༄༅། །བྱམས་ཆེན་ལྷ་ཁང་ཡིད་དགའ་ཆོས་འཛིན་ནི། བོད་གངས་ཅན་གྱི་ལྗོངས་སུ་རོང་སྟོན་ཤེས་བྱ་ཀུན་རིག་ཤཱཀྱ་རྒྱལ་མཚན་མཆོག་གིས་ཕྱི་ལོ་༡༤༣༥ལོར་ལྷ་སའི་བྱང་ཕྱོགས་འཕན་པོའི་ཡུལ་དུ་ཤྲཱི་ནཱ་ལནྡཱའམ་དཔལ་རྒྱུན་གྱི་དབང་པོ་ཞེས་པའི་གདན་ས་ཐོག་མར་ཕྱག་བཏབ་གནང་བ་ནས་བཤད་སྒྲུབ་གཉིས་ཀྱི་སྒོ་ནས་རྒྱལ་བའི་བསྟན་པ་རིན་པོ་ཆེ་དར་ཞིང་རྒྱས་པ་བྱུང་། བཙན་བྱོལ་དུ་འབྱོར་རྗེས་གསང་ཆེན་བསྟན་པའི་བདག་པོ་བཅོ་བརྒྱད་ཁྲི་ཆེན་རིན་པོ་ཆེ་མཆོག་གིས་ཕྱི་ལོ་༡༩༨༣ལོར་བལ་ཡུལ་མཆོད་རྟེན་བྱ་རུང་ཁ་ཤོར་གྱི་ཉེ་འགྲམ་དུ་གཙུག་ལག་ཁང་གི་ཕྱི་ནང་རྟེན་དང་བརྟེན་པ་བཅས་གསར་བཞེངས་མཛད། འདུ་ཁང་ནང་རྟེན་གཙོ་གསེར་ཟངས་ལས་གྲུབ་པའི་རྒྱལ་བ་བྱམས་པ་མགོན་པོའི་སྣང་བརྙན་ཐོག་ཚད་མ་དང་། གསེར་ཟངས་ལས་གྲུབ་པའི་སྟོན་པ་ཐུབ་པའི་དབང་པོའི་སྐུ། མར་མེ་མཛད་ཀྱི་ངེས་སྣང་མདའ་ཚད་ཙམ། གཡས་གཡོན་དུ་རྗེ་བཙུན་འཇམ་དབྱངས་དང་ཕྱག་ན་རྡོ་རྗེ། ས་ངོར་ཚར་གསུམ། ཚེ་ལྷ་རྣམ་གསུམ། ཀུན་མཁྱེན་རོང་སྟོན། སྒྲོལ་མ་ཉེར་གཅིག་བཅས་ཀྱི་འཇིམ་སྐུ། དཔེ་མཛོད་ཁང་དུ་རྒྱལ་བའི་བཀའ་འགྱུར་དང་བསྟན་འགྱུར། རྒྱུད་སྡེ་ཀུན་བཏུས། སྒྲུབ་ཐབས་ཀུན་བཏུས་བཅས་གྲུབ་མཐའ་རིས་མེད་ཀྱི་གསུང་རབ་གླེགས་བམ་མང་དུ་བཞུགས། དེ་བཞིན་རིན་པོ་ཆེ་མཆོག་གིས་བལ་ཡུལ་དུ་ཡང་ཕྱག་བཏབ་གནང་བ་བཀྲ་ཤིས་རབ་བརྟན་གླིང་བཅས། དེང་སྐབས་གསང་ཆེན་བསྟན་པའི་བདག་པོ་སྐྱབས་རྗེ་བཅོ་བརྒྱད་ཁྲི་ཆེན་རིན་པོ་ཆེ་མཆོག་དང་། རྗེ་བཙུན་ཀུན་དགའ་བསྟན་སྒྲོན། བཅོ་བརྒྱད་ཞབས་དྲུང་སོགས་བླ་སྤྲུལ་རྣམས་ཀྱིས་དབུས་དགོན་པ་ཁག་གཉིས་ཀྱི་དགེ་འདུན་པ་ཞལ་གྲངས་༩༨ ཙམ་གྱིས་གཙོ་བོ་ཚར་ལུགས་རྐང་འཛིན་གྱིས་བརྒྱུད་ལྡན་བླ་མའི་ཕྱག་བཞེས་དང་། ཆོ་ག་ཆོས་སྤྱོད་དང་གཏོར་བཟོ་ཕྱག་ལེན། རང་ལུགས་གཞུང་ཆེན་ཁག་ལ་ཐོས་བསམ་སློབ་གཉེར་གནང་བཞིན་ཡོད་པ་མ་ཟད། སྤྱི་ནོར་༸གོང་ས་༸སྐྱབས་མགོན་ཆེན་པོ་ཆེ་མཆོག་གི་སྐུའི་ཕྱྭའི་ཞབས་རིམ་སྨིན་སྒྲུབ་དང་། རང་ལུགས་བླ་ཆེན་ཁག་གི་འདས་མཆོད་དང་ཟླ་བ་བྱུང་ངོ་ཅོག་གི་ཚེས་བཅུ་རྒྱུན་ཆགས་སུ་གནང་མུས་བཅས་སོ།། །།

༄༅། །ཨེ་ཝཾ་བཤད་སྒྲུབ་ཆོས་འཁོར་གླིང་ནི། རྒན་ངག་དབང་གྲགས་པ་མཆོག་གིས་ཕྱི་ལོ་༡༩༧༤ལོར་རྒྱ་གར་བྱང་ཕྱོགས་ཧི་མཱ་ཅལ་མངའ་ཁོངས་མ་ན་ལི་ས་གནས་སུ་གསར་བཞེངས་གནང་། རྗེས་སུ་དགོན་པ་འདི་ངོར་ཁང་གསར་ངག་དབང་མཁྱེན་བརྩེ་ཐུབ་བསྟན་སྙིང་པོ་མཆོག་ལ་ཕུལ། དེང་སྐབས་སློབ་དཔོན་ངག་དབང་ཚུལ་ཁྲིམས་མཆོག་དབུ་བཞུགས་འོག་སྤི་ཏི་བའི་དགེ་འདུན་པ་ཞལ་གྲངས་༤༨བཞུགས་སོ།།།།

༄༅། །སྐྱེ་དགོན་བརྩེ་ཆེན་བསམ་གྲུབ་གླིང་ནི། བོད་ཡུལ་དུ་མཁན་བདག་ཆེན་རྒྱ་གར་བ་ཤེས་རབ་རྒྱ་མཚོ་སོགས་མཆོད་ཡོན་ཟུང་འབྲེལ་གྱིས་སྐྱེ་རྒུ་དོན་གྲུབ་གླིང་ཞེས་ཕྱག་བཏབ་སྟེ།བོད་ས་མ་ཤོར་གོང་གྲྭ་གྲངས་ཀྱང་༡༢༠༠ལྷག་འདུས་ཏེ་འཕེལ་རྒྱས་བྱུང་། རྒྱ་གར་འཕགས་པའི་ཡུལ་འདིར་ངོར་ཕེན་ཁང་མཁན་རིན་པོ་ཆེ་ངག་དབང་མཁས་གྲུབ་རྒྱ་མཚོ་དང་།ངོར་ཀླུ་ལྡི་མཁན་རིན་པོ་ཆེ་འཇམ་དབྱངས་བསྟན་པའི་ཉི་མ་མཆོག་རྣམ་གཉིས་ཀྱི་བཀའ་འབྲེལ་བཞིན། སྒ་པ་གྲ་འུར་དཔོན་གྱིས་གཙོས་གྲ་འུར་ཞང་པོ་པདྨ་དོན་གྲུབ་ཀྱིས་འགན་ཁུར་ཆེར་བཞེས་ཀྱིས་ཕྱི་ལོ་༡༩༦༦ལོར་རྒྱ་གར་བྱང་ཕྱོགས་ཧི་མཱ་ཅལ་མངའ་སྡེའི་ཀུམ་རའོ་ཞེས་པའི་ས་གནས་སུ་གཙུག་ལག་ཁང་དང་གྲྭ་ཤག་བཅས་གསར་བཞེངས་གནང་།དེང་སྐབས་བླ་མ་དབོན་པོ་༸སྐྱབས་མགོན་ངག་དབང་ཐུབ་བསྟན་ཆོས་ཀྱི་གྲགས་པ་དབུ་བཞུགས་འོག་བླ་སྤྲུལ་དགེ་འདུན་པ་ཞལ་གྲངས་༥༡ཙམ་བཞུགས་སོ།། །།

༄༅། །དཔལ་ས་སྐྱ་མ་དགོན་བཤད་གྲྭ་ཐུབ་བསྟན་རྣམ་རྒྱལ་གླིང་ནི། ༸སྐྱབས་མགོན་ས་སྐྱ་༸གོང་མ་བདག་ཁྲི་རིན་པོ་ཆེ་མཆོག་གིས་ལུང་རྟོགས་ཀྱི་བསྟན་པ་སྤྱི་དང་།དཔལ་ལྡན་ས་སྐྱ་པའི་ཐུན་མིན་གྱི་ཆོ་ག་ཕྱག་ལེན། མདོ་རྒྱུད་བསྟན་བཅོས་འགྲེལ་པ་དང་བཅས་པ་ལ་སྔོན་བྱོན་མཁས་པ་གཅིག་ནས་གཅིག་ཏུ་བརྒྱུད་པའི་བཤད་སྲོལ་བཟང་པོ་དག་མི་ཉམས་ཡུན་གནས་དང་ཉམས་པ་སོར་ཆུད་དུ་དགོངས་ནས་ཕྱི་ལོ་༡༩༨༡ལོར་སྡེ་ར་ལྡུན་ཁུལ་གྱི་སྤུར་ཝ་ལར་ཕྱག་བཏབ། གཙུག་ལག་ཁང་གི་ནང་རྟེན་གཙོ་བོ་ཐུབ་དབང་གི་སྐུ་བརྙན་གསེར་ཟངས་ལས་གྲུབ་པར་༸སྐྱབས་མཆོག་རྡོ་རྗེ་འཆང་དང་༸སྐྱབས་རྗེ་ཀླུ་ལྡིང་མཁན་རིན་པོ་ཆེ་རྣམ་གཉིས་ཀྱིས་གཟུངས་སྒྲུབ་གནད་སྨིན་གནང་ཞིང་། ཕྱི་ལོ་༡༩༨༢ལོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་རིང་ནས་ཇི་ལྟར་གསོལ་བ་བཏབ་པ་བཞིན་བཀའ་དྲིན་ཆིབས་བསྒྱུར་བསྐྱངས་ནས་བདུན་གཅིག་གི་རིང་བཞུགས་ཞག་མཛད་དེ།དད་ལྡན་སེར་སྐྱ་བརྒྱ་ཕྲག་མང་པོའི་ཁམས་དང་མོས་པ་ཇི་ལྟ་བ་བཞིན་དམ་པའི་ཆོས་ཀྱིས་ཚིམ་པར་མཛད།ལྷག་པར་དུ་མ་དགོན་འདིའི་རྟེན་དང་བརྟེན་པ། དེ་བཞིན་ས་སྐྱའི་གཞིས་ཆགས་ལེགས་ཚུགས་ཐུབ་པར་ལེགས་སོས་དབུགས་དབྱུང་མཛད། བོད་ཀྱི་སྔར་བཤད་གྲྭ་ཆེན་པོ་རྣམས་ཀྱི་ལམ་སྲོལ་ལྟར་ཚད་མ་དང་ཕར་ཕྱིན། དབུ་མ་དང་འདུལ་བ། མངོན་པ་བཅས་ཀྱི་གཞུང་གྲགས་ཆེན་བཅོ་བརྒྱད་དུ་གྲགས་པ་དེ་དག་རྩ་བའི་སློབ་ཚན་དང་། དེ་བཞིན་བོད་ཀྱི་བརྡ་དག་སྙན་གསུམ་དང་།རྒྱལ་རབས་ལོ་རྒྱུས། གཞན་ཡང་ཨིན་ཡིག་སོགས་དེང་དུས་ཀྱི་ཤེས་ཡོན་དང་འབྲེལ་བའི་བྱེད་སྒོ་ཁག་གི་རྒྱུན་མ་ཉམས་པར། མཁན་པོ་རིན་ཆེན་མཆོག་དང་།མཁན་པོ་རྒྱ་མཚོ་མཆོགམཁན་པོ་འཇམ་དབྱངས་ཤེས་རབ་མཆོག་སོགས་ཀྱིས་འཆད་རྩོད་རྩོམ་གསུམ་གྱི་སྒོ་ནས་སློབ་མ་རྣམས་བསྐྱངས་ཤིང་རྒྱུད་ལེགས་པ་སྨིན་པར་མཛད། ཕྱི་ལོ་༡༩༨༡ནས་༢༠༠༥བར་བཀའ་བཅུ་པ་གྲངས་༦༨དང་།སློབ་དཔོན་གྲངས་༣༣བཅས་བསླབ་པ་མཐར་སོན་བྱུང་བ་དེ་དག་གིས་རྒྱ་བལ་བོད་བཅས་ཀྱི་དགོན་ཁག་ནང་ཕྱག་ལས་གནང་བཞིན་ཡོད་པ་མ་ཟད། དེང་སྐབས་བོད་རིགས་དང་ལ་དྭགས་པ། སོག་པོ་དང་འབྲུག་པ། བལ་པོ་དང་གློ་པ་བཅས་ནས་དགེ་འདུན་པ་ཞལ་གྲངས་༦༢ཙམ་བཞུགས་པའོ།། །།

༄༅། །ས་ཆེན་སློབ་གྲྭ་ནི། ༸སྐྱབས་རྗེ་ས་སྐྱ་གོང་མ་ཁྲི་འཛིན་༤༡པ་མཆོག་གིས་སྡེ་ར་ལྡུན་བདེ་སྐྱིད་གླིང་བོད་མིའི་གཞིས་ཁོངས་སུ་ཕྱི་ལོ་༢༠༡༥ལོར་འཛུགས་སྐྲུན་དབུ་བཙུགས་ཏེ།ཕྱི་ལོ་༢༠༡༧ལོ་འགོར་ལེགས་གྲུབ་ཟིན།ས་སྐྱ་མཐོ་སློབ་གྱི་ཡན་ལག་ལྟ་བུ་གཞི་རིམ་སློབ་གྲྭ་སྟེ།ལོ་ཆུང་ཚོར་གནའ་དེང་གི་ཤེས་ཡོན་གྱི་རྨང་གཞི་འདིང་ས་གལ་ཆེན་ཞིག་ལ་དམིགས་ཏེ་བཙུགས་པ་ཞིག་ཡིན། གཙོ་བོ་ནང་བསྟན་མཐོ་སློབ་ཁག་དང་ཐད་ཀར་འབྲེལ་བའི་སྔོན་འགྲོའི་སློབ་གྲྭ་ཞིག་ཡིན་པས། སློབ་ཕྲུག་ལོ་ཆུང་ཚོ་དགེ་འདུན་པ་ཤ་སྟག་ཡིན།ཐོག་མར་འགོ་འཛུགས་སྐབས་སུ་སློབ་ཕྲུག་༥༠ཙམ་ཡོད།ལས་བྱེད་སློབ་སྤྱི་དང་།དྲུང་ཡིགདགེ་རྒན།སྨན་ཞབས། གཉེར་པ།མ་མ།མ་བྱན་བཅས་འཐུས་སྒོ་ཚང་བ་ཡོད། སློབ་ཚན་ཁོངས་སུ་བོད་ཀྱི་སྐད་ཡིག་དང་།ཨིན་ཇི། རྒྱ་ཡིགཧིནྡཱི།ཨང་རྩིས།རྒྱལ་རབས་ཆོས་འབྱུང་། ཆོ་ག་ཕྱག་ལེན་བཅས་ཡོད་ཅིང་།འཛིན་གྲྭ་དགུ་པའི་ཤེས་ཚད་དང་མཚུངས་པ་བྱུང་མཚམས་ས་སྐྱ་མཐོ་སློབ་གཙོ་བོར་བྱས་པའི་ནང་བསྟན་མཐོ་སློབ་ཁག་གང་རུང་ལ་འཛུལ་ཞུགས་ཀྱིས་ནང་དོན་རིག་པར་མཐར་ཕྱིན་པ་སྦྱང་རྒྱུའི་གོ་སྐབས་དང་དམིགས་ཡུལ་ཡོད་པ་ཞིག་ཡིན། སློབ་མའི་ལོ་ཚད་ལོ་ལྔ་ནས་བཅོ་ལྔ་བར་ཡིན་ཞིང་སློབ་ཕྲུག་གྲངས་མང་མཐར་༡༥༠ཙམ་སྡོད་སའི་ཁོར་ཡུག་ཡོད་པ་དང་། སློབ་ཡོན་དང་འཚོ་བ་རིན་མེད་ཐོག་འབུལ་བཞིན་ཡོད། དེང་སྐབས་སློབ་ཕྲུག་དགེ་འདུན་པ་ལོ་ཆུང་གྲངས་༡༠༠ལྷག་དང་། ད་ལྟ་འཛིན་གྲྭ་དྲུག་པ་བར་སླེབས་ཡོད།། །།

༄༅། །ས་སྐྱ་གུ་རུ་དགོན་པ་ནི། ཨ་མདོ་བླ་མ་མཆོག་གིས་ཕྱི་ལོ་༡༩༠༩ལོར་ཡུལ་མི་ཚོགས་པ་ནས་འགན་བཞེས་ཀྱིས་གནས་མཆོག་རྡོ་རྗེ་གླིང་ཕྱག་འདེབས་གནང་། ཕྱི་ལོ་༡༩༥༩ལོར་རྒྱ་མིས་བོད་བཙན་བཟུང་བྱས་རྗེས་༸གོང་མ་བདག་ཁྲི་རིན་པོ་ཆེ་མཆོག་རྡོར་གླིང་དུ་དགོན་པ་འདིར་བཞུགས།དགོན་པ་འདི་ནི་བཙན་བྱོལ་དུ་དཔལ་ས་སྐྱ་པའི་དགོན་པ་ཐོག་མ་དེ་ཡིན།སྐབས་དེ་དུས་དགོན་པར་བླ་གྲྭ་༩༠ ཙམ་ཡོད། རྗེས་སུ་༸གོང་མ་བདག་ཁྲི་རིན་པོ་ཆེ་མཆོག་གི་བཀའ་དགོངས་བཞིན་མཁན་ཆེན་སངས་རྒྱས་བསྟན་འཛིན་རིན་པོ་ཆེ་མཁན་པོའི་ཁྲི་འདོན་མཛད་དེ།དགོན་པར་བསྟན་པའི་རྩ་བ་འདུལ་བ་གཞི་གསུམ་གྱི་ཉམས་ལེན་ཏེ།གསོ་སྦྱོང་དང་། དབྱར་གནས།དགག་དབྱེ་བཅས་དུས་ད་ལྟའང་རྒྱུན་ཆད་མེད་པར་གནང་མུས་དང་། ཕྱི་ལོ་༡༩༧༩ལོ་ནས་དགོན་པ་འདི་ཉིད་༸གོང་མ་རིན་པོ་ཆེའི་མཚན་བྱང་ཐོག་རྩིས་འབུལ་ཞུས་ཏེ་མངའ་སྡེའི་གཞུང་ལ་དེབ་སྐྱེལ་ཞུས།

༄༅། །བརྩེ་ཆེན་བསྟན་པའི་དགའ་ཚལ་བཤད་སྒྲུབ་ཆོས་འཁོར་གླིང་ནི། འཁོན་སྟོན་དཀོན་མཆོག་རྒྱལ་པོས་ཕྱི་ལོ་༡༠༧༣ལོར་བོད་གཙང་ཕྱོགས་ས་སྐྱ་རྫོང་ཁོངས་སུ་ཕྱག་བཏབ། རྗེས་སུ་གནས་ཀྱི་མིང་གང་ཟག་ལ་ཐོགས་ཏེ་དཔལ་ས་སྐྱའི་ཆོས་བརྒྱུད་འཕེལ་རྒྱས་བྱུང་། དགོན་པ་འདིར་ཐོག་མའི་ཆར་ལྷོ་བྱང་གཉིས་ཡོད་ཅིང་། ལྷོ་མ་དེ་ས་སྐྱ་གྲུམ་ཆུའི་ལྷོ་ངོས་ཐང་གཤོངས་སུ་ཆགས་ཤིང་། བྱང་མ་དེ་གྲུམ་ཆུའི་བྱང་ངོས་དབོན་པོ་རིའི་འདསབས་སུ་ཆགས་ཡོད། ལྷག་པར་དུ་འགྲོ་མགོན་ཆོས་རྒྱལ་འཕགས་པའི་སྐུ་རིང་ལ་དཔོན་ཆེན་ཤཱཀྱ་བཟང་པོས་ཕྱི་ལོ་ ༡༢༦༨ ལོར་ས་སྐྱའི་ལྷ་ཁང་ཆེན་མོ་གསར་བཞེངས་མཛད་ཅིང་བཤད་སྒྲུབ་ཀྱི་འོད་སྣང་ཕྱོགས་སུ་ཁྱབ་ནའང་། ཕྱི་ལོ་ ༡༩༥༩ ལོ་དང་ལྷག་པར་དུ་རིག་གནས་གསར་བརྗེའི་དུས་ངན་ནང་རྒྱ་དམར་གྱིས་གཏོར་བཤིག་ཚབས་ཆེན་བཏང་སྟེ་མིང་གི་ལྷག་མར་གྱུར་ཀྱང་། དེང་སྐབས་བོད་མིས་ཉམས་གསོ་གནང་དང་གནང་མུས་སུ་མཆིས། ཕྱི་ལོ་ ༡༩༥༩ ལོར་བོད་གཞིས་བྱེས་གཉིས་སུ་གྱེས་རྗེས་རྒྱ་གར་འཕགས་པའི་ཡུལ་འདིར་༸སྐྱབས་མགོན་༸གོང་མ་ཁྲི་འཛིན་ཞེ་གཅིག་པ་ཆེན་པོ་མཆོག་གིས་ཕྱི་ལོ་༡༩༦༤ལོར་རྒྱ་གར་ཨུཏྟར་ཁནྜའི་མངའ་སྡེའི་ཁོངས་རཱཛ་པུར་ས་གནས་སུ་ཕྱག་བཏབ། བོད་དང་བལ་པོ། མོན་པ་དང་སོག་པོ། འབྲུག་པ་དང་རྒྱ་གར་བ། ཁུ་ནུ་བ་དང་ཕྱི་རྒྱལ་བ་བཅས་ནས་དགེ་འདུན་པ་ཞལ་གྲངས་ ༢༣༧ གྱིས་དཔལ་ལྡན་ས་སྐྱ་པའི་རང་ལུགས་དྲི་མ་མེད་པར་སློབ་གཉེར་གནང་དང་གནང་མུས་ཀྱི་སྐབས་སོ།། །།

༄༅།།རྫོང་སར་བཤད་གྲྭ་ཆོས་ཀྱི་བློ་གྲོས་ནི།བོད་དུ་མཆོག་གྱུར་བདེ་ཆེན་གླིང་པ་དང་མཁྱེན་བརྩེ་དབང་པོ་རྣམ་གཉིས་ལ་ལུང་བསྟན་བྱུང་བ་ལྟར།མདོ་ཁམས་རྫོང་སར་བཀྲ་ཤིས་ལྷ་རྩེ་རུ་འཇམ་དབྱངས་ཆོས་ཀྱི་བློ་གྲོས་ཀྱིས་ཕྱི་ལོ་༡༩༡༨ལོར་རྒྱ་བསྐྱེད་གནང་བ་དེར་ཁམས་བྱེ་བཤད་གྲྭ་ཞེས་གྲགས་ཤིང་བོད་ས་མ་ཤོར་བར་དུ་བསྐྱངས།རྒྱ་གར་འཕགས་པའི་ཡུལ་འདིར་མཁྱེན་བརྩེ་སྐུ་ཕྲེང་གསུམ་པ་འཇམ་དབྱངས་ཐུབ་བསྟན་ཆོས་ཀྱི་རྒྱ་མཚོས་ཕྱི་ལོ་༡༩༨༣ལོར་འབྲས་མོ་ལྗོངས་ཀྱི་དབེན་གནས་སུ་དགོན་པ་ཕྱག་བཏབ།བོད་ནས་མཁན་རིན་པོ་ཆེ་ཀུན་དགའ་དབང་ཕྱུག་མཆོག་གདན་དྲངས་ཏེ་མཁན་རབས་གོང་མ་རྣམ་པའི་ཞལ་རྒྱུན་དང་རྫོང་སར་ཁམས་བྱེའི་སྔོན་གྱི་ཕྱག་ལེན་རྣམས་མ་འཛོལ་བའི་ཐོག་ནས་དཔེ་ཁྲིད་ཀྱི་རྒྱུན་བསྐྱངས།ཕྱི་ལོ་༡༩༨༥ལོར་མཁྱེན་བརྩེ་རིན་པོ་ཆེའི་ཐུགས་དགོངས་དང་མཐུན་པ་གནང་སྟེ་རྒྱ་གར་ཧི་མཱ་ཅལ་མངའ་ཁོངས་སྦིར་སྡེ་དགེའི་གཞིས་ཆགས་སུ་གནས་སྤོས་ཀྱིས་ཕྱི་ལོ་༢༠༠༤བར་གཞུང་ཆེན་ཁག་ལ་འཆད་ཉན་མ་ཉམས་པར་མཛད།སྐབས་དེ་དུས་ཀྱི་བཤད་གྲྭའི་མཚན་ལ་རྫོང་སར་བཤད་གྲྭ་སྐལ་བཟང་ཆོས་ཀྱི་དགའ་ཚལ་ཞེས་ཐོགས། དེ་ནས་ཕྱི་ལོ་༢༠༠༤ལོར་ཅོན་ཏ་རའི་ས་གནས་སུ་གནས་སྤོས་ཀྱིས་ཐོག་མའི་དབུ་འབྱེད་རྟེན་འབྲེལ་གྱི་མཛད་སྒོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གདན་ཞུས་ཀྱིས་ཆིབས་བསྒྱུར་དང་གསུང་ཆོས་བཀའ་དྲིན་བསྐྱངས།རིམ་བཞིན་རྒྱ་བསྐྱེད་དང་བཅས་བཤད་གྲྭའི་མཚན་ལ་རྫོང་སར་བཤད་གྲྭ་ཆོས་ཀྱི་བློ་གྲོས་ཞེས་གསོལ། སྐུ་གསུང་ཐུགས་གསུམ་གྱི་རྟེན་ལས་དང་པོ་སྐུ་ཡི་རྟེན་ནི།བཤད་གྲྭའི་གཙུག་ལག་སྐལ་བཟང་ཆོས་ཀྱི་འབྱུང་གནས་ནང་དུ་བཞུགས་པའི་རྟེན་གཙོ་མཉམ་མེད་ཤཱཀྱ་ཐུབ་པ་ལ་འཁོར་སངས་རྒྱས་བརྒྱ་དང་བཅུ་གཅིག་གིས་བསྐོར་ཡོད་པ་སྔོན་བདག་ཅག་གི་སྟོན་པས་གནས་བྱ་རྒོད་ཕུང་པོའི་རི་བོར་ཤེར་ཕྱིན་གྱི་མདོ་སྡེ་གསུངས་པའི་སྐབས་ཀྱི་གླེང་གཞི་དང་མཐུན་པར་བཞེངས་གནང་ཡོད་ཅིང་།དེའི་གཡས་གཡོན་གཉིས་སུ་རྗེ་བཙུན་འཇམ་དཔལ་དབྱངས་དང་།འཕགས་པ་སྤྱན་རས་གཟིགས་ཀྱི་སྐུ་འདྲ་རེ་བཞེངས་སྟབས་སུ་ཡོད་པ།ལྷ་ཁང་གི་གཡས་གཡོན