་ཁབ་ཆེ་ཆུང་ཐམས་ཅད་(ཕྱིས་རྒྱལ་ཁབ་བཅོ་བརྒྱད་དུ་གྲགས།)དབང་དུ་བསྒྱུར་ཏེ་ལས་རྒྱུ་འབྲས་ཀྱི་བོན་ལ་བརྟེན་ནས་རྒྱལ་སྲིད་བསྐྱངས་པར་མཛད། སྒྲ་ཚད་བཟོ་གསོ་ལ་སོགས་པའི་རིག་པའི་གནས་ལྔ་ཐེག་པ་རིམ་དགུ་བཅས་ཀྱི་སྲོལ་གཏོད་ནས་སངས་རྒྱས་གཡུང་དྲུང་བོན་གྱི་བསྟན་པ་སྤེལ། དགུང་ལོ་སོ་གཅིག་པར་ཉིད་ཀྱི་དབུ་སྐྲ་ཉིད་ཀྱིས་བསིལ་ནས་རབ་ཏུ་བྱུང་ནས་འདུལ་ཁྲིམས་ཀྱི་སྡོམ་པ་བསྲུང་། ལོ་དགུའི་རིང་དཀའ་སྤྱད་གནང་། བོན་སྒོ་བཞི་མཛོད་ལྔ་དང་། ཕྱི་འདུལ་བ་མདོ། ནང་གསང་བ་སྔགས། གསང་བ་རྫོགས་པ་ཆེན་པོའི་བོན་བཅས་ཐར་པ་དོན་དུ་གཉེར་བའི་མཐའ་ཀླས་སྐྱེ་དགུའི་དོན་གསུངས་པར་མཛད་ནས་མཁའ་ཁྱབ་འགྲོ་དྲུག་སེམས་ཅན་ཐམས་ཅད་བདེ་བའི་ལམ་དུ་འདྲེན་པ་མཛད་པའོ།། །།
ངག་དབང་ཀུན་དགའ་བསོད་ནམས་རིན་ཆེན། ༼ས་སྐྱའི་ཁྲི་འཛིན་༽
༄༅། །ངག་དབང་ཀུན་དགའ་བསོད་ནམས་རིན་ཆེན་ནི། ཕྱི་ལོ་ ༡༧༠༥ ལོར་སྐུ་འཁྲུངས།བདག་ཆེན་བསོད་ནམས་དབང་ཕྱུག་གི་སྐྱེ་སྤྲུལ་དུ་ལུང་བསྟན་མཛད།ཡབ་རྗེ་རྡོ་རྗེ་འཆང་ངག་དབང་ཀུན་དགའ་བཀྲ་ཤིས་ལས་མདོ་སྔགས་ཟུང་གི་ཆོས་བཀའ་མང་པོ་གསན། དགུང་ལོ་བཅུ་གཉིས་པར་ས་སྐྱའི་ཁྲིར་ཕེབས། དགེ་འདུན་ཁྲི་ཕྲག་ལ་ཉེ་བར་ཡབ་ཆོས་རྒྱལ་སྲས་ལམ་བཟང་འཆད་ཉན་གནང་། མཁས་གྲུབ་ཆེན་པོ་ངག་དབང་བསྟན་འཛིན་ཕུན་ཚོགས་དང་སྐུ་ཞང་བཅོ་བརྒྱད་པ་མཁྱེན་བརྩེ་རབ་བརྟན། ལྷ་ཆེན་མཁན་ཆེན་དབང་ཕྱུག་ཕུན་ཚོགས་སོགས་མཁས་གྲུབ་གཉིས་ལྡན་གྱི་དམ་པ་མང་པོ་སྤྱི་གཙུག་ཏུ་བཀུར་ཏེ་ལམ་འབྲས་སློབ་བཤད་གཙོ་བོར་གྱུར་པའི་སྡེ་སྣོད་གསུམ་དང་རྒྱུད་སྡེ་བཞིའི་ཟབ་ཆོས་མཐའ་ཡས་པ་གསན་བཞེས་མཛད། གནས་གསར་རྡོ་རྗེ་འཆང་གི་མདུན་ནས་བཀའ་འགྱུར་རིན་པོ་ཆེའི་ལྗགས་ལུང་གསན། གདན་ས་ཆེན་པོར་བདེ་ཀྱཻ་གསང་གསུམ། ནཱ་རོ་མཁའ་སྤྱོད།བདག་མེད་མ་སོགས་སྒྲུབ་མཆོད་མང་པོའི་ཚོགས་དབུར་ཕེབས་ཏེ་བསྐྱེད་རྫོགས་དང་ཕྱག་ལེན་གྱིས་གདན་སའི་བཤད་སྒྲུབ་ཀྱི་འཛིན་སྐྱོང་རྗེ་བཙུན་གོང་མའི་དུས་ལྟར་ལེགས་པར་བསྐྱངས། འཕན་ཡུལ་ནཱ་ལེནྡྲ་དང་།དབེན་དགོན་བསམ་གཏན་གླིང་།ཁྲ་འབྲུགབསམ་ཡས།ངོར་ཨེ་ཝཾ་ཆོས་ལྡན།ཞ་ལུ་སོགས་སུ་ཕེབས་ཏེ་མདོ་རྒྱུད་ཀྱི་ཆོས་འཁོར་རྒྱ་ཆེར་བསྐོར། གསང་གསུམ་གྱི་བགྱི་སྒོ་མཐའ་དག་བསྟན་པ་རྒྱས་ཤིང་འགྲོ་བ་བདེ་བའི་སླད་ཁོ་ན་མཛད། ཕྱི་ལོ་༡༧༡༡ནས་༡༧༤༡ བར་དཔལ་ས་སྐྱ་པའི་གདན་ས་བསྐྱངས། དགུང་ལོ་སོ་བདུན་བཞེས་པ་ཕྱི་ལོ་ ༡༧༤༡ ལོར་སྐུ་གཤེགས་སོ། །
འཁོན་སྟོན་ངག་དབང་རྡོ་རྗེ་རིན་ཆེན། ༼ས་སྐྱའི་ཁྲི་འཛིན་༽
༄༅། །འཁོན་སྟོན་ངག་དབང་རྡོ་རྗེ་རིན་ཆེན་ནི། ཕྱི་ལོ་ ༡༨༡༩ ལོར་སྐུ་འཁྲུངས།སྐུ་ན་ཆུང་དུས་ནས་ཡབ་རྗེ་རྡོ་རྗེ་འཆང་ངག་དབང་ཀུན་དགའ་རིན་ཆེན་སྐུ་མཆེད་གཉིས་ཀྱི་ཞལ་སྔ་ནས་གསུང་ངག་རིན་པོ་ཆེ་ལམ་འབྲས་ཚོགས་བཤད་དང་། སྒྲུབ་ཐབས་བརྒྱ་རྩ། བ་རི་བརྒྱ་རྩ་སོགས་མན་ངག་གི་ཆོས་བཀའ་ཅི་བཞུགས་གསན། མཁས་གྲུབ་ཆེན་པོ་ཁུ་བོ་ངག་དབང་ཀུན་དགའ་རྒྱལ་མཚན། རྗེ་བཙུན་མ་འཆི་མེད་བསྟན་པའི་ཉི་མ་སོགས་ལས་རྒྱུད་སྡེ་མཐའ་དག་གི་དབང་ཆེན་དང་།མན་ངག ལུང་། བྱིན་རླབས་སོགས་བོད་ན་བཞུགས་པའི་གསར་རྙིང་གི་ཆོས་བཀའ་ཕལ་མོ་ཆེ་གསན། ས་ཆེན་ཀུན་བློ་མན་ནས་འཁོན་གདུང་ཞིག་ལ་འདི་ལས་གསན་རྒྱ་ཆེ་བ་མ་བྱུང་བར་གྲགས། དགུང་ལོ་ཉེར་ལྔ་པར་དཔལ་ལྡན་ས་སྐྱ་པའི་ཆོས་ཁྲི་ཆེན་པོར་མངའ་གསོལ། འདུས་ཚོགས་སུ་ཐུབ་པ་དགོངས་གསལ་ཉིན་གསུམ་རིང་བསྩལ། རྗེ་བཙུན་གོང་མའི་སྒྲུབ་གནས་ཆེན་པོ་རྣམས་སུ་རྩེ་གཅིག་པའི་ཏིང་འཛིན་གྱིས་འབྱུང་འདུལ་དང་གུར་མགོན་བྲག་རྫོང་སོགས་ལྷག་ལྷ་ཡི་དམ་མཁའ་འགྲོ་རྒྱ་མཚོའི་བསྙེན་སྒྲུབ་ལ་བཞུགས་ཏེ་གདན་སའི་སྒྲུབ་མཆོད་ཁག་གི་རྡོ་རྗེ་སློབ་དཔོན་དང་ཟོར་ལས་པ་མཛད། འབྲུག་གི་སྤ་གྲོ་སྟག་ཚང་དུ་ཕུར་བཟློག་མཛད་པ་ན་གཏོར་ཆེན་ཁྲག་རློན་ལྟར་ཉེར་ཞིང་། མདའ་ཟོར་བྲག་ལ་ཟུག་པ། གཏེར་བུམ་བཞག་སྟེ་མཚོ་ལ་རབ་གནས་མཛད་པས་མཚོ་ཁ་ལུད་ཅིང་ཟངས་མདོག་ཏུ་གྱུར་པ་སོགས་ངོ་མཚར་ཅན་གྱི་རྣམ་ཐར་མང་། ཕྱི་ལོ་ ༡༨༤༣ ནས་ ༡༨༤༥ བར་གདན་ས་བསྐྱངས། དགུང་ལོ་ཞེ་དགུ་བཞེས་པ་ཕྱི་ལོ་ ༡༨༦༧ ལོར་སྐུ་གཤེགས་སོ། །
ཀུན་དགའ་སྙིང་པོ་བསམ་འཕེལ་ནོར་བུ། ༼ས་སྐྱའི་ཁྲི་འཛིན་༽
༄༅། །ཀུན་དགའ་སྙིང་པོ་བསམ་འཕེལ་ནོར་བུ་ནི། ཕྱི་ལོ་ ༡༨༥༠ ལོར་སྐུ་འཁྲུངས། གྲུབ་ཆེན་ཐང་སྟོང་རྒྱལ་པོ་དང་ཐུགས་རྒྱུད་གཅིག་པར་བཤད། དགུང་ལོ་བཞི་ནས་བཟུང་ཡབ་རྗེ་རྡོ་རྗེ་འཆང་གི་ཞལ་སྔ་ནས་དཔལ་དགྱེས་པ་རྡོ་རྗེ་དང་། ཕུར་པའི་རྡུལ་ཚོན་གྱི་དཀྱིལ་འཁོར་དུ་སྨིན་པར་མཛད། རྗེ་བཙུན་གྲུབ་མཆོག་སྐལ་བཟང་ཆོས་ཀྱི་ཉི་མ་དང་། མཁན་ཆེན་རྡོ་རྗེ་འཆང་བཀྲ་ཤིས་ཆོས་འཕེལ། རྗེ་བཙུན་མ་དྲུང་སྐལ་བཟང་ཆོས་ཀྱི་དབང་མོ་སོགས་ལས་མདོ་སྔགས་རིག་གནས་དང་བཅས་པ་གསན་སྦྱོང་གནང་། ཀྱེ་རྡོར་གྱི་བསྙེན་སྒྲུབ་མཛད་པ་ན་མཁའ་འགྲོ་མས་རིན་པོ་ཆེ་མུ་མེན་ལས་གྲུབ་པའི་ཏོག་ཅིག་སྒོ་སྐྱེལ་གནང་། ཚེ་སྒྲུབ་ལ་བཞུགས་པ་ན་གྲུབ་ཆེན་ཐང་སྟོང་པ་འཁོར་དང་བཅས་པས་ཞལ་གཟིགས་མཛད་པ་སོགས་ལྷག་ལྷའི་ཞལ་གཟིགས་དང་ཆོས་སྲུང་མཐུ་རྩལ་ཅན་རྣམས་ཀྱིས་ལས་བཞིའི་འཕྲིན་ལས་ལ་དབང་འབྱོར། གདན་སའི་སྒྲུབ་མཆོད་དང་། མདོས་ཆེན་སོགས་བསྟན་སྲིད་སྤྱིའི་ཞབས་རིམ་ལ་ནན་ཕེབས་ཀྱིས་རྒྱུད་སྡེའི་དགོངས་པ་དང་མཐུན་པ་འབའ་ཞིག་མཛད། བསྟན་འགྲོའི་དོན་འབའ་ཞིག་ཐུགས་ལ་བརྣག་སྟེ་གསུང་ངག་རིན་པོ་ཆེ་ལམ་འབྲས་ཚོགས་བཤད་ཚར་བཞི།གསེར་ཆོས་བཅུ་གསུམ། ནཱ་རོ་མཁའ་སྤྱོད་སོགས་ཟབ་རྒྱས་ཆོས་འཁོར་བསྐོར་བས་གསུང་གི་གསང་བ་འཛིན་པའི་བུ་སློབ་མཁས་གྲུབ་ཆེན་པོ་གཅུང་གསང་བའི་བདག་པོ་དང་། ཆོས་དང་རིགས་ཀྱི་སྲས་སུ་གྱུར་པ་དྲག་ཤུལ་འཕྲིན་ལས་རིན་ཆེན། ངོར་མཁན་ཆེན་ངག་དབང་བློ་གྲོས་གཞན་ཕན་སྙིང་པོ། བཅོ་བརྒྱད་པ་ངག་དབང་ཀུན་དགའ་མཁྱེན་རབ་སོགས་མཁས་གྲུབ་མང་དུ་བྱོན།ཕྱི་ལོ་ ༡༨༨༣ ནས་ ༡༨༩༩ བར་དཔལ་ས་སྐྱ་པའི་གདན་ས་བསྐྱངས། ཕྱི་ལོ་༡༨༩༩ལོར་སྐུ་གཤེགས་སོ། །
ངག་དབང་མཐུ་སྟོབས་དབང་ཕྱུག ༼ས་སྐྱའི་ཁྲི་འཛིན་༽
༄༅། །ངག་དབང་མཐུ་སྟོབས་དབང་ཕྱུག་ནི། ཕྱི་ལོ་ ༡༩༠༠ ལོར་སྐུ་འཁྲུངས། ཡབ་ཀྱིས་ངག་དབང་མཐུ་སྟོབས་དབང་ཕྱུག་དྲག་ཤུལ་ཡོན་ཏན་རྒྱ་མཚོ་བཀྲ་ཤིས་གྲགས་པའི་རྒྱལ་མཚན་ཞེས་མཚན་གསོལ། ཐར་རྩེ་མཁན་ཆེན་བྱམས་པ་བསྟན་འཛིན་གྱིས་ཐར་རྩེ་བ་ནམ་མཁའ་འཆི་མེད་ཀྱི་སྐྱེ་སྲིད་དུ་ངོས་འཛིན་གནང་། འཇམ་དབྱངས་མཁྱེན་བརྩེའི་དབང་པོའི་སྤྲུལ་གཞི་ལྔའི་ནང་ནས་གཅིག་ཡིན་ཚུལ་ཀོང་སྤྲུལ་དང་། རྡོ་གྲུབ་བསྟན་པའི་ཉི་མ་སོགས་ཀྱིས་གསུངས། ཡབ་རྗེ་རྡོ་རྗེ་འཆང་འཛམ་གླིང་ཆེ་རྒུ་དབང་སྡུད་དང་། ངོར་ཁང་གསར་མཁན་ཆེན་དམ་པ་རྡོ་རྗེ་འཆང་ངག་དབང་བློ་གྲོས་གཞན་ཕན་སྙིང་པོ།གྲུབ་པའི་དབང་ཕྱུག་ཀླུ་ལྡིང་རྒྱལ་སྲས་སོགས་ལས་ལམ་འབྲས་གཙོ་བོར་གྱུར་པའི་མདོ་སྔགས་ཀྱི་ཟབ་ཆོས་རྒྱ་ཆེར་ཐོས་བསམ་གནང་། དགུང་ལོ་སོ་བརྒྱད་པ་ཕྱི་ལོ་ ༡༩༣༧ ལོར་དཔལ་ས་སྐྱ་པའི་ལུགས་གཉིས་བདག་པོར་མངའ་གསོལ་བ་ནས་གདུལ་བྱ་མང་པོར་གསུང་ངག་རིན་པོ་ཆེ་ལམ་འབྲས་གཙོ་བོར་གྱུར་པའི་མདོ་རྒྱུད་ཀྱི་ཆོས་འཁོར་རྒྱ་ཆེར་བསྐོར། ཨ་མདོ་དྷཱི་ཕུ་ཆོས་རྗེའི་དབོན་སྤྲུལ་སྐུ་ཕྲེང་བདུན་པ་ཡོངས་འཛིན་དང་བཅས་པར་རྡོ་རྗེ་རྣལ་འབྱོར་མའི་བྱིན་རླབས་གནང་སྐབས་ཡེ་ཤེས་དབབ་པའི་དུས་སུ་རྗེ་ཉིད་བཞུགས་གདན་ནས་ནམ་མཁར་ཁྲུ་གང་འཕར་ཏེ་བཞུགས་པ་སོགས་ཀྱི་གྲུབ་པའི་མཚན་མ་མང་དུ་མངའ། ས་སྐྱར་དུས་འགྱུར་གྱི་དབང་གིས་མདོ་ཕྱོགས་ཀྱི་འཆད་ཉན་ཉམས་དམས་སུ་སོང་བ་ཐུགས་ཀྱིས་མ་བཟོད་པར་དབྱར་དགག་གསོ་གསུམ་དང་གྲགས་ཆེན་བཅོ་བརྒྱད་ཀྱི་འཆད་ཁྲིད་སླར་གསོ་གནང་། ཕྱི་ལོ་ ༡༩༣༧ ནས་ཕྱི་ལོ་ ༡༩༥༠ བར་དཔལ་ས་སྐྱ་པའི་གདན་ས་བསྐྱངས། ཕྱི་ལོ་ ༡༩༥༠ ལོར་སྐུ་གཤེགས་སོ། །
དང་པོ། རབ་ཏུ་དཔའ་བའི་སྒྲོལ་མ། ༼སྒྲོལ་མ་ ༢༡༽
༄༅། །རབ་ཏུ་དཔའ་བའི་སྒྲོལ་མ་ནི། སྐུ་མདོག་དམར་མོ་མེ་དཔུང་འཕྲོ་བ། ཞལ་གཅིག་ཕྱག་བརྒྱད། དང་པོ་གཉིས་སྤྱིི་བོར་བསྣོལ་བས་རྡོ་རྗེ་དང་དྲིལ་བུ་འཛིན་པ། གཉིས་པ་གཉིས་ཀྱིས་མདའ་གཞུ། གསུམ་པ་གཉིས་ཀྱིས་འཁོར་ལོ་དང་དུང་། བཞི་པ་གཉིས་ཀྱིས་རལ་གྲི་དང་ཞགས་པ་བསྣམས་པ། ཞི་བའི་སྐུ་ཅན། ཞབས་རྡོ་རྗེའི་སྐྱིལ་ཀྲུང་གིས་བཞུགས་པ། དར་སྣ་ཚོགས་དང་རིན་པོ་ཆེའི་རྒྱན་ཐམས་ཅད་ཀྱིས་བརྒྱན་པ། ཟླ་བའི་འོད་ཀྱི་རྒྱབ་ཡོལ་ཅན་ནོ།། །།
མགོན་དཀར་ཡིད་བཞིན་གྱིི་ནོར་བུ།
༄༅། །མགོན་དཀར་ཡིད་བཞིན་གྱི་ནོར་བུ་ནི། སྐུ་མདོག་དཀར་པོ།ཞལ་གཅིག ཕྱག་དྲུག་ཞལ་ཁྲོ་ལ་འཛུམ་གྱི་རྣམ་པ་ཅན་རབ་ཏུ་བཞད་པ། སྤྱན་གསུམ་དང་ལྡན་པ། སྨ་ར་དང་སྨིན་མ་དབུ་སྐྲ་ཁམ་སེར་བརྫེས་པ།དཔྲལ་བར་སིནྡྷུ་རའི་ཐིག་ལེས་བྱུགས་པ།སྤྱི་བོར་མི་བསྐྱོད་རྒྱལ་པོས་རྒྱས་བཏབ་པ།ཕྱག་གཡས་ཀྱི་དང་པོས་