༄༅། །སེར་སྨད་ཐོས་བསམ་ནོར་གླིང་གྲྭ་ཚང་ནི། ཐོག་མར་བོད་དུ་འཇམ་མགོན་བླ་མ་ཙོང་ཁ་པ་ཆེན་པོའི་དངོས་སློབ་ཀུན་མཁྱེན་བྱང་ཆུབ་འབུམ་པ་དཔལ་བཟང་པོ་མཆོག་གིས་རབ་བྱུང་བདུན་པའི་ལྕགས་གླང་ཕྱི་ལོ་༡༤༢༡ལོར་ཕྱག་བཏབ། བོད་དུ་ཐོག་མར་གྲྭ་ཚང་འདི་ཉིད་ཕྱག་བཏབ་པ་ནས། ཀློག་པ་ཐོས་བསམ་དང་སྤོང་བ་བསམ་གཏན་གྱི་དགེ་སྦྱོར་ལ་བརྩོན་ནས་མཁས་གྲུབ་གཉིས་ལྡན་གྱི་སྐྱེས་ཆེན་དམ་པ་ཆུ་བོའི་རྒྱུན་བཞིན་བྱོན་ཏེ། ྋརྒྱལ་བའི་ལུང་རྟོགས་ཀྱི་བསྟན་པ་སྤྱི་དང༌། ཡང་སྒོས་འཇམ་མགོན་རྒྱལ་བ་གཉིས་པ་རྗེ་ཙོང་ཁ་པ་ཆེན་པོའི་བསྟན་པ་རིན་པོ་ཆེ་མི་ཉམས་རྒྱུན་འཛིན་དང་སྐྱེ་འགྲོའི་བསོད་ནམས་ཀྱི་ཞིང་དམ་པར་གནས་ཤིང༌། རིམ་གྱིས་གྲྭ་ཚོགས་འཕེལ་བས་ཁང་ཚན་བཅུ་དྲུག་ཏུ་དབྱེ་བ་ཕྱེ་ཡོད། ཕྱི་ལོ་༡༩༥༩ལོར་དུས་འགྱུར་བྱུང་བ་ནས་གྲྭ་ཚང་འདིའི་དགེ་འདུན་མི་ཉུང་བ་ཞིག་རྒྱ་གར་ལ་བཙན་བྱོལ་དུ་ཕེབས་ཐུབ་པ་བྱུང་ཞིང༌། ཐོག་མར་སྦག་ས་ཆོས་སྒར་དུ་ས་བབ་འཕྲོད་བསྟེན་སོགས་ཀྱི་དཀའ་ངལ་ཆེན་པོའི་འོག་སྔར་སྲོལ་ཆོས་ཕྱོགས་ཀྱི་བྱེད་སྒོ་ཁག་གི་འཕྲོ་རྒྱུན་མཐུད་དེ་ལོ་ཤས་གནས། དེ་ནས་མཐར་ཕྱི་ལོ་༡༩༦༣ཟླ་༡༢ཚེས་༡༣ཙམ་ལ་མེ་སོར་སྦེལ་ཀོབ་གཞིས་ཆགས་སུ་གནས་སྤོས་རྗེས་བོད་ནས་ཕེབས་པའི་དགེ་འདུན་བགྲེས་པ་རྣམས་ཀྱིས་དགོན་པ་ཆགས་ཡུལ་གྱི་ཤིང་ནགས་གཅོད་འབྲེག་དང་། གྲྭ་ཤག་དང་ཚོགས་ཁང་སོགས་གསར་རྒྱག་གི་ལས་ལ་ལྷག་པར་བརྩོན་ཅིང༌། ྋརྒྱལ་བའི་བསྟན་པ་རིན་པོ་ཆེ་དེ་ཉིད་ཉམས་པ་སླར་གསོ་མི་ཉམས་གོང་འཕེལ་སླད་ངལ་བ་ཁྱད་དུ་བསད་དེ་ཕྱི་ལོ་༡༩༧༤ལོར་སེ་ར་བྱེས་སྨད་གྲྭ་ཚང་གཉིས་ཀྱི་འདུ་ཁང་གསར་བཞེངས་དང༌། ཕྱི་ལོ་༡༩༨༢ལོར་ཚོགས་ཆེན་འདུ་ཁང་ཆེན་མོ་ཕྱི་ནང་གཉིས་ཡོངས་རྫོགས་གསར་བཞེངས་ཞུས། ༡༩༨༧ལོར་སེར་སྨད་གྲྭ་ཚང་གི་གཙུག་ལག་ཁང་རྟེན་དང་བརྟེན་པར་བཅས་པ་ལེགས་གྲུབ་ཀྱིས་གྲྭ་ཚང་གི་སློབ་གཉེར་དང་འཛིན་སྐྱོང་གི་ལས་དོན་ཡར་རྒྱས་བྱུང་ཡོད། གྲྭ་ཚང་འདིར་ལོ་རེ་བཞིན་སློབ་གཉེར་བ་ཇེ་མང་དུ་ཕྱིན་ནས་སླར་ཡང་གཙུག་ལག་ཁང་གསར་བཞེངས་རྒྱ་སྐྱེད་ཀྱི་ལས་གཞི་བརྩམས་ནས། ཕྱི་ལོ་༢༠༠༢ལོར་རྟེན་དང་བརྟེན་པར་བཅས་པ་ལེགས་གྲུབ་ཀྱིས་གཙུག་ལག་ཁང་གསར་པའི་དབུ་འབྱེད་མཛད་སྒོར་སྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་དབུ་བཞུགས་ཐོགཉེ་བའི་རིགས་བདག་ྋསྐྱབས་རྗེ་བྱང་རྩེ་ཆོས་རྗེ་མཆོགགདན་ས་ཁག་གི་མཁན་ལས་ཟུར་རྣམ་པ། རིས་མེད་ཆོས་སྡེ་ཁག་གི་བླ་སྤྲུལ་རྣམ་པ། ས་གནས་ཀར་ན་ཀྲ་ཀ་མངའ་སྡེའི་བློན་ཆེན་མཆོགརང་གཞུང་ཆོས་དོན་བཀའ་བློན་གྱིས་མཚོན་འདིར་བཞུགས་ས་གནས་སེར་སྐྱ་ཕོ་མོ་དང༌། ཕྱོགས་མཐའ་ཁག་གི་ཆོས་ཞུ་བ་བཅས་མི་མང་ཁྲི་ཚོ་བརྒལ་བ་ལྷན་འཛོམས་ཐོག་