༄༅། །རྒན་རབས་རྣམས་ཀྱིས་ལོ་རྒྱུས་གསུང་ཚུལ་ལ། སྔོན་རུ་ཐོག་དབང་ལ་ཟེར་བ་ཞིག་གིས་དགོན་པའི་སྦྱིན་བདག་བྱེད་སྲོལ་ཡོད་པ་དང་། ཨང་པ་གྲོང་པ་བདུན་ཞེས་ཀྱང་གྲགས། བླ་མ་ནི་འབྲུག་པ་ཀུན་ལེགས་དང༌། དགེ་ལུགས་ཀྱི་བླ་མ་ཡོན་ཏན་རྒྱ་མཚོ་ཟེར་བ་གཉིས་མཉམ་རུབ་ཐོག་བཞེངས་ཚུལ་བཤད། དགོན་པའི་ནང་རྟེན་གཙོ་བོ་ྋརྒྱལ་བ་བྱམས་པའི་སྐུ་ཐོག་ཚད་མ་གཅིག་དང་། རྗེ་ཡབ་སྲས་གསུམ། ཐུབ་པའི་སྐུ། ཡི་དམ་ནི་རྡོ་རྗེ་འཇིགས་བྱེད་ཡིན། དགོན་པ་འདི་བཞེངས་གྲུབ་མཚམས་དགོན་བདག་དགེ་ལུགས་བྱེད་དང༌། འབྲུག་པས་བྱེད་ཐག་མ་ཆོད་པར་བརྟེན། སུས་རབ་གནས་འབུལ་སྔ་བ་དེས་དགོན་བདག་བྱེད་རྒྱུ་ཞལ་མཐུན་བྱུང་བ་ལྟར། ཡོན་ཏན་རྒྱ་མཚོས་རྫུ་འཕྲུལ་ཐོག་རབ་གནས་སྔོན་དུ་གནང་བས་ཡོངས་གྲགས་དགོན་བདག་དགེ་ལུགས་པས་བྱེད། རྗེས་སུ་རྒྱལ་པོ་དགའ་ལྡན་ཚེ་དབང་གིས་མངའ་དབང་བསྒྱུར་ནས་སེར་བྱེས་གྲྭ་ཚང་ནས་དགོན་པའི་འཛིན་སྐྱོང་ཆེད་མཁན་ཕྱག་གཉིས་བཏང་བ་ནས་སེར་བྱེས་ཀྱི་ཁོངས་སུ་གཏོགས་ཤིང༌། སེར་བྱེས་ནས་གཏོང་གནང་མཛད་པའི་མཁན་པོ་དང་ཕྱག་མཛོད་ལ་རུ་ཐོག་བླ་བྲང་ཟེར། ཐོག་མའི་ཆར་དགོན་པ་འདི་ལ་དགོན་པ་ཤར་དང་། དགོན་པ་ནུབ། དགོན་པ་རབ་བརྟན། དགོན་པ་ཁ་དཀར། ལྷ་ཁང་བཅས་དགོན་ཁག་ལྔ་བྱུང་ཡོད། བོད་དུ་དུས་འགྱུར་མ་བྱུང་བའི་སྔོན་ལ་དགོན་པ་འདིར་དགེ་འདུན་ཞལ་གྲངས་༡༦༠ལྷག་ཙམ་ཡོད་པ་དང༌། མཁན་པོ་དང་དབུ་མཛད། བྱང་འདྲེན། དགེ་བསྐོས་ཆེ་ཆུང་གཉིས་དང་ཇ་མ་གཉིས་བཅས་ཡོད། རིག་གནས་གསར་བརྗེའི་སྐབས་སུ་དགོན་པ་ཕྱི་ནང་ཡོངས་རྫོགས་རྩ་གཏོར་བཏང་བ་དང༌། ཕྱི་ལོ་༡༩༨༧ལོ་ནས་བཟུང་དགེ་སློང་བློ་བཟང་བསྟན་པ་དང་རུ་ཐོག་སྲིད་གྲོས་ཀྱི་སྐལ་བཟང་དབང་ཕྱུག་སོགས་ཀྱིས་གཙོས་སླར་ཡང་གསར་བཞེངས་ཉམས་གསོ་བྱེད་འགོ་བཙུགས། ༡༩༩༠ལོར་དངོས་སུ་བཞེངས་གྲུབ་པ་དང་སྐུ་འདྲ་གཏོར་བཤིག་ཐེབས་པ་རྣམས་བསྐྱར་གསོ་དང་གཟུངས་གཞུག་ཕུལ་བ་སོགས་དཀའ་ངལ་ཁྱད་བསད་གནང་མཐར། དད་ལྡན་སེར་སྐྱ་མི་དམངས་ཀྱི་དད་པའི་རྟེན་དུ་སླར་ཡང་ཆོས་ཀྱི་སྒོ་མོ་ཕྱེ། གྲྭ་ཤག་གསུམ་དང་། དགོན་པའི་མཛོད་ཁང་ཡང་གསར་བཞེངས་བྱས། ཕྱི་ལོ་༡༩༥༩ལོར་བོད་དུ་དུས་འགྱུར་བྱུང་རྗེས་དགེ་སློང་བློ་བཟང་བསྟན་འཛིན་དང༌། བློ་བཟང་འཕེལ་གྲུབ། ཐུབ་བསྟན་ཕུན་ཚོགས་ཁོང་གསུམ་གཙོ་བོ་བྱས་ནས་ཕྱི་ལོ་༡༩༨༥ལོར་ལ་དྭགས་བསོད་ནམས་གླིང་གཞིས་ཆགས་སུ་ལྷ་ཁང་ཆུང་ཆུང་ཞིག་གསར་དུ་བཞེངས་ཡོད་ཀྱང༌། ད་སྐབས་མ་དགོན་སེར་བྱེས་མཁས་སྙན་གྲྭ་ཚང་ནས་བཏང་བའི་མཁན་པོ་བྱམས་པ་རྒྱ་མཚོས་གཙོས་དགེ་འདུན་བོད་རིགས་ཞལ་གྲངས་༡༧ཙམ་བཞུགས་པ་རྣམས་ལ་འདུ་ཁང་ཆུང་བས་དཀའ་ངལ་ཡོད་ནའང་གཙོ་ཆེ་རི་བོ་དགེ་ལྡན་གྱིས་བཅའ་ཡིག་ཆེན་མོ་གཞིར་བཟུང་དང༌། ཁྱད་པར་དུ་མ་དགོན་སེར་བྱེས་གྲྭ་ཚང་སྒྲིག་གཞི་ལྟར་ཕྱག་བསྟར་ཞུ་མུས་ཐོགལྷག་པར་དུ་ལྷ་སྲུང་བསྟེན་ཕྱོགས་སྐོར་ལ་ྋརྒྱལ་བའི་བཀའ་བཞིན་སྙིང་བཅངས་ཐོག་བཀའ་དགོངས་འགལ་མེད་དམ་གཙང་ཡིན་པ་མ་ཟད། ས་གནས་སུ་བོད་མི་དང༌། ཡུལ་མི་མང་ཚོགས་ལ་འབྱུང་འགྱུར་ཆོས་ཀྱི་གོ་རྟོགས་ཡོང་ཆེད་འབད་བརྩོན་ཞུས་དང་ཞུ་མུས་ཡིན། ། ། །

༄༅།།ལྷོ་བྲག་དགའ་ལྡན་དོན་གཉིས་གླིང་ནི། ཕྱི་ལོ་ ༡༦༤༩ ལོར་ྋགོང་ས་ལྔ་པ་ཆེན་པོ་མཆོག་གིས་ཕྱག་བཏབ་པའི་བོད་ཀྱི་དགོན་པ་འདུ་གླིང་བཅུ་གསུམ་གྱི་གྲས་ཀྱི་དགོན་རྙིང་ཞིག་ཡིན། དགོན་པ་ཆགས་ཡུལ་བོད་ཀྱི་རྒྱལ་ས་ལྷ་སའི་ལྷོ་ཕྱོགས་ཀྱི་ལྷོ་བྲག་དུ་བ་རྫོང་ཁོངས་ཀྱི་རྫོང་གཤམ་རི་གླང་ཆེན་གཟུགས་ཅན་ལྷ་ཁང་སྟེང་ཞེས་པའི་རིར་ཆགས་ཡོད། བོད་དུ་རྒྱ་དམར་གྱིས་བཙན་གནོན་དུས་འགྱུར་མ་བྱུང་གོང་དགོན་པ་དེའི་ནང་སྔར་སྲོལ་དགེ་འདུན་ ༣༠༠ ཙམ་ཡིན་ཡང་རྟག་བཞུགས་གྲྭ་རྒྱུན་གྲངས་ ༡༧༠ ཙམ་ཡོད་པ་དང༌། དགོན་པ་དེ་ནས་གཞུང་ཆེན་བཀའ་པོད་ལྔ་དང༌། མདོ་སྔགས་ལ་མཁས་ཤིང་གྲུབ་པ་བརྙེས་པའི་མཁས་གྲུབ་ཀྱི་སྐྱེས་བུ་དམ་པ་གྲངས་མེད་བྱོན་ཡོད། འོན་ཀྱང་ཕྱི་ལོ་ ༡༩༥༨ ལོར་བཙན་རྒྱལ་རྒྱ་དམར་དམག་དཔུང་གིས་བོད་ས་ཡོངས་རྫོགས་ཧམ་ཟོས་བྱེད་སྐབས་རང་དགོན་གྱི་དགེ་འདུན་བཞི་དམར་གསོད་དང་གཞན་གང་མང་རྨས་སྐྱོན་ཚབས་ཆེན་བཏང་བར་བཟོད་སྒོམ་ཐུབ་བྲལ་འུ་ཐུག་ཐབས་ཟད་ཀྱིས་དགའ་ལྡན་བྱང་རྩེ་གྲྭ་ཚང་བརྒྱུད་དཔལ་ལྡན་གཞུང་ས་དགའ་ལྡན་ཕོ་བྲང་ཆེན་པོའི་རྒྱལ་ས་ལྷ་སར་མི་དབང་ས་སྐྱོང་བཀའ་ཤག་ལྷན་རྒྱས་མཆོག་ལ་བདེ་སྡུག་སྙན་སེང་ཞུ་རྒྱུ་དང༌། རྩེ་ཕོ་བྲང་འགག་ཏུ་བཅར་རྒྱུའི་འཐུས་མི་༩ཁོངས་སུ་རྒྱལ་ཁབ་ཏུ་སྙན་བཅར་ཞུས་ཏེ་མཐའ་མའི་བཀའ་དཔྱད་བཟང་ཕེབས་དགོངས་དོན་ལྷོ་ཁུལ་རྩེ་ཐང་ཕུད། དེ་མིན་ལྷོ་ཁ་རྫོང་༡༨ནང་རྒྱ་དམར་གཅིག་ཀྱང་མེད་པར་གཙང་གནས་ཐུབ་པ་བྱུང་བ་ནི་སྐབས་དེར་གཞུང་ས་ཆེན་པོའི་མཛད་བྱུས་ཡིན། འོན་ཀྱང་རྒྱ་དམར་གྱིས་མུ་མཐུད་བཙན་འཛུལ་བྱས་སྟབས་ ༡༩༥༨ ལོར་ལྕགས་ཚ་གྲི་གུ་ཐང་དུ་བོད་ཆོལ་གསུམ་བསྟན་སྲུང་དང་བླངས་དམག་སྒར་ཚུགས་རྗེས་གུས་ཚོ་དོན་གཉིས་གླིང་དགོན་གྲྭ་ ༡༨ བསྟན་སྲུང་དམག་ཁོངས་སུ་བསྐྱོད་ཀྱང་། བོད་སྤྱིའི་སྐུ་གེགས་རྐྱེན་དབང་གིས་ ༡༩༥༩ ལོར་བོད་ཡོངས་རྫོགས་རྒྱ་དམག་གིས་དྲག་པོས་དབང་འཛིན་བྱས་ཏེ་བོད་རྒྱལ་ཁབ་ཡོངས་ཀྱི་ཆོས་དང་རིག་གཞུང་དགོན་པ་སྟོང་ཕྲག་དྲུག་ལྷག་རྩ་གཏོར་བཏང་བ་དང༌། དགོན་པ་འདི་ལ་ཡང་སྐབས་དེར་གཏོར་བཅོམ་ཚབས་ཆེར་ཐེབས་ཏེ་ཤུལ་མེད་དུ་བཟོས་པས་ཤུལ་གནས་གང་ཡིན་ཡང་ངོས་འཛིན་བྱེད་མི་ཐུབ་པའི་གནས་སུ་གྱུར། ཕྱི་ལོ་ ༡༩༥༩ ལོར་ྋ་གོང་ས་མཆོག་གཙོས་པའི་བོད་མི་འབུམ་ཕྲག་རྒྱ་གར་དུ་བཙན་བྱོལ་ལ་ཕེབས་སྐབས་འདི་གའི་དགོན་པའི་གྲྭ་རྒྱུན་༡༥ཙམ་བཙན་བྱོལ་དུ་འབྱོར་ཏེ། ས་མཚམས་འབྲུག་ཡུལ་དང༌། རྒྱ་གར་ནང་ཌལ་ལ་ཧའོ་སེ་དང༌། དེ་ནས་མོན་གྷོ་འདོད་རྒུ་གླིང་གཞིས་ཆགས་སུ་གནས་ཀྱང་། ཕྱི་ལོ་ ༡༩༩༠ བར་དགོན་པ་སླར་གསོའི་ལས་གཞི་གང་ཡང་སྤེལ་ཐུབ་མེད། དེ་སྔ་ནས་དགའ་ལྡན་བྱང་རྩེ་ཀླུ་འབུམ་ཁང་ཚན་ཁོངས་སུ་ཡིན་པ་ལྟར་སྒྲིག་ཞུགས་རྗེས་རིམ་པས་བགྲེས་འདས་གྱུར་འཕྲོས་གྲྭ་གཉིས་ལས་ལྷག་མེད་པ་ནི་དགེ་བཤེས་འཕྲིན་ལས་བསྟན་འཛིན་དང༌། དགེ་སློང་ཡེ་ཤེས་དོན་ཡོད་ཡིན། ཁོང་གཉིས་ཀྱིས་ཕྱི་ལོ་ ༡༩༦༢ ལོར་དེཧ་རཱ་དཱུན་དང་ཞབས་ཁོངས་སུ་བཅར་ཏེ་ལོ་ངོ་༢༤རིང་དྲག་པོའི་ཞབས་འདེགས་ཞུས་རྗེས་སྒྲིག་མཐུན་རྒས་ཡོལ་ཐོབ་སྟེ། ཕྱི་ལོ་ ༡༩༨༢ ལོར་སྡེ་ར་ལྡུན་བདེ་སྐྱིད་གླིང་གཞིས་ཆགས་སུ་སྤུན་ཉེ་ཚོའི་སར་བཅའ་སྡོད་བྱས་ནས་བོད་ཀྱི་གྲྭ་རྒྱུན་ཁོངས་ཡེ་ཤེས་དོན་ཡོད་ནས་རང་དོན་རང་གཅེས་ཀྱི་འཁུར་ལེན་དང་ལྷག་བསམ་རྣམ་དག་གི་སྒོ་ནས་བདེ་སྐྱིད་གླིང་བོད་མིའི་གཞིས་ཆགས་ས་ཁོངས་ནས་རང་གཞུང་ནང་སྲིད་ལྷན་ཁང་ལ་སྙན་འབུལ་ཞུས་དོན་དགོངས་བཞེས་བླ་མེད་ཀྱིས་ས་ཆ་གསོལ་སྩལ་བྱུང་བ་དང༌། རྒྱ་གར་གྲོང་གསེབ་པ་ནས་ས་ཆ་ཁ་སྣོན་སྤུས་ཉོས་ཞུས་ཏེ་རང་གཞུང་ཆོས་རིག་ལྷན་ཁང་ནས་དགོན་པ་གསར་བཞེངས་ཞུ་རྒྱུའི་བཀའ་འཁྲོལ་དང་ཞལ་འདེབས་སློང་ཡིག་བཀའ་ཡིག་གསོལ་སྩལ་ལྟར་རྒྱ་གར་དང་བལ་ཡུལ་འབྲུག་ཡུལ་བཅས་སུ་ཆེད་བསྐྱོད་ཞུས་ཏེ་ཞལ་འདེབས་མ་དངུལ་གང་ཙམ་བསྡུ་རུབ་ཞུ་ཐུབ་པ་དང༌། དེ་བཞིན་རང་རིགས་དད་ལྡན་ཁག་དང་ཕྱི་རྒྱལ་བ་སྦྱིན་བདག་ཁག་ལ་རེ་སྐུལ་ཞུས་དོན་རོགས་དངུལ་གང་ལེགས་གནང་སོན་བྱུང་བ་དང༌། ལྷག་པར་དུ་ཕྲེང་རིང་ཨ་མ་ལགས་ནས་ཞལ་འདེབས་རོགས་དངུལ་སྩལ་སོན་བྱུང༌། དེ་བཞིན་དད་ལྡན་ཁག་གཅིག་ནས་དངུལ་བུན་གཡར་ཞུས་ཀྱི་དགོན་པ་སླར་གསོའི་ཨར་ལས་ཕྱི་ལོ་ ༡༩༩༠ ཟླ་ ༧ ཚེས་ ༡ གཟའ་སྐར་དགེ་འཛོམས་དང་བསྟུན་འགོ་འཛུགས་ཞུས། ལོ་ངོ་བདུན་རྗེས་ལེགས་པར་གྲུབ་སྟེ་ཕྱི་ལོ་ ༡༩༩༧ ཟླ་ ༧ ཚེས་ ༢༣ ཉིན་སྤྱི་ནོར་ྋགོང་ས་ྋསྐྱབས་མགོན་ཕྱག་ན་པདྨོ་ྋརྒྱལ་མཆོག་སྐུ་ཕྲེང་བཅུ་བཞི་པ་ཆེན་པོ་མཆོག་ནས་དབུ་འབྱེད་རབ་གནས་བཀའ་དྲིན་སྤྱི་སྨིན་ཐོག་འདུ་ཁང་བཞུགས་ཁྲི་རིན་པོ་ཆེ་དང་དབུ་རྩེའི་གཟིམ་ཆུང་བཞུགས་ཁྲི་རིན་པོ་ཆེ་བཅས་སུ་སྐུ་ལྷོད་བཞུགས་ཀྱི་ལོ་རྒྱུས་དང་ཨར་ལས་རྩིས་ཁྲར་ཐུགས་ཞིབ་ཀྱི་དངུལ་བུན་ལྷག་བསྡད་རྩིས་སྙན་ནང་ཁ་གསལ་ཡོད་པ་ལྟར་ཧིན་སྒོར་ ༡༥༠༠༠༠། ཐམ་པ་འཁོད་པའི་དངུལ་འཛིན་སྐབས་འཕྲལ་དེ་ཉིན་རང་གསོལ་སྩལ་བཀའ་དྲིན་སྤྱི་སྨིན་བྱུང་བ་ལགས་པས། དགོན་པ་འདིའི་གཞིས་བྱེས་གཉིས་ཀར་ྋརྒྱལ་མཆོག་རིམ་པས་གཟིགས་སྐྱོང་ལམ་སྟོན་རྒྱུན་མར་མཛད་པའི་བཀའ་དྲིན་རྗེས་དྲན་ཚེ་རབས་ནས་ཚེ་རབས་བར་ཞུ་རྒྱུ། གོང་ཞུས་ལྟར་དགོན་སྡེ་འདི་བཞིན་གདན་ས་ཆེན་པོ་དགའ་ལྡན་རྣམ་པར་རྒྱལ་བའི་ཆོས་སྡེ་ཆེན་པོའི་བྱང་རྩེ་གྲྭ་ཚང་གི་ཀླུ་འབུམ་ཁང་ཚན་ཁོངས་གཏོགས་ལ་བརྟེན། སྔར་ལམ་བཞིན་མཁན་བླ་སློབ་དཔོན་བྱང་རྩེ་ནས་གཏོང་གནང་མཛད་སྲོལ་ལྟར། ད་ལྟའི་ཆར་ཡང་ ༡༩༩༢ ལོར་དགེ་བཤེས་ལྷ་རམས་པའི་མིང་བཏགས་ཐོབ་པའི་དགེ་བཤེས་འཕྲིན་ལས་བསྟན་འཛིན་ལགས་ཀྱིས་ད་ལྟའི་ཆར་དགོན་པའི་མཁན་པོའི་མིང་འཛིན་དང་། སྔར་ལམ་བཞིན་དོན་གླིང་དགོན་པའི་གྲྭ་རྒྱུན་དང་བཅས་དགེ་འདུན་པ་ཞལ་གྲངས་ ༢༤ ཙམ་ཞིག་དགའ་ལྡན་བྱང་རྩེ་ཀླུ་འབུམ་ཁང་ཚན་ཁོངས་གཏོགས་སུ་སློབ་གཉེར་གསན་བསམ་གནང་བཞིན་པ་རྣམས་ལ་དཔེ་ཁྲིད་དང༌། ལྟ་སྐྱོང་ཞུ་མུས་དང༌། བྱེས་ཀྱི་དགོན་པ་འདིའི་གྲྭ་རྒྱུན་ཇི་དགོས་བྱང་རྩེ་གྲྭ་ཚང་ནས་འཛིན་སྐྱོང་གནང་བཞིན་ཡོད། འོན་ཀྱང་གདན་སའི་དགེ་འདུན་རྣམས་གཞུང་ཆེན་བཀའ་པོད་ལྔ་ཡི་གསན་བསམ་ལེགས་སྤེལ་གནང་བཞིན་ལ་བརྟེན། གྲྭ་རྒྱུན་འཕར་མ་གཏོང་གནང་མཛད་ཐབས་མི་ཐུབ་པས། དེང་སང་དཀོན་གཉེར་གྲྭ་རྒྱུན་གཅིག་གཏན་སྡོད་ཞུ་བཞིན་འཁྲུངས་ཡུལ་བོད་ལྷོ་ཁུལ་ལྷོ་བྲག་དུ་བ་རྫོང་ནས་ཡིན་པའི་ཡེ་ཤེས་དོན་ཡོད་དགུང་ལོ་༧༣ལ་སླེབས་པ་ཁོང་ནས་རྒྱུས་བབ་སློབ་སྟོན་གང་ཤེས་ཞུ་མུས་སུ་ཡོད།། །།