གྲི་གུག་ནམ་མཁའ་ལ་འཕྱར་བ། ཕྱག་གཡས་བར་བས་ནོར་བུ་དབང་གི་རྒྱལ་པོ་ཐུགས་ཀར་གཏོད་པ། ཕྱག་གཡས་ཐ་མས་སེང་ལྡེང་གི་ཌ་མ་རུ་འཁྲོལ་བ།ཕྱག་གཡོན་གྱི་དང་པོས་བུམ་པ་ནོར་བུས་གང་བ་ཀ་པཱ་ལ་བདུད་རྩིས་གང་བའི་ནང་དུ་བཅུག་སྟེ་བརླ་གཡོན་པ་ལ་བརྟེན་པ།ཕྱག་གཡོན་གཉིས་པ་ན་རྩེ་གསུམ། ཕྱག་གཡོན་ཐ་མ་ན་ཞགས་པ་འཛིན་པ། པདྨ་དང་ཉི་མ། ཚོགས་བདག་གི་གདན་བཅས་ཏེ་བཞུགས་པ།དར་སྣ་ཚོགས་ཀྱི་ལྷབ་ལྷུབ་དང་། སྟག་ལྤགས་ཀྱི་ཤམ་ཐབས་ཅན། གླང་པོ་ཆེའི་པགས་པའི་སྟོད་གཡོགས་གསོལ་བ།ཐོད་སྐམ་ལྔའི་དབུ་རྒྱན་དང། རློན་པ་ལྔ་བཅུའི་དོ་ཤལ་ཅན།རིན་པོ་ཆེའི་རྒྱན་དང་སིལ་ཁྲོལ་སོགས་ཀྱིས་མཛེས་པ། འཁོར་དུ་དབང་སྡུད་ཀྱི་མཁའ་འགྲོ་མ་བྱེ་བ་འབུམ་སྡེའི་ཚོགས་ཀྱིས་བསྐོར་ཏེ་མེ་དཔུང་རབ་ཏུ་འབར་བའི་དབུས་ན་བཞུགས་པ། ལྷ་འདི་ནོར་བདག་གི་རིགས་ཡིན་པས་སྐྱེ་འགྲོའི་དབུལ་ཕོངས་ཀྱིས་སྡུག་བསྔལ་སེལ་ཏེ་འདོད་དགུ་ལ་ལོངས་སྤྱོད་ཐུབ་པའི་དངོས་གྲུབ་སྩོལ་བ་ཡིན་ནོ།། མགོན་པོ་ཡིད་བཞིན་ནོར་བུ་ཐུགས་རྗེ་ཅན། །སྐུ་མདོག་གངས་རི་ལྟར་དཀར་འོད་ཟེར་འཕྲོ། །འགྲོ་བའི་དབུལ་ཕོངས་མ་ལུས་ཞི་མཛད་པ། །འདོད་དགུའི་དངོས་གྲུབ་སྩོལ་ལ་ཕྱག་འཚལ་བསྟོད། །ཨོཾ་གུ་རུ་མ་ཧཱ་ཀཱ་ལ་ཧ་རི་ནི་སརྦ་སིདྡྷི་ཛཿ ཞེས་གསུངས།། བཏུས་པའི་ཁུངས། ༡༽པཎ་ཆེན་བློ་བཟང་དཔལ་ལྡན་བསྟན་པའི་ཉི་མ། ཡི་དམ་རྒྱ་མཚོའི་སྒྲུབ་ཐབས་རིན་ཆེན་འབྱུང་གནས་ཀྱི་ལྷན་ཐབས་རིན་འབྱུང་དོན་གསལ་ལས་གླེགས་བམ་གཉིས་པ། ཕྱི་ལོ་༢༠༡༩ཀྲུང་གོའི་བོད་རིག་པ་དཔེ་སྐྲུན་ཁང་། ཤོག་ ༣༢༦ ནས་ ༣༢༧ བར་གསལ། ༢༽རྩོམ་སྒྲིག་པ་འགྱུར་མེད་ཆོས་ཀྱི་རྡོ་རྗེ། བོད་བརྒྱུད་ནང་བསྟན་ལྷ་ཚོགས་ཆེན་མོ། ཕྱི་ལོ་༢༠༠༡མཚོ་སྔོན་མི་རིགས་དཔེ་སྐྲུན་ཁང་། ཤོག་ ༩༦༢ ན་གསལ།