ྋགོང་ས་མཆོག་གིས་དབུ་འབྱེད་རབ་གནས་བྱིན་རླབས་དང་འབྲེལ་གསུང་ཆོས་བཀའ་དྲིན་བསྩལ། ཕྱི་ལོ་༢༠༠༧ལོར་ཆོས་ར་རྒྱ་ཁྱོན་ཆུང་བ་དང༌། དབྱར་ཁ་ཆར་དུས་སུ་ཆུ་ཐིགས་ཟག་པ་སོགས་ཀྱི་དཀའ་སེལ་ཆེད་དད་ལྡན་ལྷག་བསམ་ཅན་དང༌། སློབ་མ་རྣམས་ལ་ཆོས་ར་ཉམས་གསོའི་ཆེད་འབོད་སྐུལ་ཞུས་ཏེ་ཉམས་གསོ་གནང་ཡོད། ད་ལྟའི་ཆར་འདི་ག་གྲྭ་ཚང་དུ་དགེ་འདུན་ཞལ་གྲངས་༡༣༢༧བཞུགས་པ་རྣམས་ཐུགས་མཐུན་ཁྲིམས་གཙང་ངང་འཕགས་བོད་མཁས་པའི་གསུང་རབ་སྤྱི་དང༌། ཁྱད་པར་འཇམ་མགོན་བླ་མ་ཙོང་ཁ་པ་ཡབ་སྲས་ཀྱི་ཡིག་ཆར་གཞིར་བཅོལ། གྲྭ་ཚང་གི་ཐུན་མིན་ཡིག་ཆའི་སྲོག་བཟུང༌། རྒྱལ་རབས་ལོ་རྒྱུས་ཆོས་འབྱུང་དང་སྙན་སུམ་སོགས་ཐུན་མོང་རིག་གནས་ཀྱིས་ཟུར་བརྒྱན་ཏེ་འཆད་རྩོད་རྩོམ་གསུམ་གྱི་སྒོ་ནས་བློ་བཟང་རྒྱལ་བ་གཉིས་པའི་མདོ་སྔགས་ཟུང་འབྲེལ་གྱི་བསྟན་པ་རིན་པོ་ཆེ་འདི་ཉིད་ཉམས་པ་སོར་ཆུད་དང་མི་ཉམས་གོང་སྤེལ་གནང་མུས་ཡིན། གྲྭ་ཚང་འདིའི་ཐོས་བསམ་སློབ་གཉེར་གནང་ཕྱོགས་ནི། འཛིན་གྲྭ་དང་པོ། ཁ་དོག་དཀར་དམར་སོགས་རིག་པའི་སྒོ་འབྱེད་བསྡུས་གྲྭ་ཆེ་འབྲིང་ཆུང་གསུམ་དང༌། ཅོ་ནེ་གྲགས་པ་བཤད་སྒྲུབ་ཀྱི་བློ་རྟགས། དེ་ནས་ཕར་ཕྱིན་གཞུང་གསར་འཛིན་གྲྭ། གཞུང་རྙིང་འཛིན་གྲྭ། གཞུང་རྙིང་གོང་མ། སྐབས་གཉིས་པ། སྐབས་བཞི་པ། ཟུར་བཀོལ་དང་པོ། ཟུར་བཀོལ་གཉིས་པ། དབུ་མའི་འཛིན་གྲྭ། དབུ་གསར་དང་པོ། དབུ་གསར་གཉིས་པ། དབུ་རྙིང་དང་པོ། དབུ་རྙིང་གཉིས་པ། འདུལ་བ་གཞི་སྟོད། འདུལ་མཛོད་འཛིན་གྲྭ། གཟན་རྐྱང་འཛིན་གྲྭ། འདུལ་བ་གཞི་སྨད། འཛིན་གྲྭ་གསུམ་པ། མཛོད་གནས་དང་པོ་བཞི། འཛིན་གྲྭ་གཉིས་པ། མཛོད་གནས་ཕྱི་མ་བཞི། འཛིན་གྲྭ་དང་པོ། འདུལ་མཛོད་ལ་བསྐྱར་སྦྱོང༌། དེ་ནས་ལྷ་རམས་འཛིན་གྲྭར་སླེབས་མཚམས་ལོ་རེའི་བོད་ཟླ་གཉིས་པར་མཛོད་དང༌། བོད་ཟླ་བཅུ་གཅིག་པར་འདུལ་བའི་དམ་བཅའ་ཚུགས་རྒྱུ་བཅས་དེ་ལྟར་ལོ་ངོ་བཅོ་བརྒྱད་རིང་མདོ་ཕྱོགས་གཞུང་ཆེན་བཀའ་པོད་ལྔའི་འགྲེལ་པ་དང་བཅས་པར་སློབ་གཉེར་དཔྱིས་ཕྱིན་པ་གནང་བཞིན་པ་བཅས་ཆོས་ཕྱོགས་ཀྱི་བྱ་བ་སྤྱི་དང༌། ཡང་སྒོས་གྲྭ་ཚང་འདི་ཉིད་ཀྱི་ལོ་རེའི་ཆོས་ཀྱི་བྱེད་སྒོ་རྩ་ཆེན་རྣམས་ཚུལ་བཞིན་དུ་སྒྲུབ་མུས་ཡིན། ཕྱི་ལོ་༡༩༧༦ལོར་སེར་སྨད་གྲྭ་ཚང་གི་སློབ་གྲྭ་གསར་དུ་བཙུགས་པ་དང༌། རྒྱ་གར་མངའ་སྡེ་གཞུང་གི་ངོས་ལེན་ཡོད་པའི་སློབ་གྲྭ་ཞིག་ཡིན། དེ་སྐབས་འཛིན་ཁང་སོགས་མེད་པས་ཀ་ཕིབས་དང༌། ཤིང་སྡོང་གི་གྲིབ་བསིལ་སོགས་ལ་འཛིན་གྲྭ་ཚོགས་ཤིང༌། བོད་ཀྱི་ཐུན་མོང་མིན་པའི་ཤེས་ཡོན་མི་ཉམས་གཅེས་འཛིན་དང༌། རྒྱུན་སྲོལ་མི་ཉམས་གོང་འཕེལ་ཆེད་དུ་དམིགས་པ་མ་ཟད། དེང་རབས་ཀྱི་ཤེས་ཡོན་ཡང་སློབ་ཁྲིད་གནང་གི་ཡོད། སློབ་གྲྭའི་ངོས་ནས་ཕྱི་རྒྱལ་རོགས་ཚོགས་ཁག་དང༌། ཕྱི་རྒྱལ་སྤུན་ཟླ་ཕོ་མོ་སོ་སོ་ནས་རོགས་དངུལ་མཐུན་འགྱུར་གནང་བ་རྣམས་སློབ་ཕྲུག་གི་ཞལ་ལག་དང་། འཕྲོད་བསྟེན། འབྲི་དེབ། སློབ་དེབ། ཤེས་ཡོན་ལ་སྨན་པའི་དགོས་མཁོ་སོགས་ཆེད་དུ་བེད་སྤྱོད་བྱེད་ཀྱི་ཡོད། དེ་རྗེས་༡༩༧༩ལོར་མཁན་རིན་པོ་ཆེ་བྱམས་པ་དོན་ཡོད་མཆོག་གྲྭ་ཚང་གི་མཁན་པོའི་འགན་བཞེས་གནང་སྐབས་འཛིན་ཁང་འགའ་ཞིག་དང༌། ས་ཆ་བཅས་གྲྭ་ཚང་ནས་སློབ་གྲྭར་གནང་བ་དང་བསྟུན། རྒྱ་ཅོག་དང་རྐུབ་སྟེགས་ཀྱང་གསར་བཟོ་གནང༌། དེ་བཞིན་སློབ་དེབ་དང་དགེ་རྒན་སོགས་ཕྱི་ནས་གདན་འདྲེན་ཞུས་ཏེ་རིམ་བཞིན་ཚགས་ཚུད་དང༌། ཡར་རྒྱས་དང་སྦྲགས་རྒྱ་སྐྱེད་གང་འཚམས་གནང་ཐུབ་པ་བྱུང༌། དེ་ལྟར་རིམ་བཞིན་ཡར་རྒྱས་གང་ལེགས་བྱུང་བ་ནི་གཙོ་བོ་ཕྱི་རྒྱལ་ཁག་ནས་རོགས་ཚོགས་དང༌། ཕྱི་རྒྱལ་སྤུན་ཟླ་ཕོ་མོ་སོགས་ནས་ཞལ་འདེབས་དང་སྦྱིན་བདག་གི་རོགས་རམ་མཐུན་འགྱུར་ཁོ་ནར་བརྟེན་ནས་བྱུང་བ་མ་ཟད། མཁན་རིན་པོ་ཆེ་རིམ་བྱོན་དང༌། མཁན་ཟུར་རིན་པོ་ཆེ་རྣམ་པས་ཐུགས་ཁུར་ཆེ་བཞེས་གནང་བ་ལ་བརྟེན་ནས་བྱུང་བ་ཞིག་ཡིན། དེ་ལྟར་དགེ་འདུན་པ་ལོ་ཆུང་ཚོའི་ཆེད་དུ་སློབ་གྲྭ་གསར་འཛུགས་དང་གཞན་ཡང་སྤྱི་ཚོགས་ཞབས་ཞུ་ལ་ཕན་པའི་སྨན་ཁང་དང་། ཟ་ཁང༌། མགྲོན་ཁང༌། ཚོང་ཁང་སོགས་འཛུགས་གཉེར་གྱིས་ཞབས་ཞུ་ཞུ་བཞིན་ཡོད་པ་དང༌། ྋགོང་ས་མཆོག་ནས་ཀྱང་དུས་དང་རྣམ་པ་ཀུན་ཏུ་ཐུགས་བརྩེས་མ་འོངས་བླང་དོར་ལམ་སྟོན་བཀའ་སློབ་ཟབ་མོ་བསྩལ་བའི་དགོངས་དོན་དེ་དག་སྙིང་དབུས་སུ་བཅངས་ཏེ། གྲྭ་ཚང་འདི་ཉིད་ཀྱི་ཆོས་སྲིད་མཛད་ཕྱོགས་ཀྱི་གེགས་སྐྱོན་ཇི་བྱུང་རྣམས་རིམ་སེལ་ཐོག་ཡར་རྒྱས་བཟང་ཕྱོགས་སུ་མདུན་སྐྱོད་གནང་བཞིན་ཡོད།། །།

༄༅། །སེར་བྱེས་མཁས་སྙན་གྲྭ་ཚང་ནི། ཕྱི་ལོ་ ༡༤༡༩ ལོར་སེ་ར་ཐེག་ཆེན་གླིང་ཕྱག་བཏབ་ནས་ལོ་ངོ་བཅུ་ཕྲག་ཁ་ཤས་ཀྱི་རྗེས་སུ་ཀུན་མཁྱེན་བློ་གྲོས་རིན་ཆེན་སེངྒེས་སེར་བྱེས་ཕྱག་བཏབ་པ་དང༌། གྲྭ་ཚང་འདི་ལ་ཁང་ཚན་ཉེར་གཅིག་ཡོད། དེ་དུས་སེར་བྱེས་གྲྭ་ཚང་ལ་གྲྭ་གྲངས་༥༦༢༩ཙམ་བྱུང་ཡོད་པ་དང༌། སློབ་གཉེར་བ་དེ་དག་གིས་དཔལ་ནཱ་ལནྡཱའི་པཎ་གྲུབ་དག་གི་དགོངས་འགྲེལ་གྱི་བསྟན་བཅོས་སྤྱི་དང༌། བཀའ་པོད་ལྔའི་རྩ་འགྲེལ་རྣམས་གཞི་ལ་བཞག་པའི་རྗེ་ཡབ་སྲས་རྣམས་ཀྱི་ལེགས་བཤད་རྣམས་དང༌། ཁྱད་པར་རྗེ་བཙུན་ཆོས་ཀྱི་རྒྱལ་མཚན་གྱི་གསུང་ཡིག་ཆར་བཟུང་སྟེ་འཛིན་གྲྭ་བསྡུས་སྦྱོར་ནས་ལྷ་རམས་དམ་བཅའ་ཆེན་མོའི་བར་མི་ལོ་ཉེར་ལྔ་ལྷག་གི་རིང་ཐོས་བསམ་སྒོམ་གསུམ་གྱི་ལམ་ནས་དམ་ཆོས་འཛིན་སྐྱོང་སྤེལ་གསུམ་བྱེད་ཀྱི་ཡོད། ལོ་རྒྱུས་ཐོག་གྲྭ་ཚང་འདི་ནས་དགའ་ལྡན་ཁྲིར་ཕེབས་མཁན་ཁྲི་ཆེན་བཅོ་ལྔ་དང༌། གྲྭ་ཚང་གི་མཁན་ཆེན་དུ་ཕེབས་པ་ཀུན་མཁྱེན་བློ་གྲོས་རིན་ཆེན་སེངྒེ་ནས་མཁན་ཆེན་བློ་བཟང་དོན་ཡོད་བར་བོད་དུ་མཁན་རབས་རེ་དྲུག་བར་ཕེབས་ཤིང༌། གཞན་ཡང་རྒྱུད་གྲྭ་སྟོད་སྨད་དང་ཤར་བྱང་གི་ཆོས་རྗེར་ཕེབས་མཁན་མང་དུ་བྱུང༌བ་མ་ཟད། སྲིད་སྐྱོང་རྭ་སྒྲེང་ཧོ་ཐོག་ཐུ་ཁྲི་ཆེན་བློ་བཟང་ཡེ་ཤེས་བསྟན་པ་རབ་རྒྱས་དང༌། རྭ་སྒྲེང་ཐུབ་བསྟན་འཇམ་དཔལ་ཡེ་ཤེས་བསྟན་པའི་རྒྱལ་མཚན་སོགས་གྲགས་ལྡན་བྱེ་བའི་གཙུག་རྒྱན་དང༌། ཕུར་ལྕོག་ངག་དབང་བྱམས་པ་སྐུ་ཕྲེང་རིམ་བྱོན། ཀློང་རྡོལ་ངག་དབང་བློ་བཟང་སོགས་སྤྲུལ་སྐུ་རྣམས་དང༌ལྔ་རིག་སྨྲ་བའི་དབང་པོ་དུ་མ་བྱུང༌ཡོད། གཞན་དགེ་བཤེས་ཚུལ་ཁྲིམས་དར་རྒྱས་སོགས་དགེ་བའི་བཤེས་གཉེན་གསེར་རིའི་ཕྲེང་བ་ལྟ་བུ་ཟམ་མ་ཆད་པར་བྱོན་ཡོད། ཕྱི་ལོ་ ༡༩༥༩ ལོར་རྒྱ་དམར་གྱིས་བོད་དུ་བཙན་བཟུང་གིས་བོད་ཡོངས་རྫོགས་དགྲ་ལག་ཏུ་ཤོར་བ་དང༌། ྋགོང་ས་མཆོག་གི་རྗེས་སུ་དགོན་སྡེ་འདི་ནས་བླ་གྲྭ་ཉུང་ཤས་ཤིག་ལས་ཕེབས་ཐུབ་མེད། ཁོང་རྣམས་ཐོག་མར་སྦག་ས་ཆོས་སྒར་དུ་བཞུགས་ཤིང་ཚ་གདུང་གི་འོག་དཀའ་སྤྱད་བརྒྱུད་གྲྭ་ཚང་འདིའི་ཆོས་སྲིད་ཀྱི་བྱེད་སྒོ་ཁག་མི་ཉམས་པའི་ཁུར་བླ་མེད་དུ་བཞེས་པ་དང༌། ཕྱི་ལོ་༡༩༦༩ལོའི་ལོ་མཇུག་ཏུ་རང་གཞུང་གི་ཐག་གཅོད་དང༌། ྋགོང་ས་མཆོག་གི་བཀའ་ནན་འོག་རྒྱ་གར་ལྷོ་ཕྱོགས་མེ་སོར་སྦེལ་ཀོབ་ཏུ་སྤོས་པ་དང༌། ཕྱི་ལོ་༡༩༧༠ནང་ཤིང་ནགས་ཡོངས་རྫོགས་ས་ཞིང་དུ་སྒྱུར་ཐུབ་པ་བྱུང་བ་དང༌། དུས་ཡུན་གང་འཚམས་རིང་གུར་ནང་བཞུགས་དགོས་བྱུང༌ཡོད། དེ་རྗེས་རྒྱ་གར་གཞུང་ནས་ཁང་མིག་བཞི་མཉམ་དུ་ཡོད་པའི་ཁང་པ་༢༢དང༌། དེ་འདྲའི་ཁང་པ་བཞི་བཞི་བྱས་པ་གཉིས་ཀྱི་ཚོད་ལྟ་བུའི་ཁང་པ་ཞིག་བརྒྱབ་པ་འདུ་ཁང་བྱས། དེ་དུས་ལོ་གསུམ་ཙམ་རིང་སློབ་གཉེར་བྱེད་ཐབས་མ་བྱུང༌། དེ་ནས་རིམ་པས་གྲྭ་པ་བྱེད་མཁན་ཇེ་མང་དུ་ཕྱིན་པ་དང༌། ལྷག་པར་དུ་བོད་ནས་གསར་དུ་འབྱོར་བ་ཇེ་མང་དུ་ཕྱིན་པས་གྲྭ་ཚོགས་འཕེལ། ཕྱི་ལོ་༡༩༨༠ལོར་ད་ལྟའི་གཙུག་ལག་ཁང་རྙིང་པ་ཆོས་རྭ་དང་བཅས་པ་ལེགས་གྲུབ་བྱུང༌། ྋགོང་ས་མཆོག་ཆིབས་བསྒྱུར་བཀའ་དྲིན་བསྐྱངས་ཏེ་འདུ་ཁང་དབུ་འབྱེད་དང༌། མངོན་རྟོགས་རྒྱན་དང༌། འགྲེལ་པ་དོན་གསལ། ལེགས་བཤད་གསེར་ཕྲེང་བཅས་སྦྱར་བའི་བཤད་ལུང་དང༌། ཤུགས་ལྡན་སྐོར་དམ་བསྒྲགས་བཀའ་སློབ་ལམ་སྟོན་གནང༌། ཕྱི་ལོ་ ༡༩༩༠ ཡས་མས་ནས་སློབ་གཉེར་བ་མང་དུ་ཕྱིན་ཏེ་གྲྭ་པ་མ་ཤོང་བའི་དཀའ་ངལ་ལ་བརྟེན་འདུ་ཁང་གསར་བཞེངས་ཀྱིས་ཕྱི་ལོ་ ༡༩༩༨ ལོར་ད་ལྟའི་གཙུག་ལག་ཁང་ལེགས་གྲུབ་ཀྱིས་དབུ་འབྱེད་མཛད་སྒོར་ཇི་ལྟར་གསོལ་བ་བཏབ་པ་བཞིན། ྋགོང་ས་མཆོག་ཆེད་ཕེབས་ཀྱིས་སྟོང་ཐུན་སྐལ་བཟང་མིག་འབྱེད་ཀྱི་བཤད་ལུང་བཀའ་དྲིན་བསྐྱངས། དགེ་འདུན་དམངས་ཀྱིས་རྩོད་པ་བྱེད་ཡུལ་མི་ཤོང་བར་བརྟེན་ཕྱི་ལོ་ ༢༠༠༤ ལོའི་ལོ་མཇུག་ཙམ་ལ་ཆོས་ར་གསར་སྐྲུན་ལེགས་གྲུབ་བྱུང་ཞིང༌། ྋགོང་ས་མཆོག་མཛད་སྒོར་ཆིབས་བསྒྱུར་གྱིས་ཉིན་བརྒྱད་རིང་མདོ་སྡེ་རྒྱན་དང་བྱང་ས་གཉིས་སྦྱར་བའི་བཤད་ལུང་དང༌། བྱང་སའི་ཚུལ་ཁྲིམས་ལེའུ་ལས་བྱང་སྡོམ་འབོགས་ཆོག་བླ་མ་རྗེ་བཙུན་པའི་བླ་མའི་རྣལ་འབྱོར་གྱི་ལུང་སོགས་གནང༌། དེ་ལྟར་ྋགོང་ས་མཆོག་གིས་བཀའ་སློབ་ལམ་སྟོན་རིམ་ཕེབས་དང༌། དཔལ་ལྡན་བོད་གཞུང་ཆོས་རིག་ལས་ཁུངས་ནས་ཀྱང་བོད་ཀྱི་ཆོས་རིག་ཉམས་པ་སོར་ཆུད་དང་མི་ཉམས་གོང་འཕེལ་ཡོང་སླད་བོད་ནས་འབྱོར་བའི་སློབ་གཉེར་བ་རྣམས་ལ་ཟླ་རེའི་སློབ་ཡོན་གསོལ་བསྩལ་གནང་བཞིན་ཡོད། གྲྭ་ཚང་འདིའི་ཁོངས་སུ་ཁང་ཚན་བཅུ་གསུམ་ཡོད་པ་དང་ད་ལྟའི་ཆར་དགེ་འདུན་ཞལ་གྲངས་༣༢༦༨བཞུགས་ཤིང༌། དེ་དག་གིས་ཐོས་བསམ་བྱ་བའི་རིམ་པ་ནི། ཐོག་མར་བསྡུས་ཆུང༌དང་། བསྡུས་འབྲིང༌། བསྡུས་ཆེན། གཞུང་གསར། གཞུང་རྙིང༌། ཟུར་གསར། ཟུར་རྙིང་འོག་མ། ཟུར་རྙིང་གོང་མ། ཕར་ཕྱིན་ཁ་པ། ཕར་ཕྱིན་ཀ་པ། དབུ་གསར་ཁ་པ། དབུ་གསར་ཀ་པ། དབུ་རྙིང་ཁ་པ། དབུ་རྙིང་ཀ་པ། འདུལ་གསར་ཁ་པ། འདུལ་གསར་ཀ་པ། འདུལ་བ་རྙིང་པ། བཀའ་རམས་འོག་མ། བཀའ་རམས་གོང་མ་བཅས་འཛིན་གྲྭ་ཁག་བཅུ་དགུ་དང༌། དེ་ནས་ལྷ་རམས་པ་དང་སྔགས་རམས་པ་སོགས་དང༌། རིམ་པས་ཤར་བྱང་ཆོས་རྗེ་ནས་དགའ་ལྡན་ཁྲི་པར་ཕེབས་སྲོལ་གཞན་དང་གཅིག་མཚུངས་ཡིན། གཞན་ཡང་གདན་ས་འདིའི་སློབ་གཉེར་སྒྲིག་སྲོལ་ནི། གྲྭ་ཚང་བྱེས་སྨད་གཉིས་སོ་སོར་འཛིན་གྲྭའི་རྣམ་གྲངས་བཅུ་གསུམ་རེ་ཡོད་པ་འདྲ་ཡང་མིང་འདོགས་ཚུལ་མི་འདྲ་བ། དཔེར་ན། བྱེས་པ་གྲྭ་ཚང་འདིར་བསྡུས་གྲྭ་འཛིན་གྲྭ་གསུམ་ལ་ལོ་གསུམ། ཕར་ཕྱིན་འཛིན་གྲྭ་ལྔ་ལ་ལོ་ལྔ། དབུ་མ་འཛིན་གྲྭ་གཉིས་ལ་ལོ་གཉིས་རེ་བཅས་ལོ་བཞི། འདུལ་བ་འཛིན་གྲྭ་གཉིས་ལ་ལོ་གཉིས་རེ་བཅས་ལོ་བཞི། མཛོད་འཛིན་གྲྭ་གཉིས་ལ་ལོ་གཉིས་རེ་བཅས་ལོ་བཞི། བཀའ་རམས་འཛིན་གྲྭ་གཅིག་ལ་ལོ་གཉིས་ནས་གསུམ་བར་བཅས་ཁྱོན་བསྡོམས་ལོ་ངོ་ཧྲིལ་པོ་ཉི་ཤུ་རྩ་གཉིས་དང༌། དེ་ནས་ལོ་རེར་དགེ་བཤེས་ལྷ་རམས་པ་གཉིས་ལས་གཏོང་སྲོལ་མེད་ཅིང༌། དཔེར་ན་འཛིན་གྲྭ་གཅིག་ལ་ལྷ་རམས་པ་བཅུ་གཉིས་ཡོད་ཚེ་ལྷ་རམས་འཛིན་གྲྭར་ལོ་དྲུག་སྡོད་དགོས་པ་ལྟ་བུ་དང༌། གཞན་ལོ་རེར་དགེ་བཤེས་ཚོགས་རམས་པ་གཉིས་དང༌། གླིང་བསྲེའི་དགེ་བཤེས་བཞི། རིགས་རམས་པ་གཉིས་བཅས་ལོ་རེར་དགེ་བཤེས་བཅུ་ལྷག་གཏོང་སྲོལ་མེད། དེང་སྐབས་གྲྭ་ཚང་འདིར་སྐྱབས་རྗེ་མཁན་གདན་ཟུར་ལྷན་རྒྱས་ཞལ་གྲངས་ ༨ དང༌། དགེ་འདུན་གནས་བརྟན་བགྲེས་སོང་ཞལ་གྲངས་ ༢༡༠ འཛིན་གྲྭ་བཅུ་དགུའི་ནང་ཚོགས་ཆོས་རར་རྟག་ཏུ་ཕེབས་བཞིན་པའི་སློབ་གཉེར་པ་ ༢༧༧༠ ཙམ་གྱིས་གུས་རྟག་བརྩོན་པས་འཆད་རྩོད་རྩོམ་གསུམ་དང༌། ཐོས་བསམ་སྒོམ་གསུམ་གྱིས་བསྟན་པ་རྒྱས་པའི་ཞབས་འདེགས་ཞུ་མུས་ཡིན། གྲྭ་ཚང་འདིའི་འཛིན་སྐྱོང་འོག་རྒྱ་གར་གཞུང་འབྲེལ་གྱིས་ངོས་འཛིན་ཡོད་པའི་སེར་བྱེས་འབྲིང་རིམ་སློབ་གྲྭ་ཡོད་པ་དང༌། ད་ལྟ་སློབ་ཕྲུག་གྲངས་༥༠༠ལྷག་གིས་འཛིན་རིམ་བཅུ་པ་བར་ཡོད་པའི་སློབ་གྲྭ་འདིར་སློབ་སྦྱོང་བྱེད་མུས་དང༌། གཞན་ཡང་འཕྲུལ་པར་མཉམ་འབྲེལ་གྱི་བཀའ་བསྟན་གསུང་རབ་གྲངས་མེད་བཞུགས་པའི་སེར་བྱེས་དཔེ་མཛོད་ཁང༌། ནད་པ་རྣམས་ལ་གཟིགས་རྟོག་བྱེད་སའི་སེར་བྱེས་ནད་འཕྲོད་ལྟ་སྐྱོང་ཚོགས་པ། དེ་བཞིན་མཚམས་ཁང༌། བགྲེས་སོང་ལྟ་སྐྱོང་ཁང༌། ཟ་ཁང༌། མགྲོན་ཁང༌། ཚོང་ཁང༌བཅས་ཡོད།། །།

༄༅། །གདན་ས་ཆེན་མོ་འབྲོག་རི་བོ་ཆེ་དགའ་ལྡན་རྣམ་པར་རྒྱལ་བའི་གླིང་གི་ཡ་གྱལ་བྱང་རྩེ་ཐོས་བསམ་ནོར་གླིང་གྲྭ་ཚང་ཞེས་སྙན་པའི་བ་དན་ཕྱོགས་བཅུར་གཡོ་བའི་གདན་ས་ཆེན་པོ་འདི་ཉིད་ནི། འཇམ་མགོན་བླ་མ་ཙོང་ཁ་པ་ཆེན་པོའི་དངོས་སློབ་དབུས་གཙང་བསྟན་པའི་སྒྲོན་མེ་བཅུའི་ནང་ཚན་འཇམ་མགོན་སྙན་བརྒྱུད་ཀྱི་བསྟན་པའི་མངའ་བདག་སེམས་པ་ཆེན་པོ་ཧོར་སྟོན་ནམ་མཁའ་དཔལ་བཟང་པོས་ཐོག་མར་ཕྱག་བཏབ།དེ་ཡང་རྩེ་ཤར་གྱི་བསྟན་པའི་གསལ་བྱེད་གཉིས་ཀྱི་ནང་ཚན་ཧོར་སྟོན་ནམ་མཁའ་དཔལ་བས་རྒྱལ་ཚབ་ཆོས་རྗེའི་རྗེས་སུ་གདན་ས་བསྐྱངས་ཏེ་འཇམ་མགོན་བླ་མ་ཙོང་ཁ་པ་ཆེན་པོའི་གཟིམ་ཆུང་ཉི་འོད་ཕུག་གི་བྱང་ཕྱོགས་རི་བོའི་རྩེ་མོར་བྱང་རྩེ་ཁང་བཏབ་སྟེ་བླ་ས་བཟུང༌།ཆོས་ཟུར་འཆད་མཛད་དེ་རྗེ་རྒྱལ་བ་གཉིས་པའི་བསྟན་པའི་རྒྱལ་མཚན་བླ་ན་བསྒྲེངས།གསུང་ལས་སྐྱེས་པའི་བུ་སློབ་ཀྱང་རྒྱལ་མཆོག་དགེ་འདུན་གྲུབ།རྗེ་བཙུན་ཤེས་རབ་སེངྒེ་ལ་སོགས་པ་བསིལ་ལྗོངས་མཁས་རྒུའི་གཙུག་རྒྱན་མཁས་ཤིང་གྲུབ་པའི་སྐྱེས་ཆེན་དུ་མ་ཕེབས།དེ་ལྟར་སེམས་དཔའ་ཆེན་པོ་ཧོར་སྟོན་ནམ་མཁའ་དཔལ་བས་དགའ་ལྡན་དུ་རྗེའི་གཟིམ་ཆུང་ཉི་འོད་ཕུག་གི་བྱང་ཕྱོགས་རི་བོའི་རྩེ་མོར་བྱང་རྩེ་ཁང་དུ་གྲགས་པ་འདི་ཉིད་བཏབ་ནས་འཆད་ཉན་རྒྱ་ཆེར་མཛད་པར་བརྟེན། གྲྭ་ཚང་རིན་པོ་ཆེ་འདི་ཉིད་ཀྱི་མཚན་ལའང་དགའ་ལྡན་བྱང་རྩེ་གྲྭ་ཚང་དུ་གྲགས།སེམས་དཔའ་ཆེན་པོ་གང་གིས་ཆོས་སྡེ་ཆེན་པོ་འདི་ཉིད་ཐོག་མར་ཕྱག་བཏབ་གནང་སྟེ་མདོ་སྔགས་ཀྱི་ཟབ་པ་དང་རྒྱ་ཆེ་བའི་ཆོས་ཀྱི་འཁོར་ལོ་རྒྱ་ཆེར་བསྐོར་བར་མཛད་དེ།གདན་ས་བསྐྱངས་པ་ནས་བཟུང་དུས་ད་ལྟ་ལ་ཐུག་པའི་བར་གསེར་རིའི་དབུས་ན་ལྷུན་པོ་དང༌།སྐར་ཚོགས་དབུས་སུ་ཟླ་བ་ལྟར་མངོན་པར་འཕགས་པའི་སྔ་ཕྱིའི་གདན་རབས་ཕྲེང་བའི་ཚོགས་ཀྱིས་ཆོས་ཀྱི་སྡེ་ཆེན་པོ་འདི་ཉིད་ཀྱི་ཐུན་མོང་དང་ཐུན་མོང་མིན་པའི་བཤད་སྒྲུབ་འཆད་ཉན་གྱི་རྣམ་པར་དཀར་བའི་ལེགས་ཚོགས་རྣམས་ཉམས་པ་མེད་པར་དྲིན་གྱིས་བསྐྱངས་དང་སྐྱོང་བཞིན་པ་དང༌།ཆོས་སྡེ་