༄༅། །འབྲས་སྤུངས་བདེ་ཡངས་གྲྭ་ཚང་ནི། རི་བོ་དགེ་ལུགས་པའི་གདན་ས་ཆེན་པོ་གསུམ་གྱི་ནང་ཚན་དཔལ་ལྡན་འབྲས་སྤུངས་ཆོས་སྡེ་ཆེན་པོ་ཕྱག་འདེབས་པ་པོ་འཇམ་དབྱངས་ཆོས་རྗེའི་ཐུགས་སྲས་བདེ་ཡངས་གྲྭ་ཚང་གི་གདན་ཁྲི་འཛིན་པའི་མཁན་རབས་དང་པོ་ལྕོག་པ་བྱང་ཆུབ་དཔལ་ལྡན་གྱིས་ཕྱག་བཏབ། གྲྭ་ཚང་དེ་ནས་གྲྭ་ཆུང་ཡོན་ཏན་རྒྱ་མཚོ་དང་། མཆེ་མ་དབང་རྒྱལ། རོང་པོ་བཀའ་བཅུ་པ་བརྩོན་འགྲུས། བླ་མ་བློ་སེང༌། དྲང་ནམ་མཁའ། བླ་མ་བཀྲ་ཤིས་རྒྱ་མཚོ་སོགས་རིམ་པར་བྱོན་ཏེ་བཤད་སྒྲུབ་ཀྱི་སྡེ་ཆེན་པོ་ཞིག་ཏུ་གྱུར། སྤྱིར་བདེ་ཡངས་གྲྭ་ཚང་གི་གསན་བསམ་མཛད་ཕྱོགས་ཐད། མདོ་ཕྱོགས་ནས་རྒྱ་གཞུང་ཁག་དང་རྗེ་ཡབ་སྲས་ཀྱི་གཞུང་འགྲེལ་བཀའ་རྩོམ་ཁག་གཞིར་བཟུང་གྲྭ་ཚང་འདིའི་ཐུན་མོང་མ་ཡིན་པའི་ཡིག་ཆ་ྋགོང་ས་ལྔ་པ་ཆེན་པོས་མཛད་པའི་དབུ་ཕར་གྱི་གཞུང་འགྲེལ་དག་ལ་གསན་བསམ་མཐར་ཕྱིན་གནང་རྗེས། དགེ་བཤེས་ལྷ་རམས་སོགས་ཀྱི་དམ་འཇོག་མཚན་རྟགས་བཞེས་ཚུལ་སོགས་གདན་ས་རྣམས་དང་གཅིག་མཚུངས་ཡིན། སྔགས་ཕྱོགས་ལ་མཚོན་ན། ཀུན་རིག་སྒྲུབ་མཆོད་དང་། རྗེ་ཙོང་ཁ་པས་མཛད་པའི་སྨན་བླའི་སྒྲུབ་མཆོད་བཅས་རྐང་འཛིན་གྱིས་ཕྱག་བཞེས་ཐུན་མིན་ངོ་མཚར་ལྡན་པ་ཞིག་ཡིན། དེ་ཡང་འབྲས་སྤུངས་ཆོས་སྡེ་ཆེན་པོ་ཕྱག་བཏབ་རྗེས་ལྕོག་པ་བྱང་ཆུབ་དཔལ་ལྡན་གྱིས་འཆད་ཉན་སྤེལ་བཞིན་པའི་སྐབས་འབྲས་སྤུངས་ཀྱི་མདུན་ངོས་གཙང་ཆུའི་འགྲམ་དུ་པེ་ཧར་གྱི་དཀོར་རྫས་རྟེན་བཅས་བྱོན་པར་མཁྱེན་ཏེ། ཆོས་རྗེ་ཉིད་ཀྱི་གསོལ་དཔོན་ལ་མ་གིར་ངོས་ཀྱི་མགྲོན་པོ་ཁྱད་པར་ཅན་ཞིག་ཕེབས་ཀྱི་ཡོད་པས་གདན་དྲང་དུ་སོང་ཞེས་མངགས་པ་ལྟར། གསོལ་དཔོན་གཙང་ཆུའི་འགྲམ་དུ་སླེབས་པ་དང་སྒམ་ཞིག་ཡོད་པ་འབྲས་སྤུངས་སུ་ཁྱེར་ཡོང་བར་ད་ལྟ་གནས་ཆུང་གྲྭ་ཚང་ཆགས་ས་དེར་སླེབས་པ་དང་སྒམ་དེ་ལྕི་རུ་སོང་ནས་མ་ཐེག་པར་རྡོ་ཕ་བོང་ཞིག་ཡོད་པར་དེའི་སྟེང་དུ་སྒམ་དེ་བཞག་ནས་བླ་མ་མཁྱེན་ཞེས་བརྗོད་པ་དང་། སྒམ་དེ་ཅུང་ཟད་ཁ་བྱེ་བའི་བར་ནས་བྱ་ཕུག་རོན་ཞིག་ཐོན་ཏེ་ས་གནས་དེར་ཡོད་པའི་སྒྲོ་སྡོང་དེ་ལ་ཐིམ། སྒམ་དེ་ལྕོག་པ་བྱང་ཆུབ་དཔལ་ལྡན་གྱི་མདུན་དུ་ཕུལ་ནས་ལོ་རྒྱུས་རྣམས་ཞུས་པས། ལྕོག་པ་བྱང་ཆུབ་དཔལ་ལྡན་གྱིས་ཕུག་རོན་གང་དུ་ཐིམ་པའི་གནས་དེར་དགེ་འདུན་བརྒྱད་གྲྭ་ལྡན་པའི་དགོན་ཆུང་ཞིག་ཕྱག་བཏབ་ནས། ལྷ་དེ་ཆེ་ཡང་གནས་ས་ཆུང་ཞེས་གསུངས་པས། གནས་ཆུང་ཞེས་པའི་མཚན་ཐོག་མར་དེ་ནས་བྱུང༌། དེ་ནས་བཟུང་ཆོས་སྐྱོང་རྡོ་རྗེ་གྲགས་ལྡན་འབྲས་སྤུངས་ཀྱི་བཀའ་སྲུང་དུ་བསྟེན་ནས་གསོལ་མཆོད་རྒྱ་ཆེར་མཛད། རྗེས་སུ་ྋརྒྱལ་མཆོག་ལྔ་པ་ཆེན་པོའི་སྐུ་དུས་སུ་གཞུང་བསྟེན་དགྲ་ལྷའི་གཙོ་བོར་མཛད་དེ་གཞུང་ཕྱོགས་ཆོས་སྲིད་ཀྱི་བྱེད་སྒོ་མཐའ་དག་ལ་རྡོ་རྗེའི་བཀའ་ལུང་ཕབ་པ་སོགས་བསྟན་དོན་གྱི་བྱ་བ་རླབས་ཆེན་བསྐྱངས། ཕྱི་ལོ་ ༡༩༥༩ ལོར་གདན་ས་འཛིན་པའི་མཁན་པོ་ལས་ཐོག་དགུང་ལོ་བགྲེས་པས། བཙན་བྱོལ་དུ་ཕེབས་མ་ཐུབ་པར་རྒྱ་དམར་གྱི་བཙན་འོག་ཏུ་སྐུ་ཚེའི་འཕེན་པ་རྫོགས་པ་མ་ཟད། དགེ་འདུན་པ་རེ་ཟུང་ཙམ་ལས་སྐྱབས་བཅོལ་དུ་ཕེབས་མ་ཐུབ་པའི་རྐྱེན་གྱིས་རྒྱ་གར་དུ་བདེ་ཡངས་གྲྭ་ཚང་བསྐྱར་འཛུགས་མ་ཐུབ་པར་ནར་འགྱངས་སུ་ལུས། དེ་ནས་ྋགོང་ས་མཆོག་ལ་བདེ་ཡངས་གྲྭ་ཚང་གསར་བཞེངས་སྙན་སྒྲོན་ཞུས་པས་དེ་བཞིན་གསར་བཞེངས་དགོས་གལ་ཆེ་བའི་བཀའ་སློབ་སྤྱི་ཕེབས་བཀའ་དྲིན་ཆེ་བ་ལྟར། ཕྱི་ལོ་ ༢༠༠༥ ལོར་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་འབྲས་སྤུངས་ཆོས་སྡེར་བདེ་ཡངས་གྲྭ་ཚང་གི་སྤྲུལ་སྐུ་བསྟན་འཛིན་ཆོས་སྐྱབས་བཟང་པོ་རིན་པོ་ཆེ་དང༌། གནས་ཆུང་སྐུ་རྟེན་ཐུབ་བསྟན་དངོས་གྲུབ་རྣམ་གཉིས་ནས་བདེ་ཡངས་གྲྭ་ཚང་གསར་དུ་བཞེངས་འགོ་བཙུགས། དེ་ནས་བདེ་ཡངས་གྲྭ་ཚང་གི་གྲྭ་རྒྱུན་ཉུང་ཤས་ཡོད་པ་རྣམས་ནས་འགན་ཁུར་རྐང་བཞེས་ཐོག་དགེ་འདུན་པའི་བཞུགས་ཤག་དང༌། གཙུག་ལག་ཁང་རྟེན་དང་བརྟེན་པར་བཅས་པ་གསར་བཞེངས་ལེགས་གྲུབ་ཀྱིས་ཕྱི་ལོ་ ༢༠༠༨ ཟླ་ ༡ ནང་ྋགོང་ས་ལྷ་མིའི་རྣམ་འདྲེན་ྋསྐྱབས་མགོན་ྋརྒྱལ་དབང་ཐམས་ཅད་མཁྱེན་པ་སྐུ་ཕྲེང་བཅུ་བཞི་པ་མཆོག་འབྲས་སྤུངས་ཆོས་སྡེར་ཞབས་སོར་འཁོད་སྐབས། ཟླ་དེའི་ཚེས་༡༤ཉིན་བདེ་ཡངས་གྲྭ་ཚང་དུ་བཞུགས་ཞག་ཐོག་གནས་ཆུང་གྲྭ་ཚང་གི་དགེ་འདུན་པ་ཡོངས་ནས་བརྟན་བཞུགས་རྒྱས་པ་བསྟར་འབུལ་ཞུས་པས་ཐུགས་དགྱེས་མཉེས་ཆེན་པོས་གཙུག་ལག་ཁང་དབུ་འབྱེད་རབ་གནས་བྱིན་རླབས་ཀྱི་བཀའ་དྲིན་བསྐྱངས། ད་ལྟའི་དབུ་བཞུགས་བདེ་ཡངས་སྤྲུལ་སྐུ་བསྟན་འཛིན་ཆོས་སྐྱབས་བཟང་པོ་མཆོག་ནི། ཕྱི་ལོ་ ༡༩༦༦ ལོར་བོད་ནང་འཁྲུངས་ཤིང་འབྲིང་རིམ་སློབ་བསྐྱོད་ཟིན་ནས་ཕྱི་ལོ་ ༡༩༨༠ ལོར་འཕགས་ཡུལ་དུ་འབྱོར་ནས་གནས་ཆུང་གྲྭ་ཚང་དུ་འཛུལ་ཞུགས་གནང༌། ཕྱི་ལོ་ ༡༩༩༤ བར་གྲྭ་ཚང་གི་འདོན་ཆོག་དང་མཚན་ཉིད་རིགས་ལམ་སོགས་ལ་སྦྱངས་པ་མཛད། དེ་ནས་ྋགོང་ས་མཆོག་ནས་རྗེ་ཙོང་ཁ་པ་ཆེན་པོའི་དབུ་བླ་གཉལ་གྱི་ཆོས་སྐྱབས་བཟང་པོའི་སྐྱེ་སྲིད་དུ་ངོས་འཛིན་མཛད་ནས་འབྲས་སྤུངས་སུ་གསན་བསམ་མཐིལ་ཕྱིན་མཛད་ནས། དེང་སྐབས་གྲྭ་ཚང་འདིའི་མཛད་འགན་བཞེས་མུས་སུ་བཞུགས། ད་ལྟའི་ཆར་གྲྭ་ཚང་འདིར་དགེ་འདུན་པའི་ཞལ་གྲངས་ ༦ ཙམ་བཞུགས་ཡོད།། །།