དྲུག་པ། འཇིག་རྟེན་གསུམ་ལས་རྣམ་པར་རྒྱལ་བ། ༼སྒྲོལ་མ་ ༢༡༽
༄༅། །འཇིག་རྟེན་གསུམ་ལས་རྣམ་པར་རྒྱལ་བའི་སྒྲོལ་མ་ནི། སྐུ་མདོག་དམར་མོ། ཞལ་གཅིག་ཕྱག་བཞི། ཕྱག་གཡས་ཀྱི་དང་པོས་རྡོ་རྗེ་དང་། གཉིས་པས་རལ་གྲི་འཛིན་པ་དང་། ཕྱག་གཡོན་གྱི་དང་པོས་སྡིགས་མཛུབ་དང་། གཉིས་པས་ཞགས་པ་བསྣམས་ཤིང་། སེམས་དཔའི་སྐྱིལ་མོ་ཀྲུང་གིས་བཞུགས་པ། དར་སྣ་ཚོགས་དང་རིན་པོ་ཆེའི་རྒྱན་ཐམས་ཅད་ཀྱིས་བརྒྱན་པ། ཟླ་བའི་འོད་ཀྱི་རྒྱབ་ཡོལ་ཅན་ནོ།། །།
མཐུན་པ་སྤུན་བཞི།
༄༅། །མཐུན་པ་སྤུན་བཞི་ནི། དེང་སང་བོད་ཀྱི་འདུ་ཁང་གི་སྒོ་འགྲམ་སོགས་ལ་རི་མོར་བྲིས་པ་མཇལ་རྒྱུ་ཡོད་ཅིང་།བོད་དང་འབྲེལ་བའི་སྤྱི་ཚོགས་ནང་ཡོངས་ཁྱབ་མཐུན་པ་སྤུན་བཞིའི་སྣང་བརྙན་དང་སྒྲུང་གིས་སྤྱི་ཚོགས་ཀྱི་འཚོ་བ་དང་། ལེགས་ཉེས་བླང་དོར་འབྱེད་པར་བྱེད་པའི་བསླབ་བྱ་མང་པོར་གསལ་པོ་སྟོན། འདིའི་འབྱུང་ཁུངས་འདུལ་བའི་གླེང་གཞི་རུ་སངས་རྒྱས་ཀྱི་སྐྱེས་རབས་གཅིག་ཏུ་བཤད་པ་དང། བོད་གངས་ཅན་གྱི་ལྗོངས་སུ་དུས་ནམ་ཞིག་ལ་དར་བ་མཐའ་གཅིག་ཏུ་བཤད་དཀའ་ཡང་། ཕལ་ཆེར་བོད་བཙན་པོའི་དུས་སྐབས་རྒྱ་བོད་ཀྱི་ལོ་པཎ་མང་པོས་བཀའ་བསྟན་གྱི་གཞུང་མང་པོ་བོད་བསྒྱུར་བྱས་པ་ཙམ་ནས་རི་མོ་འདི་ཡང་འཕེལ་རྒྱས་བྱུང་སྙམ་པ་ཞིག་ཡོད། དམ་པའི་ཆོས་དང་འབྲེལ་ནས་ངོ་སྤྲོད་བྱེད་སྐབས། སེམས་ཅན་གྲོགས་པོ་བཞི་པོ་འདིས་ཕན་ཚུན་རྒན་གཞོན་གྱིི་བརྩི་བཀུར་དང་བསྙེན་བཀུར་བྱེད་འདོད་སྐྱེས་ཏེ་བརྟག་པ་ན། གླང་ཆེན་གྱིས་ང་འདིར་སླེབས་དུས་ཤིང་ནྱ་གྲོ་དྷ་འདི་ངའི་ལུས་དང་མཉམ་པ་ཡོད་ཟེར། སྤྲེའུས་ཁོ་བོའི་ལུས་དང་མཉམ་ཟེར། རི་བོང་གིས་ཤིང