་གྱི་གྱང་ངོས་སུ་མཁྱེན་བརྩེ་ཆོས་ཀྱི་བློ་གྲོས་ཀྱི་དག་སྣང་འཁྲུངས་རབས་རྣམ་པར་ཐར་པ་ཐང་གའི་རྣམ་པར་བཞུགས་ཡོད། གཉིས་པ་གསུང་གི་རྟེན་ལ།དཔེ་མཛོད་བཀྲ་ཤིས་སྒོ་མང་དུ་གཙོ་བོ་རྒྱན་དྲུག་མཆོག་གཉིས་ཀྱིས་མཛད་པའི་རྒྱ་གཞུང་ཁག་དང་།ཆོས་བརྒྱུད་ཆེན་པོ་ཁག་གི་མཁས་གྲུབ་རྣམས་ཀྱིས་མཛད་པའི་གཞུང་འགྲེལ་དང་།དེ་བཞིན་རྒྱལ་རབས་དང་ལོ་རྒྱུས་སོགས་ཀྱི་དཔེ་ཚོགས་གྲངས་ལས་འདས་པ་བཞུགས་ཡོད་ཅིང་།ལྷ་ཁང་གི་ཐོག་བརྩེགས་བཞི་པར་རྒྱལ་བའི་བཀའ་འགྱུར་དང་བསྟན་འགྱུར་ཚར་གྲངས་དུ་མ་བཞུགས་ཡོད། གསུམ་པ་ཐུགས་ཀྱི་རྟེན་ལ།ལྷ་ཁང་ནང་ངོས་ཀྱི་གཡོན་ཕྱོགས་སུ་སྐུ་རྒྱུ་གསེར་ཟངས་ལས་གྲུབ་པའི་མཁན་ཆེན་ཀུན་དགའ་དབང་ཕྱུག་མཆོག་གི་སྐུ་གདུང་མཆོད་རྟེན་ཞིག་དང་།ལྷ་ཁང་གི་ཕྱི་རོལ་གྱི་གཡས་ཕྱོགས་སུ་མཁྱེན་བརྩེ་ཆོས་ཀྱི་བློ་གྲོས་ཀྱི་སྐུ་གདུང་མཆོད་རྟེན་དང་།མཁན་ཆེན་ཀུན་དགའ་དབང་ཕྱུག་རིིན་པོ་ཆེའི་སྐུ་གདུང་མཆོད་རྟེན་གཉིས་འགྱིང་ངེར་བཞུགས་ཡོད་ཅིང་།ལྷ་ཁང་གི་ཕྱི་རོལ་གྱི་གཡོན་ཕྱོགས་སུ་རྡོ་རྗེ་གདན་གྱི་བྱང་ཆུབ་ཤིང་གི་ཡལ་གའི་རྩ་བ་ལ་བརྟེན་ནས་སྐྱེས་པའི་བྱང་ཆུབ་ལྗོན་ཤིང་འཁྲུལ་མེད་བཅས་བཞུགས་ཡོད། མཁན་ཆེན་ཀུན་དགའ་དབང་ཕྱུག་གི་གསུང་ལས་སྐྱེས་པའི་མཁན་དགེ་རྣམ་པས་འཆད་ཁྲིད་ཀྱི་ཐུགས་འགན་བཞེས་ཏེ།བོད་རིགས་དང་།རྒྱ་གར་བ།ལ་དྭགས་པ།བལ་པོ་སོགས་ནས་ད་བར་སློབ་གཉེར་བ་ཞལ་གྲངས་སྟོང་ཕྲག་མང་པོར་གཞུང་ཆེན་བཅུ་གསུམ་དང་གྲགས་ཆེན་བཅོ་བརྒྱད་ཀྱིས་མཚོན་པའི་མདོ་སྔགས་རིག་གནས་དང་བཅས་པར་འཆད་ཉན་སློབ་གཉེར་གནང་ཡོད་པ་མ་ཟད།འདི་ནས་སློབ་ཐོན་ཟིན་པའི་མཁན་པོ་དང་དགེ་རྒན་བརྒྱ་ཕྲག་མང་པོས་དགོན་ཁག་གཞན་སོ་སོར་འཆད་ཁྲིད་གནང་དང་གནང་མུས་དང་།ད་ལྟའི་ཆར་དགེ་འདུན་ཞལ་གྲངས་༥༧༨གྱིས་བརྩོན་པ་ཆེན་པོས་མདོ་སྔགས་རིག་གནས་དང་བཅས་པར་སློབ་གཉེར་གནང་མུས་ཡིན།།།།

༄༅།།འབྲི་རུ་བསམ་འགྲུབ་བདེ་ཆེན་ཆོས་འཁོར་གླིང་ནི། ཕྱི་ལོ་ ༡༦༤༥ ལོར་གའུ་ཤེས་རབ་རྒྱ་མཚོ་དང་། མདོ་དག་སྨོན་ལམ་རྒྱ་མཚོ། ཨ་ཁུ་མར་ཞུ་རྒྱ་མཚོ་བཅས་ཀྱིས་ནག་ཆུ་འབྲི་རུ་རྫོང་ཁོངས་སུ་ཕྱག་བཏབ་པའི་བོད་ཀྱི་དགོན་པ་རྙིང་པ་ཞིག་ཡིན། ཕྱི་ལོ་༡༩༥༩ལོར་རྒྱ་ནག་གིས་བོད་ས་བཙན་བཟུང་བྱས་ཏེ་དགོན་སྡེ་གཏོར་བརླག་བཏང་བས་བླ་གྲྭ་རྣམས་ཁ་འཐོར་དུ་སོང་།དགོན་པའི་བསྟན་བདག་གདུང་བརྒྱུད་སྐུ་ཕྲེང་དྲུག་པ་དང་རྒྱལ་སྲས་སྐུ་ཕྲེང་བདུན་པ་གཉིས་ཕྱི་ལོ་༡༩༥༨དང་༡༩༥༩ལོར་རིམ་བཞིན་བལ་ཡུལ་དུ་བཙན་བྱོལ་དུ་ཕེབས།ལོ་གཉིས་རྗེས་སུ་གདུང་བརྒྱུད་སྤྲུལ་སྐུ་བལ་ཡུལ་གློ་བོའི་ཁུལ་དུ་སྐུ་མྱ་ངན་ལས་འདས།རིང་མིན་རྒྱལ་སྲས་སྤྲུལ་སྐུ་བལ་ཡུལ་ནས་རྒྱ་གར་དུ་ཕེབས་རྒྱུའི་ཐུགས་ཐག་བཅད་དེ་ཕྱི་ལོ་༡༩༦༠ལོར་རྒྱ་གར་དུ་ཕེབས།དེ་དང་དུས་མཚུངས་སུ་བོད་འབྲི་རུ་མ་དགོན་གྱི་དགེ་འདུན་སྐུ་བགྲེས་ཁག་གཅིག་བཙན་བྱོལ་དུ་འབྱོར་ཏེ། རྒྱལ་སྲས་རིན་པོ་ཆེ་དང་ཁོང་གི་ཡོངས་འཛིན་ཆོས་འབྱུང་ལགས་གཉིས་དང་དགེ་འདུན་པ་རྣམས་ལྷན་འཛོམས་ཐུབ་པ་བྱུང་། ལོ་ངོ་གཉིས་ཙམ་རིང་བླ་སློབ་ལྷན་རྒྱས་རཱཛ་པུར་དཔལ་ས་སྐྱའི་ཆོས་སྒར་དུ་བཞུགས།དེའི་རྗེས་སུ་༸དཔལ་ས་སྐྱའི་༸སྐྱབས་མགོན་གོང་མ་ཁྲི་ཆེན་ཞེ་གཅིག་པ་མཆོག་གི་བཀའ་སློབ་ལམ་སྟོན་ལྟར། རྒྱ་གར་བྱང་ཕྱོགས་ཧི་མཱ་ཅལ་མངའ་ཁུལ་སྦིར་གཞིས་ཆགས་སུ་སངས་རྒྱས་ཀྱི་བསྟན་པ་ཉམས་པ་སླར་གསོ་དང་མི་ཉམས་གོང་འཕེལ་ཆེད་དུ་དམིགས་ཏེ་ཆོས་ཚོགས་ཤིག་འཛུགས་རྒྱུའི་ཐུགས་ཐག་བཅད།ཆོས་ཚོགས་ལ་དམིགས་ཏེ་དགེ་འདུན་པ་རྣམས་ཀྱིས་ཐབས་ཤེས་གང་ཡོད་ཀྱིས་སྒོར་མོ་བརྒྱ་རེ་བསྡུ་རུབ་བྱས་ནས་ཆོས་ཚོགས་ཀྱི་བསྟན་རྩ་ཐོག་མ་དེ་གསོག་སྒྲུབ་གནང་།བླ་གྲྭ་རྣམས་སེམས་ཞུམ་པ་མེད་པར་བློ་སྟོབས་བསྐྱེད་དེ་དགོན་པ་གསར་བཞེངས་ཀྱི་ཆེད་དུ་དམིགས་ནས་འགའ་ཤས་མོ་ཊའི་ལམ་བཟོ་བ་དང་།འགའ་ཤས་དགུན་ཚོང་དང་།གཞན་གྱིས་གྲུམ་གདན་བཙོངས་ཏེ་དཔལ་འབྱོར་མཁོ་སྒྲུབ་བྱས་ཤིང་།ཐོག་མར་དགོན་པའི་གཙུག་ལག་ཁང་བཞེངས།རིམ་བཞིན་དགོན་པར་གྲྭ་གཞོན་གསར་པ་ཡང་བསྡུ་རུབ་བྱས་ཏེ་གྲྭ་རྒྱུན་སྤེལ། སྐབས་སུ་བབས་པའི་དགོན་པའི་བསྟན་བདག་ནི།རྒྱལ་སྲས་སྤྲུལ་སྐུ་དང་། གདུང་བརྒྱུད་སྤྲུལ་སྐུ།ཕུར་བླ་སྤྲུལ་སྐུ།མཁན་པོ་ལུང་རིགས་སེངྒེ་། རྡོ་རྗེ་སློབ་དཔོན་ཉི་མ་རྣམ་རྒྱལ་བཅས་ཡིན། འདུ་ཁང་གི་ནང་རྟེན་གཙོ་བོ་སྟོན་པ་གཙོ་འཁོར་གསུམ་དང་། སྒྲོལ་མ་ཉེར་གཅིག སྟོན་པའི་སྐུ་ཆུང་བ་བརྒྱ་རྩ། གུར་མགོན་ལྷ་བརྒྱད། དཔལ་མགོན་ཞལ་བཞི་པ། དམག་ཟོར་མ་བཅས་ཀྱི་སྐུ་བརྙན་དང་། གསུང་རྟེན་རྒྱལ་བའི་བཀའ་འགྱུར་དང་རྒྱུད་སྡེ་ཀུན་འདུས། སྒྲུབ་ཐབས་ཀུན་འདུས། གཞུང་ཆེན་བཅུ་གསུམ་སོགས་རང་ལུགས་གསུང་རབ་གླེགས་བམ་བརྒྱ་ཕྲག་དུ་མ་དང་། ཐུགས་རྟེན་མཆོག་སྤྲུལ་གོང་མ་རྣམས་ཀྱི་སྐུ་གདུང་མཆོད་རྟེན་བཅས་མཆོད་རྫས