༄༅། །ལ་སྟོད་ཤེལ་དཀར་རྫོང་ཁོངས་ཟེ་དཀར་ཆོས་སྡེ་སྐྱིད་ཚལ་གླིང་ནི། བཀྲས་ལྷུན་དགོན་གྱི་ཀུན་གཟིགས་པཎ་ཆེན་བཟང་པོ་བཀྲ་ཤིས་དཔལ་བཟང་པོའི་དངོས་སློབ་རྗེ་བཙུན་བྱམས་པ་བསྟན་འཕེལ་མཆོག་གིས་ཕྱི་ལོ་ ༡༤༠༠ ལོར་ཕྱག་བཏབ། དགོན་པའི་མིང་ལ་ཟེ་དཀར་ཞེས་ཐོགས་ཚུལ་ནི། དགོན་པ་བཞེངས་སའི་ས་ཆ་དེ་སྡེ་པ་དར་རྒྱས་པ་ཞེས་པ་ཞིག་གིས་ཞིང་ཟེ་ཀ་མ་ཞེས་པ་དེ་བླ་མར་ཕུལ་བས་དགོན་མིང་ཟེ་དཀར་ཆོས་སྡེ་ཞེས་ཐོགས། དེའི་སྐབས་དགེ་འདུན་ཞལ་གྲངས་བརྒྱད་ཅུ་ཙམ་ཡོད། དགེ་འདུན་པ་རྣམས་ཀྱིས་གཞི་གསུམ་དང༌། ཡར་མར་གྱི་ཚེས་བཅུ་ཆག་མེད། དཔལ་རྡོ་རྗེ་འཇིགས་བྱེད་དང༌། ཚེ་དཔག་མེད་ལྷ་དགུ། ཀུན་རིགརྣལ་འབྱོར་མ། སྨན་བླ། སྦྱོར་ཆོས་བཅས་ཀྱི་སྒྲུབ་མཆོད། དབྱར་ཆོས་སྐབས་བཀའ་འགྱུར་རིན་པོ་ཆེ་དག་སྒྲོག གནས་བརྟན་ཕྱག་མཆོད་དང་འབྲེལ་བའི་ྋརྒྱལ་བའི་ཞབས་བརྟན་བཅས་སྒྲུབ་ཀྱི་ཡོད། ཕྱི་ལོ་ ༡༩༥༩ ལོའི་དུས་འགྱུར་སྐབས་བོད་མི་གང་མང་རྒྱ་གར་ལ་སྐྱབས་བཅོལ་དུ་འབྱོར་བ་དང༌། ཕྱི་ལོ་ ༡༩༨༧ ལོར་ཀ་སྦུག་ས་གནས་སུ་༸སྐྱབས་རྗེ་ཁྲི་བྱང་རིན་པོ་ཆེའི་བཀའ་དགོངས་བཞིན་ཤྲཱི་ཆུ་བཟང་རིན་པོ་ཆེ་དབུ་བཞུགས་ཀྱིས་སློབ་དཔོན་དགེ་སློང་བློ་བཟང་རྒྱ་འཕེལ་ལགས་དང་གྲྭ་མང་ཡོངས་ནས་ཕྱར་གྲུ་མཉམ་འདེགས་ཀྱིས་གཙུག་ལག་ཁང་ཀ་བ་བཞི་ཡོད་པའི་རྟེན་དང་བརྟེན་པར་བཅས་པ་གསར་སྐྲུན་ཞུས་ཏེ། ཕྱི་ལོ་ ༡༩༩༤ ལོར་གཙུག་ལག་ཁང་རྟེན་དང་བརྟེན་པར་བཅས་པ་ལེགས་གྲུབ་བྱུང་། དེང་སྐབས་ཤྲཱི་ཆུ་བཟང་རིན་པོ་ཆེ་མཆོག་གཙོས་པའི་དགེ་འདུན་པ་ཞལ་གྲངས་༣༠བཞུགས་པ་རྣམས་ཀྱིས་གཞི་གསུམ་གྱི་ཆོ་ག་གཙོར་གྱུར་རང་ལུགས་བཞེད་དགོངས་ཁག་ཉམས་པ་སླར་གསོ་དང་མི་ཉམས་རྒྱུན་འཛིན་གནང་མུས་དང༌། བོད་ཀྱི་ཐུན་མོང་རིག་གནས་གཙོས་དེང་དུས་ཀྱི་ཤེས་ཡོན་ལ་འབད་བརྩོན་ཤུགས་ཆེར་བྱེད་བཞིན་ཡོད།། །།

༄༅། །བོད་དགོན་དགའ་ཆོས་གླིང་ནི། ཕྱི་ལོ་ ༡༩༥༧ ལོ་ཙམ་ལ་མཚམས་པ་བླ་མ་ཟེར་བ་ཞིག་ཤི་ལོང་དུ་འབྱོར་ཏེ། དེ་གར་དགོན་པ་ཞིག་དགོས་གལ་གཟིགས་ནས་ཐོག་མར་དགོན་པ་ཆུང་ཆུང་ཞིག་བཞེངས་ཡོད། འོན་ཀྱང༌ཕྱིས་སུ་བརྒྱུད་འཛིན་མ་བྱུང་སྟབས་སྐབས་དེའི་ལས་སྣེ་ནས་ཕྱི་ལོ་ ༡༩༧༠ ཙམ་ལ་དགེ་ལུགས་མ་དགོན་དུ་ཕུལ་བ་ནས། ད་བར་སེ་འབྲས་དགའ་གསུམ་ནས་མཁན་པོ་དགེ་བཤེས་གཏོང་གནང་མཛད་བཞིན་པ་དང༌། གསོ་སྦྱོང་དབྱར་གནས་དགག་དབྱེ་སོགས་མི་ཉམས་པར་གནས་ཡོད། ད་ལྟའི་ཆར་མཁན་པོ་བློ་གསལ་གླིང་ནས་གནང་མུས་ཡིན།། །།

༄༅། །འཇམ་དབྱངས་དྷཱི་ཅན་ནང་ཆོས་སློབ་གཉེར་ཁང་ནི། ྋསྐྱབས་རྗེ་གྲུབ་ཐོབ་རིན་པོ་ཆེ་རྗེ་བཙུན་ངག་དབང་རྣམ་དག་མཆོག་ནས་ཕྱི་ལོ་ ༡༩༩༦ ལོར་བལ་ཡུལ་ཡང་ལེ་ཤོད་དུ་ཕྱག་བཏབ། ད་ལྟའི་ཆར་ྋསྐྱབས་རྗེ་གྲུབ་ཐོབ་རིན་པོ་ཆེས་གཙོས་སློབ་གཉེར་བ་ཁྱོན་དགེ་འདུན་པ་ཞལ་གྲངས་ ༧༠ ཙམ་གྱིས་ནང་ཆོས་ཀྱི་སློབ་སྦྱོང་གཙོ་བོ་དང༌། གཞན་ཡང་དེང་དུས་ཀྱི་ཤེས་ཡོན་ཨིན་ཇི་དང༌། སྙན་སུམ་སོགས་སློབ་སྦྱོང་སྤྲོད་བཞིན་ཡོད། དེ་ནས་རིམ་གྱིས་རྒན་པ་རྣམས་གདན་ས་དང༌། ཝཱ་ཎ་དབུས་བོད་ཀྱི་གཙུག་ལག་སློབ་གཉེར་ཁང་དང༌། དྷ་ས་རིགས་ལམ་སློབ་གཉེར་ཁང་བཅས་ལ་སློབ་གཉེར་ཆེད་གཏོང་བཞིན་ཡོད།། །།

༄༅། །ཤེལ་དཀར་ཆོས་སྡེ་དགའ་ལྡན་ལེགས་བཤད་གླིང་ནི། སྔོན་བོད་སིལ་བུར་འཐོར་རྗེས་སུ་ལ་སྟོད་ལྷོ་བདག་དང༌། བྱང་བདག་ཅེས་འཛིན་བདག་ཁག་གཉིས་བྱུང་བ་ལས། ལྷོ་བདག་སི་ཏུ་རིན་ཆེན་གྱིས་བོད་རབ་བྱུང་དྲུག་པའི་ཤིང་གླང་ཕྱི་ལོ་ ༡༣༨༥ ལོར་ཤེལ་དཀར་ཆོས་སྡེ་དགའ་ལྡན་ལེགས་བཤད་གླིང་ཞེས་བྱ་བ་འདི་ཉིད་ཕྱག་བཏབ། ཆོས་སྡེ་འདིའི་མཁན་ཐོག་དང་པོ་དཔང་ལོ་ཙཱ་བ་བློ་གྲོས་བརྟན་པ་ཁྲིར་ཕེབས། སི་ཏུ་ཆོས་ཀྱི་རིན་ཆེན་ནས་ཨར་ལས་སོགས་ཀྱིས་མཐུན་རྐྱེན་གྲ་སྒྲིག་དང༌། ལོ་ཆེན་གྲགས་པ་རྒྱལ་མཚན་ཉིད་ཀྱིས་ཆོས་གྲྭ་གསར་དུ་བཙུགས། སྐབས་དེར་ས་སྐྱ་པ་གྲྭ་ཚང་བདུན་དང༌། བོ་ལུགས་གྲྭ་ཚང་བདུན། དགེ་ལུགས་གྲྭ་ཚང་བདུན་བཅས་ཁྱོན་བསྡོམས་གྲྭ་ཚང་ཉེར་གཅིག་བྱུང༌ཡོད། དེ་དུས་དབྱར་དགུན་གྱི་ཆོས་གྲྭར་ཕྱོགས་མཐའ་ནས་དགེ་འདུན་བདུན་བརྒྱ་ལྔ་བཅུ་ཙམ་འདུས། རྗེ་བཙུན་རེད་མདའ་བ་བྱོན་ནས་ཟབ་ཆོས་མང་དུ་གསུངས། བཻ་སེར་ལྟར་ན་ྋའཇམ་མགོན་ཆོས་ཀྱི་ྋརྒྱལ་པོ་ཙོང་ཁ་པ་ཆེན་པོ་ཡང་ཕེབས་ནས་ཟབ་ཆོས་གསུངས། ལྷག་པར་དུ་ྋརྒྱལ་བའི་དབང་པོ་རྗེ་དགེ་འདུན་གྲུབ་པ་སློབ་ཚོགས་ཉེར་གཅིག་དང་བཅས་པ་ཤེལ་དཀར་ཆོས་གྲྭར་ཟླ་ཕྱེད་ཙམ་བཞུགས་ནས་ཀུན་མཁྱེན་ཆོས་བློ་དང་དམ་བཅའ་བགྲོ་གླེང་གནང་ནས་གཞུང་ཆེན་འཆད་ཉན་གྱི་སྲོལ་རྒྱ་ཆེན་པོ་བཏོད་ནས་འཆད་རྩོད་རྩོམ་གསུམ་གྱི་སྒོ་ནས་བསྟན་པ་དར་བར་མཛད། དེ་རྗེས་བར་སྐབས་ཤིག་ནས་བདུད་མོ་རྣོ་མྱུར་ནག་མོའི་སྨོན་ལམ་དུས་སུ་ཆོས་ཁྲིམས་དང་རྒྱལ་ཁྲིམས་གཉིས་ཀ་འཆོལ་བས་འཆད་ཉན་ལྟ་ཞོག ཕྱི་རབ་བྱུང་གི་རྟགས་དང་འདུལ་སྡོམ་གྱི་རྩ་བ་བཞི་ཡང་འདི་ཡོད་དཀའ་བའི་སྙིགས་མའི་རང་ཞལ་ལྷུག་པར་བསྟན་པའི་སྐབས་དེར། སྲིད་ཞིའི་གཙུག་རྒྱན་ྋགོང་ས་ྋརྒྱལ་དབང་ལྔ་པ་ཆེན་པོ་མཆོག་གི་སྔོན་གྱི་ཐུགས་བསྐྱེད་དང༌། སྨོན་ལམ་གྱི་མཐུས་གྲྭ་ཚང་འདི་ཉིད་བོད་རབ་བྱུང་བཅུ་གཅིག་པའི་ཤིང་མོ་བྱ་ལོ་ཕྱི་ལོ་ ༡༦༤༥ ལོར་དགེ་ལྡན་རིང་ལུགས་འཛིན་པའི་ཆོས་གྲྭ་གསར་དུ་བཙུགས་ནས་གྲྭ་པའི་ཞལ་གྲངས་སུམ་བརྒྱ་ལྷག་ཙམ་དང༌། མཁན་པོའི་ཐོག་མ་གྲམ་མཚོ་བ་ལེགས་པ་དོན་གྲུབ་ཁྲིར་ཕེབས། ྋགོང་ས་ལྔ་པ་ཆེན་པོ་མཆོག་ནས་བཅའ་ཡིག་ཆེན་མོ་དང༌། ཤེ་བམ་རིན་པོ་ཆེ་བསྩལ། འབྲས་སྤུངས་བདེ་ཡངས་གྲྭ་ཚང་གི་ཡིག་ཆ་གཞིར་བཟུང་གཞུང་ཆེན་ཁག་གི་འཆད་ཉན་གྱི་སྲོལ་གཏོད་མཛད། མངའ་ཁུལ་དགོན་སྡེ་ཁག་གི་ཁ་འཛིན་དང༌། མི་མང་ལ་དབང་བསྐུར་ཆོས་བཤད་སོགས་བླ་མས་སྐྱོང་དགོས་ཀྱང་དགོན་མ་བུ་རྡོ་འབྱར་ཡིན་པ། ཤེལ་དཀར་མངའ་ཁུལ་རིགས་རུས་ཁུངས་བཙན་གྱི་བུ་གསུམ་བར་པ་ཤེལ་དཀར་ཆོས་སྡེའི་གྲྭ་ཁྲལ་བསྐུལ་ཁོངས་སོགས་བཀའ་ལུང་ཟབ་ཅིང་རྒྱ་ཆེ་བསྩལ། དེ་རྗེས་མི་དབང་ཕོ་ལྷ་བ་ཆེན་པོ་མཆོག་ཤེལ་དཀར་དུ་ཕེབས་ནས་རྒྱལ་བའི་བཀའ་འགྱུར་རིན་པོ་ཆེའི་གསུང་པར་གསར་བཞེངས་མཛད་རྒྱུའི་མ་དཔེར་རྒྱལ་རྩེ་ཐེམ་སྤངས་མ་དང་ཞུས་དག་ངེས་སོང་བཀའ་འགྱུར་རིན་པོ་ཆེ་ཤེལ་དཀར་མེ་ལོང་མ་བསྩལ། ཆོས་སྡེར་པར་ཁང་ལེ་ལག་ཆ་ཚང་གསར་སྐྲུན་གནང༌། དབུས་གཙང་ཁུལ་དུ་བཀའ་འགྱུར་དང་བསྟན་འགྱུར་གཉིས་ཀ་པར་བརྐོས་ཐོག་མ་ཤེལ་དཀར་ཡིན་པར་གྲགས། མི་དབང་མཆོག་ནས་མཆོད་གཞིས་ཁ་སྣོན་སོགས་ཇི་སྙེད་བསྩལ། བར་སྐབས་སུ་གོར་དམག་སྔ་རྗེས་བྱུང་དུས་སུ་བཀའ་བློན་བཤད་སྒྲ་བ་དང༌། དྭགས་ཀོང་དམག་མི་མང་པོ་ཤེལ་དཀར་དུ་ཕེབས་པར་དམག་ཕོགས་དགོས་མཁོ་སྤྱི་སྒེར་གཉིས་ནས་ཕུལ་བར་བརྟེན། ྋརྒྱལ་མཆོག་སྐུ་ཕྲེང་བརྒྱད་པ་ཆེན་པོས་སླར་མཆོད་གཞིས་གསར་བསྩལ་དང༌། གནང་ཡིག་ཤེ་བམ་རིན་པོ་ཆེ་དགོན་གྱི་དབུ་མཛད་ཐོག་མཁན་ཆུང་གི་གོ་གནས་བཅས་བསྩལ། བོད་གཞུང་དགའ་ལྡན་ཕོ་བྲང་པ་ཆེན་པོས་སྔ་ཕྱི་བར་དུ་བཀའ་དྲིན་བླ་ན་མེད་པ་བསྐྱངས་ཤིང༌། ཆོས་སྡེ་འདིར་སྐྱེས་བུ་དམ་པ་ཇི་སྙེད་ཕེབས་ནས་མདོ་སྔགས་ཀྱི་བསྟན་པ་ཆེས་ཆེར་སྤེལ་ཅིང༌། མདོ་ཕྱོགས་ནས་གཞུང་ཆེན་བཀའ་པོད་ལྔའི་འཆད་ཉན་དང༌། ཆོས་སྤྱོད་ཀྱི་རིམ་པ། སྔགས་ཕྱོགས་ནས་གསང་བདེ་འཇིགས་གསུམ་སོགས་ཀྱིས་མཚོན་པའི་རྒྱུད་སྡེ་བཞིའི་འཆད་ཉན་དང་རྒྱུད་སྡེ་སོ་སོ་དང་འབྲེལ་བའི་དཀྱིལ་ཆོག་སོགས་ཆ་ཚང་ཡོད། ཕྱི་ལོ་ ༡༩༥༩ སྔོན་ལ་དགོན་པར་དགེ་འདུན་པ་ ༣༠༠ ལྷག་ཙམ་ཡོད་ཀྱང་། ལོ་དེར་རྒྱ་དམར་ཀླ་ཀློས་བཙན་ཤེད་ངན་དགུའི་གདུག་རྩུབ་གཞུང་སྒེར་ཆོས་འབངས་ཡོངས་ལ་བྱུང་བས། ཤེལ་དཀར་ཆོས་སྡེའི་བླ་མ་གླིང་ག་བཀའ་འགྱུར་བ་ངག་དབང་བློ་བཟང་ཚུལ་ཁྲིམས་རྒྱལ་མཚན་མཆོག་གི་ཡང་སྲིད་གླིང་ག་བྱམས་པ་བློ་བཟང་མཆོག་གིས་མཚོན་པའི་བླ་མ་དགེ་བཤེས་མི་དྲག་དྲུག་ཅུ་རེ་གྲངས་འཇུ་བཟུང་གིས་གཞིས་རྩེ་སོགས་ལ་བཙན་ཁྲིད་བྱས་ནས་མནར་གཅོད་དྲག་པོའི་འོག འགའ་ཞིག་ལྟོགས་ཤི་དང༌། འགའ་ཞིག་རང་ཤི འགའ་ཞིག་མནར་གཅོད་ཀྱིས་གྲོངས་ནས་ལྷག་འཕྲོས་མི་གྲངས་བཅུ་གཉིས་ཙམ་ལས་རང་ཡུལ་དུ་ཕྱིར་ལོག་ཐུབ་མེད། དམངས་རྣམས་བཙོན་འཇུག་འོག་རིམ་པར་སྐྱ་ས་འཛིན་དུ་བཅུག་པ་སོགས་བྱུང༌། དགོན་གནས་འདི་ཉིད་ཆ་ཚང་རྩ་གཏོར་བཏང་ནས་གྱང་རོ་རེ་ཟུང་ལས་ལྷག་མེད་པ་ཀུན་གྱིས་མཐོང་ཆོས་དང༌། ཕྱི་ལོ་ ༡༩༥༩ ལོའི་དུས་འགྱུར་སྐབས་སུ་དགེ་འདུན་པ་འགའ་ཞིག་བཙན་བྱོལ་དུ་འབྱོར་ནས་སྤྱི་ནོར་ྋགོང་ས་ྋསྐྱབས་མགོན་ྋརྒྱལ་དབང་སྐུ་ཕྲེང་བཅུ་བཞི་པ་ཆེན་པོའི་ཐུགས་རྗེས་ཐོག་མར་ཤར་ཁུམ་འཇའ་ས་གཞིས་ཆགས་སུ་གཞིས་དགོན་ཐུབ་བསྟན་ཆོས་གླིང་དུ་བཞུགས། ཕྱི་ལོ་ ༡༩༨༡ ལོ་ནས་བཟུང་བལ་ཡུལ་མཆོད་རྟེན་རིན་པོ་ཆེའི་ཉེ་འགྲམ་དུ་དགོན་གནས་གསར་བཞེངས་ཀྱིས་ ༢༠༠༠ ལོར་ཡོངས་སུ་ལེགས་པར་གྲུབ། ད་ལྟའི་ཆར་དབུ་བཞུགས་བླ་མ་རྗེ་བཙུན་བླ་མ་སངས་རྒྱས་བསྟན་འཕེལ་དཔལ་བཟང་པོ་མཆོག་གི་སྐུ་ཕྲེང་བཞི་པ་ཤེལ་ཆོས་སངས་བསྟན་སྤྲུལ་སྐུ་བློ་བཟང་བསྟན་དར་མཆོག་ཡིན། ཁོང་གི་ཐོས་བསམ་སློབ་གཉེར་གནང་རྗེས་སྔ་མོ་ནས་ཐུགས་འདུན་ལྟར་བལ་ཡུལ་ཡོལ་མོར་བྱ་བྲལ་རི་ཁྲོད་དུ་ལོ་གསུམ་བཞུགས། དེ་ནས་དྷ་ས་བཞུགས་སྒར་བོད་ཁྱིམ་སྟེང་བྱ་བྲལ་གྱི་ཚུལ་དུ་བཞུགས་བཞིན་པའི་སྐབས་ཤེལ་ཆོས་གྲྭ་ཚང་ནས་ྋགོང་ས་ྋསྐྱབས་མགོན་ཆེན་པོ་མཆོག་ལ་སྙན་ཞུ་ཕུལ་དོན་ལྟར་ྋགོང་ས་མཆོག་གིས་ཡེ་ཤེས་དབྱིངས་དཔྱད་ཀྱིས་དགེ་བཤེས་སངས་རྒྱས་བསྟན་འཕེལ་སྐུ་ཕྲེང་བཞི་པའི་ཡང་སྲིད་དུ་ཕྱག་རྟགས་བཀའ་བཞེས་ཟབ་མོ་སྤྱི་བོའི་རྒྱན་དུ་གནང་བས། ད་ལྟ་ཁོང་དང་དགེ་འདུན་ཞལ་གྲངས་ ༡༡༠ ལྷག་ཙམ་གྱིས་གཞུང་ཆེན་ཁག་ལ་སློབ་གཉེར་དང༌། གསང་བདེ་འཇིགས་གསུམ་སོགས་ཀྱིས་མཚོན་པའི་ཆོ་ག་ཕྱག་ལེན་སོགས་མི་ཉམས་གོང་འཕེལ་གནང་མུས་ཡིན།། །།