་འདིའི་ལོ་མ་སྟེང་གི་ཟིལ་བ་ལྕེས་ལྡག་མྱོང་ཟེར། བྱ་སྲེག་པས་ཤིང་འདིའི་ས་བོན་སྟེང་དུ་ངས་བྱ་བྲུན་བཏང་ནས་སྐྱེས་པ་ཡིན་ཅེས་བཤད་མཐར། རྒན་ཤོས་བྱ་སྲེག་པ་དང་། དེ་ནས་རི་བོང་། སྤྲེའུ། གླང་ཆེན་བཅས་རྒན་གཞོན་གྱི་གོ་རིམ་བྱས་ནས་ཕར་ཚུར་བསྐྱོད་པར་གྲགས། དེའི་ཚེ་བྱ་སྲེག་པས། ང་ཚོས་འབུ་སྲིན་རིགས་མི་གསོད་ཅེས་སྲོག་གཅོད་སྤངས་པ་དང་། དེ་ལྟར་རིམ་པར་མ་བྱིན་ལེན། རྫུན། ལོག་གཡེམ། མྱོས་བྱེད་བཅས་སྤོང་བ་དམ་བཅས་ཏེ། བྱ་སྲེག་པས་བྱ་རིགས་དང། རི་བོང་གིས་རི་བོང་གི་རིགས། སྤྲེའུས་སྤྲེའུའི་རིགས། གླང་ཆེན་གྱིས་གླང་པོ་ཆེ་ལ་སོགས་པ་སོ་སོའི་རིགས་འཁོར་དུ་བསྡུས་ནས་སེམས་ཅན་ལ་འཚེ་བའི་རིགས་སྤངས་པ་ལ་བརྟེན་ནས། ཡུལ་དེར་བདེ་སྐྱིད་ཕུན་སུམ་ཚོགས་པ་བྱུང་བའི་ལོ་རྒྱུས་དྲན་པའི་ཆེད་དང། རྒན་གཞོན་བརྩི་བཀུར་དང་ཁྲིམས་དང་མཐུན་པར་ཡུལ་ཁམས་ཀུན་ཏུ་བཀྲ་ཤིས་པ་འབྱུང་བ་སྔ་མའི་བྱུང་བ་འདི་ལས་གསལ་པོར་རྟོགས་པས། རྒན་བཀུར་གཞོན་བྱམས་དང་། མཐུན་ལམ་རྡོག་རྩ་ཆིག་སྒྲིལ་བྱས་ན་ཡུལ་ལུང་ལ་བདེ་སྐྱིད་དང་བཀྲ་ཤིས་པ་འབྱུང་བའི་བསླབ་བྱ་ལེན་པའི་ཆེད་རི་མོ་འདི་ཁྱབ་སྤེལ་བྱུང་སྙམ་པའོ།།།། བཏུས་པའི་ཁུངས། ༡༽དུང་དཀར་བློ་བཟང་འཕྲིན་ལས། བོད་རིག་པའི་ཚིག་མཛོད་ཆེན་མོ་ཤེས་བྱ་རབ་གསལ།ཤོག་ ༡༠༦༥ནས་༡༠༦༧བར་གསལ། ཕྱི་ལོ་༢༠༠༢ཀྲུང་གོའི་བོད་རིག་པ་དཔེ་སྐྲུན་ཁང་། ༢༽ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་རྩོམ་སྒྲིག་པ་རྣམས། གངས་ཅན་ཤེས་རིག་བང་མཛོད། ཆོས་ཀྱི་སྒེའུ་ཁུང་གླེགས་བམ་དང་པོ། ཤོག་ ༢༥༡ནས་༢༥༢ བར་གསལ། ཕྱི་ལོ་༢༠༡༦ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་།