་སྣ་ཚོགས་བཞུགས་ཡོད། དགོན་པའི་ཁྱབ་ཁོངས་སུ་གཙོ་བོ་ཚོགས་གྲྭ་དང་། སློབ་གྲྭ།མཚམས་ཁང་བཅས་གསུམ་ཡོད།དང་པོ་ཚོགས་གྲྭའི་ཆོས་ཀྱི་བྱེད་སྒོ་གཙོ་བོ་ནི།བསྟན་འགྲོ་སྤྱིའི་རིམ་གྲོར་འདུལ་བ་གཞི་གསུམ་གྱི་ཕྱག་ལེན་གཞིར་བཟུང་གིས་ལོ་ལྟར་དབྱར་གནས་ཟླ་བ་གཅིག་དང་ཕྱེད་ཀའི་རིང་གནས་རྒྱུ་དང་།དེ་བཞིན་ངོར་ལུགས་དཀྱིལ་འཁོར་བདུན་ལས་དཔལ་ཀྱཻ་རྡོ་རྗེའི་སྒྲུབ་ཆེན།གསང་འདུས་ཀྱི་སྒྲུབ་ཆེན།འཁོར་ལོ་བདེ་མཆོག་གི་སྒྲུབ་ཆེན།ངན་སོང་སྦྱོང་རྒྱུད་ཀུན་རིག་གི་སྒྲུབ་ཆེན།ཕུར་པའི་སྒྲུབ་ཆེན་བཅས་སྒྲུབ་ཆེན་ལྔ་ལོ་ལྟར་ཆད་མེད་འཚོགས་མུས་ལགས། དགུ་ཆུང་དང་དགུ་ཆེན་དུ་རིམ་བཞིན་གདུགས་དཀར་དང་འཇིགས་བྱེད་དང་སྒྲོལ་མ་གཡུལ་ཟློག་འཚོགས་པ་དང་།དེ་བཞིན་ཉིན་ལྟར་སྒྲོལ་ཆོག་ཆད་མེད་དང་།ཚེས་བཅུ་དང་ཉེར་ལྔ་རྣམས་སུ་རྣལ་འབྱོར་མཁའ་སྤྱོད་མའི་ཆོ་གའི་སྒོ་ནས་ཚོགས་མཆོད་གཏོང་སྲོལ་ཡོད།ལོ་ལྟར་གཞིས་ཆགས་ཀྱི་མི་སེར་རྣམས་ཀྱི་བསོད་ནམས་གསོག་པའི་ཆེད་དུ་དམིགས་ནས་མ་ཎི་དུང་སྒྲུབ་དང་ས་ག་ཟླ་བའི་སྐབས་སུ་སྨྱུང་གནས་ཆ་གཉིས་འཚོགས་སྲོལ་ཡོད་པ་དང་།མི་མང་སྒེར་གྱི་ཞབས་རིམ་ཆེ་ཕྲ་གང་ཡོད་རྣམས་ཀྱང་སྒྲུབ་བཞིན་ཡོད། གཉིས་པ་སློབ་གྲྭའི་བྱེད་སྒོ་ནི།ད་ཆ་སློབ་གྲྭར་སློབ་ཕྲུག་བཞི་བཅུ་ལྷག་ཡོད་པ་དང་དགེ་རྒན་ལྔ་ཡོད་ཅིང་། དེ་དག་གིས་ཉིན་རེའི་སློབ་ཚན་དུ་ནང་ཆོས་དང་།ཆོས་འབྱུང་།ཆོ་ག་ཕྱག་ལེན།བོད་ཡིག ཨིན་ཡིགཧིནྡཱི། རི་མོ་བཅས་སློབ་ཀྱི་ཡོད། གསུམ་པ་སྒྲུབ་ཁང་ནི། གཉིས་ཡོད་པ་ལས་གཅིག་ནི་དགོན་པའི་ཉེ་འདབས་ལ་ཡོད་པ་དང་། གཉིས་པ་ནི་ཅོན་ཏ་རའི་གཞིས་ཆགས་ཀྱི་ཉེ་འགྲམ་དུ་ཡོད།ད་བར་མཚམས་པ་སྐྱ་སེར་མང་པོས་དེར་བསྙེན་མཚམས་བཞུགས་ཡོད་པ་དང་།དེ་དག་ལས་གྲུབ་རྟགས་ཐོན་པའང་འགའ་ཤས་བྱུང་ཡོད་པར་གྲགས། སྒོམ་སྒྲུབ་དང་མཚམས་བསྙེན་སྒྲུབ་ཀྱི་ཕྱིར་དུ་ཕེབས་པའི་སྐྱ་སེར་ཕོ་མོ་སུ་ཡིན་ཡང་མཚམས་ཁང་དུ་བཞུགས་ཆོག་ཅིང་ཞལ་ལག་དང་མཚམས་གཡོག་གི་མཐུན་རྐྱེན་ཡང་སྦྱོར་གྱི་ཡོད། ད་ལྟའི་གཙུག་ལག་ཁང་རྟེན་དང་བརྟེན་པ་བཅས་དང་།མགོན་ཁང་།དཔེ་མཛོད་ཁང་།དགེ་འདུན་པའི་བཞུགས་ཤག་སོགས་འཛུགས་སྐྲུན་གནང་ཐུབ་པ་དེ་དག་ནི་དམ་པ་གོང་མ་རྣམས་ཀྱིས་ཉིན་མཚན་དབྱེར་མེད་ལྷག་བསམ་དང་ཕུགས་བསམ་གྱི་སྒོ་ནས་སྐུ་ལས་རྒྱ་ཆེར་བསྐྱོན་པའི་བཀའ་དྲིན་ཉག་གཅིག་ལ་བརྟེན་ནས་བྱུང་བ་ཡིན་ནོ།། །།