༄༅། །མཁའ་རི་དགའ་ལྡན་བསྟན་འཕེལ་གླིང་ནི། ལ་སྟོད་དིང་རི་རྫོང་གི་མངའ་ཁོངས་སུ་གཏོགས་པའི་བདེ་མཆོག་གི་གནས་རི་དུང་དཀར་གཡས་འཁྱིལ་འདྲ་བའི་རི་བོ་ངོ་མཚར་ཅན་མཁའ་རི་ཞེས་པ་ཞིག་ཡོད་པ་དེར་ཆགས་པས། མཁའ་རི་ཞེས་རི་བོའི་མིང་དགོན་པར་ཐོགས་པ་ཡིན་ཞིང༌། དེ་ཡང་གནའ་སྔ་མོའི་དུས་ནས་བྱུང་བའི་དགོན་པ་ཉམས་ཆག་རྩ་གཏོར་གྱང་རོར་ཕྱིན་ནས་ཉམས་མི་དགའ་བའི་བློ་ཕམ་གྱི་གནས་ལ་བརྟེན། ལོ་རྒྱུས་རང་བཞིན་ལྡན་པའི་དགོན་གནས་དེ་མུར་བདག་མེད་དུ་འཇོག་པ་བློས་མ་བཟོད་དེ། ༸སྐྱབས་རྗེ་མཁའ་རི་རིན་པོ་ཆེ་བློ་བཟང་ཚུལ་ཁྲིམས་མཆོག་ནས་དགོན་གནས་དེར་སྒྲུབ་དགོན་ཞིག་གསར་བཞེངས་གནང་རྒྱུའི་དགོངས་པ་འཁྲུངས་པ་དང༌། དགོན་པ་ཆགས་སར་སྔོ་དཀར་དམར་སེར་དང་མཚལ་སོགས་རང་བྱུང་གཏེར་ཁས་ཕྱུག་ཅིང༌། མདུན་རིའི་གཤམ་འདབས་སུ་གཏོར་འཕྲོས་ཟེར་བ་རང་བྱུང་བྲག་རི་རྩམ་པའི་གཏོར་མ་དངོས་སུ་བཤམས་པ་ཇི་བཞིན་བརྒྱ་ཕྲག་དུ་མ་སྟར་བསྒྲིགས་སུ་ཆགས་པའི་ངོ་མཚར་ཅན། མཐའ་འཁོར་ལ་ཡོངས་གྲགས་སྒྲུབ་པའི་གནས་དགོན་རྩིབ་རི་སོགས་ཆགས་ཡོད་པ་དང༌། འཛམ་གླིང་ན་སྙན་གྲགས་ཆེ་བའི་ཇོ་མོ་གླང་མ་ཡང་འབྲེལ་མཚུངས་སུ་ཡོད་སར་༸སྐྱབས་རྗེ་མཆོག་ནས་ཕྱི་ལོ་ ༡༩༤༠ ལོར་མཁའ་རི་བསམ་གཏན་གླིང་གསར་དུ་ཕྱག་བཏབ། ཐོག་མར་དངོས་ཀྱི་ཞལ་སློབ་བཙུན་མ་བཅུ་ཙམ་དང་དགེ་སློང་བཞི་གྲྭ་བཅས་ཡོད་པ་རྣམས་ཀྱིས་འདུལ་བའི་དགོངས་འགྲེལ་གཞི་གསུམ་གྱི་ཕྱག་ལེན་གཙོ་བོར་གྱུར་པའི་སྔགས་ཕྱོགས་ཉམས་ལེན་ཡི་དམ་རྡོ་རྗེ་རྣལ་འབྱོར་མའི་བསྙེན་སྒྲུབ་དང༌། བདག་འཇུག་དཀྱིལ་འཁོར་སྒྲུབ་མཆོད་བཅས་ཕྱག་ལེན་དང༌། མདོ་ཕྱོགས་ནས་ལམ་རིམ་བདེ་ལམ་བཀའ་ཁྲིད་དང༌། སྦྱོར་ཆོས་ཉམས་བཞེས། ཆོ་འཕྲུལ་སྨོན་ལམ། ས་ཟླའི་དུས་ཆེན་བཅས་པར་སྨྱུང་གནས་དཀར་པོ་ཆ་བརྒྱད་སྲུང་སྒྲུབ་ཐོག རྣམ་ཀུན་ཆོས་སྤྱོད་གསན་བསམ་སློབ་གཉེར་སོགས་བསྟན་འགྲོར་སྨན་པའི་ཆོས་འཁོར་རྒྱ་ཆེར་བསྐོར་བར་གནང་བའི་མཚན་སྙན་ཕྱོགས་ཁྱབ་ཏུ་སོང་བའི་མཐུས། ཕྱི་ལོ་ ༡༩༥༩ ལོའི་དུས་འགྱུར་མ་བྱུང་སྔོན་ལ་དགོན་པར་བཙུན་མ་དགུ་བཅུ་ཙམ་དང༌། དགེ་འདུན་བཅུ་སྐོར་རིམ་འཕར་གྱིས་དར་རྒྱས་ཆེས་ཆེར་བྱུང་ཡོད། ལོ་དེར་རྒྱ་གཞུང་གིས་བསམ་ཡུལ་ལས་འདས་པའི་བཙན་གནོན་འོག་དགོན་གནས་འདི་ཉིད་ཀྱང་རྩ་གཏོར་བཏང་སྟེ་མཆོད་ཆས་རྩ་ཆེན་ཚང་མ་རྒྱ་ནག་ལ་དབོར་འདྲེན་བྱས་པ་དང༌། གྲྭ་བཙུན་མང་པོ་བཙོན་ལ་བཅུག་ནས་མི་སྤྱོད་ལས་འདས་པའི་དྲག་གནོན་ཚད་མེད་བཏང་བའི་རྐྱེན་གྱིས་ྋསྐྱབས་རྗེ་མཆོག་ཀྱང་དེ་མུར་བཞུགས་ཐབས་བྲལ་ཏེ་ཞལ་སློབ་གྲྭ་པ་བཞི་དང་བཙུན་མ་གསུམ་བཅས་ཁུམ་བུ་སྣང་བའི་ལ་མོ་བརྒྱུད་ཤར་ཁུམ་བུ་རུ་སྐྱབས་བཅོལ་ལ་ཕེབས་ནས་ཐོག་མར་སྐྱབས་རོགས་ཞེས་པར་ལོ་གཉིས་ཙམ་བཞུགས། དེ་ནས་ཕྱི་ལོ་ ༡༩༦༡ ལོར་རྫ་ཐོག་ཞེས་པར་སྒྲུབ་ཁང་ཞིག་གསར་སྐྲུན་གནང་འཆར་འཁྲུངས་ཏེ་ཕེབས་ཞོར་གྲོ་མོར་གསོལ་ཚ་ཞིག་བསྐྱོན་ནས་བཞུགས་སྐབས། ཁུལ་དེའི་ཤར་པ་ཡུལ་མི་རྣམས་ཀྱིས་རིན་པོ་ཆེའི་མཛད་སྤྱོད་ལ་ཡིད་ཀྱི་གཏིང་ནས་དད་ཞེན་ལྷག་པར་སྐྱེས་ཏེ་འདི་ག་རང་དུ་རྒྱུན་བཞུགས་གནང་རོགས་ཞེས་གསོལ་འདེབས་ཞུས་པ་མ་ཟད། ལྷག་པར་དུ་དད་ལྡན་ཤར་པ་ཨང་སྲི་ཐར་དང་ཨང་སྤེན་པ་ཟླ་བ་ནོར་བུ་བཅས་ནས་ད་ལྟའི་དགོན་གནས་ས་ཆ་ཕུལ་ཏེ། འདི་གར་གཏན་བཞུགས་ཡོང་བའི་གསོལ་བ་ཕུར་ཚུགས་སུ་བཏབ་པར་བརྟེན་གདུལ་བྱའི་ཁམས་དང་མཐུན་པའི་ཞལ་བཞེས་ལེགས་པར་གནང་ནས། གདུལ་བྱར་སྨན་པའི་འགྲོ་དོན་རྒྱ་ཆེར་མཛད་ནས་ལོ་གཉིས་ཙམ་རིང་བླ་སློབ་ཚང་མ་གུར་ནང་བཞུགས་དགོས་བྱུང་བས་ཉི་ལྷགས་ཆར་གསུམ་གྱི་སྐུ་ངལ་ལྷུར་བཞེས་གནང་དགོས་བྱུང་། དེ་ནས་ཕྱི་ལོ་ ༡༩༦༢ ལོར་མཁའ་རི་དགའ་ལྡན་བསྟན་འཕེལ་གླིང་གི་གྲྭ་བཙུན་རྣམས་ཀྱི་ཚོགས་ཁང་འདུལ་བའི་བཅའ་ཁྲིམས་ལྟར་སྤྲོས་བྲལ་གྲོན་ཆུང་ཐོག་གསར་བཞེངས་ཀྱིས་འཛམ་གླིང་ཞི་བདེའི་དེད་དཔོན་སྤྱི་ནོར་ྋགོང་ས་སྐྱབས་མགོན་ྋརྒྱལ་དབང་ཐམས་ཅད་མཁྱེན་པ་མཆོག་ནས་མཁའ་རི་དགའ་ལྡན་བསྟན་འཕེལ་གླིང་ཞེས་མཚན་གསོལ། དེའི་སྐབས་ྋསྐྱབས་རྗེ་མཆོག་གིས་ཐུགས་བསྐྱེད་ལས་དགོན་གནས་འདིར་གཞི་གསུམ་གྱི་ཕྱག་ལེན་སོགས་སྔོན་གྱི་ཆོས་ཕྱོགས་ཀྱི་མཛད་རིམ་རྣམས་མི་ཉམས་རྒྱུན་འཛིན་དང༌། གྲྭ་བཙུན་སློབ་མའི་ཚོགས་ཀྱང་འཕེལ་རྒྱས་ཇེ་ཆེར་བྱུང་། ཕྱི་ལོ་ ༡༩༦༩ ལོར་གདུལ་བྱ་རྟག་འཛིན་ཅན་རྣམས་ཆོས་ལ་བསྐུལ་ཕྱིར་དགོངས་པ་ཆོས་དབྱིངས་སུ་གཤེགས་པ་མ་ཟད། སྐུ་ཕྲེང་གཉིས་པ་བསྟན་འཛིན་འོད་ཟེར་མཆོག་ཀྱང་སྐུ་ནར་མ་སོན་གོང་སྐུ་གེགས་བར་ཆད་ཀྱིས་དགུང་ལོ་བདུན་ཐོག་སྐུ་གཤེགས་ནས་སློབ་མ་དད་ཅན་རྣམས་ཡིད་སྐྱོ་བའི་གནས་སུ་གྱུར། དེ་ནས་ཕྱི་ལོ་ ༡༩༨༠ ཟླ་ ༩ ཚེས་ ༦ ཉིན་འཁྲུངས་པའི་མཁའ་རི་རིན་པོ་ཆེ་སྐུ་ཕྲེང་གསུམ་པ་བསྟན་འཛིན་ཡོན་ཏན་མཆོག་དགུང་གྲངས་དྲུག་ལ་ཕེབས་སྐབས་སྤྱི་ནོར་ྋགོང་ས་༸སྐྱབས་མགོན་ཆེན་པོ་མཆོག་གིས་མཁའ་རི་སྤྲུལ་སྐུའི་ཡང་སྲིད་དུ་ངོས་འཛིན་ཕྱག་རྟགས་བཀའ་དྲིན་བསྩལ། དགུང་གྲངས་བདུན་ལ་རྒྱ་གར་གནས་མཆོག་རྡོ་རྗེ་གདན་དུ་ྋགོང་ས་མཆོག་ལ་ཞལ་མཇལ་ཞུས་ཏེ་དབུ་སྐྲ་གཙུག་ཕུད་ཕུལ་སྐབས། ྋགོང་ས་མཆོག་གིས་གདན་སར་ཆོས་ཞུགས་ཀྱིས་གསན་བསམ་སློབ་གཉེར་གནང་དགོས་སྐོར་བཀའ་ཕེབས་དོན་བཞིན། ཕྱི་ལོ་ ༡༩༩༠ ལོར་གདན་ས་ཆེན་པོ་སེ་ར་ཐེག་ཆེན་གླིང་གི་ཡ་གྱལ་སེར་སྨད་ཐོས་བསམ་ནོར་གླིང་གྲྭ་ཚང་དུ་ཆོས་ཞུགས་ཀྱིས་གཞུང་ཆེན་ཁག་ལ་གསན་བསམ་སློབ་གཉེར་གནང་བཞིན་དུ་ལོ་རེའི་ཟླ་བ་གཉིས་གསུམ་རིང་ཤར་ཁུམ་རང་དགོན་ལ་ཕེབས་ཏེ་དགོན་གྱི་གནས་སྟངས་སོགས་ལ་གཟིགས་རྟོག་གནང་། དེའི་སྐབས་བཙུན་མ་རྣམས་དེ་ཁུལ་གྲོང་གསེབ་ཁག་ལ་ཕེབས་ནས་བསོད་སྙོམས་ཞུ་བ་དང་དེའི་འཕྲོས་སོ་སོའི་ནང་མི་སྤུན་མཆེད་ནས་སྒྲུབ་པ་སོགས་ལོ་རེར་འཚོ་ཐབས་འགྲིག་ཙམ་ཞིག་ཡོད་ཀྱང༌། ནང་ཆོས་སློབ་གཉེར་སོགས་ཀྱི་མཐུན་རྐྱེན་ཞན་པས་རིན་པོ་ཆེ་མཆོག་སྐུ་ན་ཕྲ་ཡང་དགུང་གྲངས་བཅུ་དྲུག་ཙམ་ནས་དགོན་པའི་ཐུགས་འགན་བཞེས་ཏེ་བཙུན་མ་རྣམས་ལ་བོད་ཡིག་འབྲི་ཀློག་དང་རིག་གནས་སློབ་གཉེར། ཆོས་ཕྱོགས་ཀྱི་ལམ་སྟོན་བཀའ་སློབ་སོགས་ཡང་ནས་ཡང་དུ་བསྩལ། ཕྱི་ལོ་ ༡༩༩༩ ལོར་ཕར་ཕྱིན་གཞུང་ལ་གསན་བསམ་གནང་བའི་འབྲས་རྟགས་གྲྭ་ཚང་ཚོགས་དབུས་སུ་རིགས་ཆུང་ཚོགས་ལངས་ལེགས་པར་བཞེངས་གནང་བ་དང༌། དེ་ནས་སྔར་གྱི་ཚོགས་ཁང་གི་རྩིག་པ་ཞིག་རལ་ཉམ་གོག་ཏུ་སོང་བས་ཆར་ཆུ་མི་འཚོག་པ་སོགས་ཐུགས་ཀྱིས་མ་བཟོད་པ་དང་སྐུ་གོང་མའི་ཞལ་སློབ་རྣམས་སྐུ་ན་བགྲེས་ཤིང༌། གཞོན་སྐྱེས་རྣམས་ཉམས་མྱོང་སློབ་སྦྱོང་སོགས་དམན་པས་དགོན་པར་སེམས་ཁུར་ཡོད་ཀྱང་འགན་བཞེས་ཐུབ་མཁན་ཞིག་མ་བྱུང༌བར་བརྟེན། མཆོག་སྤྲུལ་རིན་པོ་ཆེ་མཆོག་ནས་ཕྱི་ལོ་ ༢༠༠༢ ལོར་བོད་མིའི་དབུ་ཁྲིད་ྋགོང་ས་རྒྱལ་བའི་དབང་པོ་མཆོག་སེ་ར་ཆོས་སྒར་དུ་ཆིབས་བསྒྱུར་གནང་སྐབས་གཟིམ་ཆུང་མཇལ་བཅར་གྱི་སྐལ་བཟང་གོ་སྐབས་བྱུང་བར་དགོན་གྱི་གནས་སྟངས་སོགས་ཐུགས་བརྟག་གསོལ་འདེབས་ཞུས་པར། ཐུགས་སྨོན་དང་འབྲེལ་དགོན་པ་འདི་ཉིད་མཐའ་མཚམས་སུ་སོང་མ་འོངས་པར་ཕན་ཐོགས་ཆེ་བ་དང༌། གསར་བཞེངས་ཀྱང་སྔོན་གྱི་དགོན་གནས་སུ་ལེགས་ཚུལ་བཀའ་སློབ་བཀའ་དྲིན་ཆེ་བ་བཞིན། དགོན་པ་གསར་བཞེངས་ཀྱི་དགེ་བའི་ལས་ལ་འཇུག་རྒྱུའི་ཐུགས་བསྐྱེད་ཆེས་ཆེར་ཐོག རིན་པོ་ཆེས་དགེ་རྒན་དང་དགོན་པའི་འགན་འཛིན་གཅིག་ལྕོགས་གནང་བཞིན་པའི་དགེ་བཤེས་བསྟན་འཛིན་དར་རྒྱས་དང་བཀའ་བསྡུར་གྱིས་འབྲེལ་ཡོད་ཁག་ལ་འགྲོ་གྲོན་རེ་སྐུལ་ཞུས། དེ་ནས་ཕྱི་ལོ་ ༢༠༠༣ ལོར་མཆོག་སྤྲུལ་རིན་པོ་ཆེ་བསྟན་འཛིན་ཡོན་ཏན་མཆོག་གིས་བཀའ་དགོངས་ལམ་སྟོན་བཞིན་དགོན་པ་གསར་བཞེངས་དབུ་འཛུགས་ཀྱིས་ཕྱི་ནང་རྟེན་དང་བརྟེན་པར་བཅས་པའི་བཟོ་དབྱིབས་སོགས་ཀྱི་འཆར་བཀོད་ཚང་མ་མཆོག་སྤྲུལ་རིན་པོ་ཆེས་ཐུགས་འགན་གཙང་བཞེས་གནང་ཐོག དགེ་བཤེས་བསྟན་འཛིན་དར་རྒྱས་ལགས་ནས་ཕྱག་རོགས་གཙོ་བཞེས་དང་བཙུན་མ་ཡོངས་ནས་ཚོགས་བསགས་སྒྲིབ་སྦྱོང་གི་ཀུན་སློང་དང་འབྲེལ་རང་ནུས་གང་ཐུབ་ཀྱིས་ས་རྡོ་དབོར་འདྲེན་གྱིས་མཚོན་པའི་ལས་རིགས་མཐའ་དག་དཀའ་ངལ་ཁྱད་དུ་བསད་ནས། ལོ་རེར་ཟླ་བ་གསུམ་བཞིའི་རིང་ཕྱག་ལས་རྣམ་དག་གནང་བ་དང༌། དེ་ནས་རིན་པོ་ཆེའི་བཀའ་དགོངས་བཞིན་ཟླ་བ་བཞི་ཙམ་རིང་སྐུ་གོང་མའི་ཕྱག་ལེན་གཞིར་བཟུང་ལམ་རིམ་འཆད་ཉན་གཙོ་བོར་གྱུར་པའི་འདོན་རྟ་དབྱངས་གསུམ་དང༌། བོད་ཡིག་རིག་གནས། དེང་དུས་དགོས་མཁོ་དང་མཐུན་པའི་ཨིན་ཡིག་སློབ་སྦྱོང༌། དགུན་དུས་སུ་མཚམས་བསྙེན་སྒྲུབ་གནང་འདུན་ཡོད་རིགས་རྣམས་བསྙེན་སྒྲུབ་དང༌། དེ་མིན་དཔེ་ཆ་བློ་འཛིན་སོགས་རྣམ་དཀར་དགེ་བའི་ལས་ལ་བརྩོན་བཞིན་གནས། ཕྱི་ལོ་ ༢༠༠༦ ལོར་རང་ཅག་ཁ་བ་རི་པ་རྣམས་ཀྱི་ྋམགོན་སྐྱབསྋ་གོང་ས་མཆོག་གིས་ཐུགས་སྨོན་དང་འབྲེལ་བསྟན་པའི་བདག་པོ་སྟོན་པ་ཐུབ་པའི་དབང་པོའི་སྐུ་བརྙན་བྱིན་ཅན་ཞིག་དགོན་པའི་དད་རྟེན་དུ་གནང་བ་བཀའ་དྲིན་བླ་མེད་དུ་ཆེ་ཞིང༌། དེང་གི་ཆར་ྋགོང་ས་མཆོག་གི་ཐུགས་རྗེ་འོད་ཟེར་དང་སྒོས་སུ་ྋསྐྱབས་རྗེ་མཆོག་སྤྲུལ་རིན་པོ་ཆེའི་ཐུགས་བསྐྱེད། དགེ་བའི་བཤེས་གཉེན་དགེ་བཤེས་བསྟན་འཛིན་དར་རྒྱས་མཆོག་དང༌། རང་དགོན་གྱི་བཙུན་མ་ཡོངས་ཀྱིས་ཕྱར་གྲུ་མཉམ་འདེགས། དད་སྦྱིན་འབྲེལ་ཡོད་ཁག་ནས་མཐུན་འགྱུར་རོགས་རམ་སོགས་ལ་བརྟེན་ནས་ད་ཆ་གཙུག་ལག་ཁང་རྟེན་དང་བརྟེན་པར་བཅས་པ་ཡོངས་སུ་གསར་བཞེངས་ལེགས་པར་གྲུབ། ད་ཆ་གྲྭ་པ་ ༧ དང་བཙུན་མ་ ༢༨ བཞུགས་པ་རྣམས་ཀྱིས་རྒྱུན་གཏན་གསན་བསམ་སློབ་གཉེར་ཐོག ལོ་ལྟར་ྋརྒྱལ་བའི་ཞབས་རིམ་བཀའ་འགྱུར་དག་འདོན་དང་། སྒྲོལ་མ་འབུམ་ཐེར་སོགས་གང་ལེགས་གསོག་སྒྲུབ་ཞུས་དང་ཞུ་མུས་ཡིན།། །།

༄༅། །མང་ཡུལ་གུང་ཐང་སྨད་ཀྱི་བཙུན་དགོན་ཐུགས་རྗེ་ཆོས་གླིང་ནི། བལ་ཡུལ་དང་ཉེ་བའི་མཚམས་སུ་ཤིང་སྣ་འཛོམས་ལ། དྲོ་གྲང་སྙོམས་པ་མ་ཟད། བོད་གངས་ཅན་ལྗོངས་ཀྱི་ལྷ་སྐལ་འཕགས་པ་ཝ་ཏི་བཟང་པོའི་སྐུ་བརྙན་ངོ་མཚར་ཅན་བཞུགས་པའི་ཡུལ་གྱི་བཀོད་པ་ཕུན་སུམ་ཚོགས་པའི་སྐྱིད་གྲོང་ཁུལ་དུ་ཕྱི་ལོ་བརྒྱ་ཕྲག་ཉི་ཤུ་པའི་འགོ་སྟེ་ཕྱི་ལོ་ ༡༩༣༠ ཡས་མས་སུ་འབྲུག་པ་རིན་པོ་ཆེ་སྐུ་གོང་མ་ངག་དབང་དཔལ་བཟང་གིས་ཕྱག་བཏབ། དེ་ཡང་འབྲུག་པ་རིན་པོ་ཆེ་བོད་དུ་ཕེབས་ནས་བོད་དབུས་ཀྱི་གདན་སར་སློབ་གཉེར་གནང་སྟེ་དགེ་བཤེས་ལྷ་རམས་པ་ཨང་དང་པོའི་མཚན་ཐོབ་ཅིང་། རིས་མེད་ཀྱི་བླ་ཆེན་ཁག་གི་ཞལ་སྔ་ནས་ལམ་རིམ་སོགས་དབང་ལུང་མན་ངག་དུ་མ་གསན་བསམ་རྒྱ་ཆེར་གནང་ནས་དགུང་གྲངས་བཞི་བཅུ་ཞེ་བརྒྱད་ཙམ་ལ་སླར་འབྲུག་ཡུལ་དུ་ཕྱི་ལོག་གནང་ནས་བཞུགས་བཞིན་པའི་སྐབས་འབྲུག་རྒྱལ་པོ་མཆོག་ནས་མཆོད་རྟེན་བྱ་རུང་ཁ་ཤོར་དང་འཕགས་པ་ཤིང་ཀུན་ཉམས་གསོའི་ཆེད་དུ་འབྲུག་པ་རིན་པོ་ཆེ་བལ་ཡུལ་དུ་བཏང་། མཆོད་རྟེན་བྱ་རུང་ཁ་ཤོར་དང་འཕགས་ཤིང་ཉམས་གསོ་ལེགས་གྲུབ་རྗེས་རིན་པོ་ཆེ་བོད་ནུབ་ཕྱོགས་རྫོང་དཀར་དང་སྐྱིད་གྲོང་ཁུལ་དུ་རྗེ་མི་ལའི་གནས་ཆེན་ཁག་དང་། ཆོས་རྒྱལ་སྲོང་བཙན་སྒམ་པོས་བཞེངས་པའི་བྱམས་སྤྲིན་ལྷ་ཁང༌། སྐྱིད་གྲོང་ཇོ་བོ་ཝ་ཏི་བཟང་པོ་སོགས་གནས་གཟིགས་གནང༌བ་མ་ཟད། ཇོ་བོ་ཝ་ཏི་བཟང་པོའི་ལྷ་ཁང་དུ་སྨྱུང་གནས་བརྒྱ་ཚར་གཏོང་གནང་མཛད་པའི་རྗེས་སུ་རིན་པོ་ཆེ་དེ་གའི་ཉེ་འདབས་སྤང་ཤིང་ཞེས་སྤང་ལྗོངས་ཡིད་དུ་འོང་བའི་གཞུང་དུ་ཆུ་རྒྱུན་དལ་གྱིས་འབབ་པའི་སར་རས་དཀར་གྱི་གུར་ཕུབ་སྟེ་ཉིན་ཤས་སྤྲོ་གསེང་དུ་བཞུགས་པའི་ནུབ་མོ་ནམ་མ་ལངས་ཙམ་གྱི་མནལ་ལམ་དུ་ས་དེ་གའི་འོག་ནས་གླང་ཆེན་དཀར་པོ་ཞིག་ཐོན་ཏེ་ས་རྒྱ་ཆེ་ཙམ་ཞིག་ལ་གཡས་བསྐོར་གྱིས་རང་གནས་སུ་ཐིམ་པའི་མནལ་ལྟས་ངོ་མཚར་ཅན་ཞིག་བྱུང་། སང་ནམ་ལངས་ནས་ས་དེར་ཕེབས་ནས་བརྐོས་པས། རྡོ་དཀར་པོ་སོར་བཞི་ཙམ་གྱི་ངོས་སུ་འཕགས་པ་སྤྱན་རས་གཟིགས་བཅུ་གཅིག་ཞལ་གྱི་སྐུའི་རྣམ་པ་གསལ་ངེས་ཤིག་དང༌། རྡོའི་བུམ་པ་ཆུས་གང་བ་ཞིག་ཐོན་པ་གཉིས་རང་ཉིད་བཞུགས་གནས་སུ་གདན་ཞུ་གནང་བའི་སྤྱན་སྔར་སྨྱུང་གནས་ལ་སོགས་པའི་བསྟན་པ་རྒྱས་ཤིང་འགྲོ་ཀུན་བདེ་བའི་ཐུགས་སྨོན་གནང་ཐོག གླང་ཆེན་གྱིས་བསྐོར་བ་བརྒྱབ་པའི་ས་དེའི་རྒྱ་ཁྱོན་ལ་རྟོག་ཞིབ་སྐབས་ཤར་ནས་ནུབ་བར་མི་གོམ་བརྒྱ་དང་བརྒྱད་ཅུ་ཡོད་པ་དང༌། ལྷོ་ནས་བྱང་བར་ཡང་གོང་བཞིན་ཡོད་པའི་ས་ཆ་དེར་རྟེན་གྱི་གཙོ་བོར་སྤྱན་རས་གཟིགས་རྡོ་སྐུ་རང་བྱོན་གྱི་བཞུགས་གནས་ལྷ་ཁང་ཞིག་བཞེངས་ཐུབ་ན་གནས་མཇལ་དང་མཆོད་འབུལ་ཞུ་མི་རྒྱུན་མི་ཆད་པ་ཡོང་ངེས་བརྟེན། འགྲོ་བའི་བསོད་ནམས་གསོག་པའི་ཞིང་ཞིག་ཏུ་འགྱུར་རྒྱུར་དམིགས་ཏེ་སྐྱིད་གྲོང་ཐུགས་རྗེ་ཆོས་གླིང་བཙུན་དགོན་འདིེ་ཉིད་གསར་དུ་ཕྱག་བཏབ། ཐོག་མའི་ཆར་བཙུན་མ་གསར་ཞུགས་བཅུ་བདུན་ལ་དགེ་སློང་མ་དཔལ་མོའི་ལུགས་ཀྱི་དབང་ལུང་གནང༌། གཙུག་ལག་ཁང་གི་མཚན་དུའང་གྲུ་འཛིན་གཉིས་པ་ཐུགས་རྗེ་ཆོས་གླིང་ཞེས་བཏགས། རྒྱུན་དུ་བཙུན་མ་རྣམས་ཀྱིས་གཙོ་བོ་སྨྱུང་གནས་མཚོན་ཐུགས་རྗེ་ཆེན་པོའི་སྒོམ་བཟླས་ཉམས་བཞེས་གནང་གི་ཡོད། དེ་ནས་མི་རིང་བར་རིན་པོ་ཆེས་སླད་ཕྱིན་བཙུན་དགོན་དེ་ཉིད་བདག་འདོམས་འཛིན་སྐྱོང་སྐོར་ལ་བོད་གཞུང་བརྒྱུད་ྋགོང་ས་ལ་མཆོག་ལ་སྙན་གསན་ཞུས་དོན་ལྟར། རྒྱལ་མཆོག་སྐུ་ཕྲེང་བཅུ་གསུམ་པ་ཆེན་པོས་དགོན་པའི་གནས་འཛིན་ནམ་འཁྱོངས་བར་རིན་པོ་ཆེ་ནས་གནང་འཐུས་དང༌། དེ་རྗེས་རྫོང་དཀར་ཆོས་སྡེ་གྲྭ་ཚང་ལ་རྩིས་སྤྲོད་བྱ་དགོས་ཀྱི་བཀའ་ཡིག་སྤྱི་ཕེབས་ལྟར། སྐབས་ཤིག་རིན་པོ་ཆེ་ཉིད་ཡོལ་མོར་མཚམས་ཀྱི་བཅད་རྒྱར་བཞུགས་རིང༌། ཁོང་གི་སྐུ་ཚབ་འབྲུག་པའི་དགེ་སློང་རྣམ་རྒྱལ་འོད་ཟེར་སྐྱིད་གྲོང་དུ་མངགས་ཏེ། བཙུན་དགོན་ཐུགས་རྗེ་ཆོས་གླིང་སྣོད་བཅུད་ཡོངས་རྫོགས་རྫོང་དཀར་ཆོས་སྡེ་གྲྭ་ཚང་ལ་རྩིས་སྤྲོད་གནང་། ༡༩༥༩ ལོར་བོད་ལ་དུས་འགྱུར་བྱུང་སྐབས་གནས་འཛིན་རྫོང་དཀར་ཆོས་སྡེའི་སློབ་དཔོན་ཟུར་པ་བྱམས་པ་དཔལ་བཟང་མཆོག་གི་ཐུགས་ཁུར་འོག་བཙུན་མ་རྣམས་བལ་ཡུལ་ཡོལ་མོ་ཁུལ་དུ་འབྱོར། རྟེན་མཆོད་ཆས་རྣམས་བརླག་སྟོར་མི་འབྱུང་སླད་བལ་ཡུལ་དུ་འབྲུག་བླ་ཚེས་བཅུ་རིན་པོ་ཆེར་བཅོལ་འཇོག་ཞུས་ཏེ་། རེ་ཞིག་ཡོལ་མོར་གནས་སྡོད་བྱས་ཀྱང་རིམ་པས་བཙུན་མ་ཡོན་ཏན་དང་། ཚེ་རིང་སྒྲོལ་མ། ཡེ་ཤེས། སྤེན་པ་ལྷ་མོ། སངས་རྒྱས་ཆོས་སྒྲོན་བཅས་ལས་གཞན་རྣམས་འདས་གྲོངས་སུ་གྱུར་ཅིང་། ཕྱི་ལོ་ ༡༩༨༠ ཙམ་ལ་དགོན་པ་དང་ཤག་རྣམས་ཆུ་ལོག་གིས་བདས་ཏེ་གནས་མ་ཆགས་པར་གྱུར། དེ་རྗེས་སྤྱི་ནོར་ྋགོང་ས་༸སྐྱབས་མགོན་ཆེན་པོའི་བཀའ་སློབ་ལམ་སྟོན་འོག་བཙུན་མ་ཡོན་ཏན་དང་། ཡེ་ཤེས། སྤེན་པ་ལྷ་མོ། སངས་རྒྱས་ཆོས་སྒྲོན་བཅས་ནས་སེམས་ཤུགས་ཆེར་བསྐྱེད་ཀྱིས་རྒྱ་བལ་ཕྱོགས་གང་སར་ཞལ་འདེབས་བསྡུ་སློང་བྱས་ཏེ། བལ་ཡུལ་འཕགས་ཤིང་མཆོད་རྟེན་གྱི་ཉེ་འདབས་སུ་གཙུག་ལག་ཁང་དང་ཤག་རྣམས་གསར་རྒྱག་གི་རྨང་ཚུགས། བཙུན་མའི་གྲངས་འབོར་ཡང་རིམ་གྱིས་འཕེལ། ༡༩༩༡ ལོར་གཙུག་ལག་ཁང་རྟེན་དང་བརྟེན་པར་བཅས་གསར་བཞེངས་ལེགས་གྲུབ་བྱུང་སྟེ། རྫོང་དཀར་ཆོས་སྡེ་དགེ་འདུན་བཅུ་ཕྲག་བཞི་ལ་ཉེ་བས་རབ་ཏུ་གནས་པའི་ཆོ་ག་དང་འབྲེལ་སྒོ་འབྱེད་རྟེན་འབྲེལ་ཞུས། ༡༩༩༦ ནས་ ༢༠༠༤ བར་རྫོང་དཀར་ཆོས་སྡེའི་མཁན་ཟུར་ཐུབ་བསྟན་བརྩོན་འགྲུས་དང༌། དེ་རྗེས་ད་ལྟའི་རྫོང་དཀར་ཆོས་སྡེའི་མཁན་པོ་སློབ་དཔོན་བྱམས་པ་བཟོད་པ་བཅས་ཕེབས། ཁོང་རྣམ་པས་དུས་ཡུན་དེ་དག་གི་ནང་ཐིག་རྡུལ་ཚོན། ཆོ་ག་ཕྱག་ལེན། ལམ་རིམ་སོགས་ཁྲིད་དེ་བཤད་སྒྲུབ་ཀྱི་བྱ་བས་དུས་འདའ་བར་མཛད། ད་ཆ་བཙུན་དགོན་དེར་བཙུན་མ་ཁྱོན་ ༡༤༣ ཙམ་ཡོད་ཅིང༌། རྒྱུན་དུ་བཙུན་མ་རྣམས་གཞི་གསུམ་ཆོས་སྤྱོད་ཀྱི་ཉམས་བཞེས་གཙོ་བོར་གྱུར་པའི་བོད་ཀྱི་སྐད་ཡིག་དང་། དེང་རབས་ཨིན་ཇིའི་སྐད་ཡིག ཚད་མ་དང་ནང་དོན་མཚན་ཉིད་རིག་པའི་གཞུང་ལུགས་ཁག ཐིག་རྡུལ་ཚོན། འདོན་རྟ་དབྱངས་སོགས་ཐོས་བསམ་སློབ་གཉེར་བྱེད་བཞིན་ཡོད།། །།