ཆེན་པོ་འདི་ཉིད་ཀྱི་ཁྱབ་ཁོངས་སུ་གཏོགས་པའི་མདོ་དབུས་ཁམས་གསུམ་གྱིས་མཚོན་ཕྱོགས་འདུས་རྒྱ་ཆེའི་སློབ་གཉེར་བ་ཡོངས་ནས་ཀྱང་གདན་ས་འདི་ཉིད་དུ་དུས་རབས་རིམ་པར་གཞུང་ཆེན་བཀའ་པོད་ལྔས་མཚོན་མདོ་སྔགས་ཀྱི་གཞུང་ལུགས་རྒྱ་མཚོ་ལྟ་བུར་ཐོས་བསམ་སྒོམ་གསུམ་ཡ་མ་བྲལ་བར་གནང་སྟེ།མཁས་བཙུན་བཟང་གསུམ་གྱི་རྣམ་ཐར་བཟང་པོ་རང་རྒྱུད་མཛེས་པའི་རྒྱན་དུ་ལྷུར་བཞེས་ཏེ་འཆད་རྩོད་རྩོམ་གསུམ་གྱི་སྒོ་ནས་རྒྱལ་བའི་བསྟན་པ་རིན་པོ་ཆེ་བཤད་སྒྲུབ་འཁོར་ལོ་གཉིས་ཀྱིས་ཕྱོགས་ཀུན་ནས་ཉམས་པ་མེད་པར་བླ་ན་འདེགས་འབྲས་སུ།སྔོན་ཆད་གངས་རིའི་ལྗོངས་སུ་མདོ་སྔགས་ཟུང་དུ་འབྲེལ་བའི་ཆོས་སྡེ་ཆེན་མོ་དགའ་ལྡན་རྣམ་པར་རྒྱལ་བའི་གླིང་གི་ཡ་གྱལ་བྱང་རྩེ་ཐོས་བསམ་ནོར་གླིང་གྲྭ་ཚང་ཞེས་གྲགས་པའི་སྙན་པ་ཕྱོགས་བཅུར་གཡོ་བ་འདི་ཉིད་བྱུང་བ་ཡིན་ནོ།། དེ་ཡང་གཞིས་བྱེས་བོད་འབངས་ཡོངས་ཀྱི་སེམས་གཏིང་ནས་ནམ་ཡང་བརྗེད་མི་སྲིད་པའི་དུས་ཚིགས་ཀྱི་རྡོ་རིང་ལྟ་བུ་བོད་རབ་རྒྱལ་ས་ཕག་ལོའི་ཟླ་༢ཚེས་༡༧ཕྱི་ལོ་༡༩༥༩ལོའི་ཟླ་༣ཚེས་༡༧ཉིན་སྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་གི་དབུས་བོད་མི་མི་ཉུང་བ་ཞིག་གསང་བྲོས་ཀྱིས་འཕགས་ཡུལ་དུ་བཙན་བྱོལ་ལ་ཕེབས་དགོས་བྱུང་བ་བཞིན།སྐྱབས་གནས་མཁན་རིན་པོ་ཆེ་རྗེ་བཙུན་ཡེ་ཤེས་དགའ་བ་དཔལ་བཟང་པོ་མཆོག་གི་དབུས་མཁན་གདན་ཟུར་སོགས་དགེ་འདུན་པ་༡༠༠༠ཙམ་བཙན་བྱོལ་ལ་ཕེབས་འབྱོར་ཐུབ་པ་བྱུང་ཡོད། ལྷག་པར་དུ་སྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་གི་བླ་ན་མེད་པའི་མཛད་བྱུས་ལམ་སྟོན་ཉག་གཅིག་འོག་སྦག་སར་ཆེད་འཛུགས་གནང་བའི་༼སྦག་ས་ནང་བསྟན་ཤེས་རིག་འཛིན་སྐྱོང་སློབ་གཉེར་ཁང་ཐོས་བསམ་ཐར་འདོད་གླིང་༽གི་ཁོངས་སུའང་སྐྱབས་གནས་མཁན་རིན་པོ་ཆེ་རྗེ་བཙུན་ཡེ་ཤེས་དགའ་བ་དཔལ་བཟང་པོ་མཆོག་གི་དབུས་དགེ་འདུན་པ་ཞལ་གྲངས་༢༠༠ལྷག་ཙམ་གྱིས་ངལ་བ་བརྒྱ་ཕྲག་ཁྱད་དུ་བསད་དེ།གྲྭ་ཚང་འདི་ཉིད་ཀྱི་ཐུན་མོང་དང་ཐུན་མོང་མིན་པའི་ཆོས་སྤྱོད་ཀྱི་མཛད་བཟང་རྣམས་ཕྱོགས་ཡོངས་ནས་ཉམས་པ་མེད་པར་སླར་གསོ་དང་རྒྱུན་འཛིན་གྱིས་བཀའ་དྲིན་བསམ་གྱིས་མི་ཁྱབ་པ་བསྐྱངས།སླར་ཡང་སྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་གི་བླ་ན་མེད་པའི་འཕྲལ་ཕུགས་ཀྱི་དགོངས་གཞི་ཟབ་མོའི་འོགཕྱི་ལོ་༡༩༧༠ཟླ་༡པོར་སྐྱབས་གནས་མཁན་རིན་པོ་ཆེ་རྗེ་བཙུན་ཚུལ་ཁྲིམས་ཆོས་འཕེལ་དཔལ་བཟང་པོ་མཆོག་གི་དབུས་དགེ་འདུན་པ་ཞལ་གྲངས་༡༧༣ལྷག་ཙམ་སྦག་ས་ཆོས་སྒར་ནས་བསྐྱར་དུ་ལྷོ་གཞིས་མོན་གྷོ་འདོད་རྒུའི་གླིང་དུ་བསྐྱར་སྤོས་གནང༌།དེ་ལྟར་སྤྱི་ནོར་ྋགོང་ས་ྋསྐྱབས་མགོན་ཆེན་མཆོག་གི་རྣམ་པར་དཀར་བའི་འཕྲིན་ལས་ཀྱི་འོད་ཞགས་འོག་གྲྭ་ཚང་རིན་པོ་ཆེའི་ཕྱག་བཞེས་བཤད་སྒྲུབ་འཁོར་ལོ་གསུམ་གྱི་ལེགས་ཚོགས་ཀྱི་ལེགས་བྱང་སྤྱི་དང༌།སྒོས་སུ་གྲྭ་ཚང་འདི་ཉིད་ཀྱི་མཐོང་བ་བརྒྱུད་པའི་ཕྱག་སྲོལ་ཕྲ་མོ་ཚུན་ཉམས་པ་མེད་པར་བསྐྱར་གསོ་ཡང་གསོའི་འཕྲིན་ལས་ཀྱི་འཇུག་པ་རྒྱ་ཁྱབ་དུ་འཕེལ་ཐུབ་པ་བྱུང་ཡོད།ཕྱིས་སུ་རིམ་གྱིས་བོད་པའི་གཞི་ཆགས་ཁག་དང༌།བོད་དང༌།འབྲུགབལ་ཡུལ།མོན།ལ་དྭགས།སྤི་ཏི།ཁུ་ནུ།གར་ཞ་སོགས་དང༌།གཞན་ཡང་ཕྱིའི་རྒྱལ་ཁབ་ཁག་ནས་ཕེབས་པའི་གྲྭ་རྒྱུན་གསར་ཞུགས་ཇེ་མང་གིས་དགེ་འདུན་གྱི་སྡེ་ཚོགས་ཇེ་རྒྱས་སུ་སོང་སྟེ།དེང་གི་ཆར་གྲྭ་ཚང་འདིར་དགེ་འདུན་པ་ ༡༨༣༠ཡས་མས་ཤིག་གིས་འཕགས་བོད་ཀྱི་མདོ་སྔགས་ཀྱི་གཞུང་ལུགས་སྤྱི་དང༌། ལྷག་པར་དུ་འཇམ་མགོན་ཡབ་སྲས་རྣམས་ཀྱི་གཞུང་ལུགས་ཁག་གི་གཙོས་གྲྭ་ཚང་རིན་པོ་ཆེའི་ཐུན་མོང་དང༌། ཐུན་མོང་མ་ཡིན་པའི་ཡིག་ཆ་རྣམས་ལ་ཐོས་བསམ་སྒོམ་གསུམ། འཆད་རྩོད་རྩོམ་གསུམ་གྱིས་རྣམ་པར་དཀར་བའི་འཕྲིན་ལས་ཀྱི་འཇུག་པ་བསྐྱངས་དང་སྐྱོང་བཞིན་པ་བཅས་ཡིན།།།།

༄༅།།བོད་ཀྱི་འབྲས་སྤུངས་དགོན་པ་ནི།རྗེ་ཙོང་ཁ་པའི་དངོས་སློབ་འཇམ་དབྱངས་ཆོས་རྗེ་བཀྲ་ཤིས་དཔལ་ལྡན་པས་ཕྱི་ལོ་༡༤༡༦ལོར་ཕྱག་བཏབ།དགོན་པ་འདི་དབུས་ཀྱི་གྲྭ་ས་ཆེན་པོ་གསུམ་ཞེས་པ་དང་།བོད་ཁམས་ཀྱི་དགེ་ལུགས་པའི་གདན་ས་ཆེན་པོ་དྲུག་ཅེས་པའི་ཡ་གྱལ་ཡིན།དེ་ལ་སྔར་གྲྭ་ཚང་བདུན་དང་ད་ལྟ་བཞི་ཡོད་པའི་ཡ་གྱལ་འབྲས་སྤུངས་བཀྲ་ཤིས་སྒོ་མང་གྲྭ་ཚང་ནི།འཇམ་དབྱངས་ཆོས་རྗེའི་དངོས་སློབ་དྲུང་གྲགས་པ་རིན་ཆེན་པས་འཆད་ཉན་གནང་བའི་སློབ་བརྒྱུད་ལས་བྱུང་བ་དང་།དེ་ཡང་གདན་སའི་ནང་གི་གྲྭ་ཚང་ཐོག་མ་དེ་ཡིན།གྲྭ་ཚང་འདི་ལ་འདུ་ཁང་དང་སྐུ་གསུང་ཐུགས་རྟེན་སོགས་རྒྱ་ཆེ་བ་དང་རིན་ཐང་ཡོད་པ་མང་པོ་ཡོད། སྔ་སོར་གྲྭ་ཚང་འདིས་ཀུན་མཁྱེན་ཆོས་འབྱུང་གི་གསུང་གི་སྟེང་ནས་འཆད་ཉན་གནང་བ་དང་།དུས་ཕྱིས་ཀུན་མཁྱེན་འཇམ་དབྱངས་བཞད་པ་ཡབ་སྲས་ཀྱི་ཡིག་ཆའི་སྟེང་ནས་འཆད་ཉན་གནང་སྟེ་ད་ལྟའི་བར་སླེབས་ཤིང་།གྲྭ་ཚང་འདི་ནས་མར་མེ་གཅིག་ལས་གཉིས་མཆེད་ཀྱི་ཚུལ་དུ་གྱེས་པའི་བླ་བྲང་བཀྲ་ཤིས་འཁྱིལ་གྱིས་མཚོན་པའི་ཨ་མདོ་དང་།ཁམས།དབུས་གཙང་མངའ་རིས་སོགས་བོད་ཡུལ་མཐའ་དབུས་ཀུན་དང་།སོག་པོ་ཕྱི་ནང་དུ་དགོན་སྡེ་བཤད་གྲྭ་ནམ་མཁའི་སྐར་ཚོགས་བཞིན་ཁྱབ་པར་གྱུར་ཡོད། ཕྱི་ལོ་༡༩༥༩ལོའི་དུས་འགྱུར་སྐབས་རྒྱ་གར་ཤར་ཕྱོགས་སྦག་ས་དང་།ཕྱི་ལོ་༡༩༦༩ལོར་ལྷོ་ཕྱོགས་མོན་གྷོ་ས་གནས་འདིར་རྟེན་གཞི་ཆགས།༸གོང་ས་མཆོག་གི་ལམ་སྟོན་དང་།བཙན་བྱོལ་བོད་གཞུང་གི་ཐུགས་ཁུར།རྒྱ་གར་གཞུང་དང་ལྷག་པར་དུ་མངའ་སྡེའི་གཞུང་མང་གི་བཀའ་དྲིན།འདིར་བཞུགས་པའི་དགེ་འདུན་པ་རྣམས་ཀྱི་འབད་བརྩོན་བཅས་ལ་བརྟེན་ནས་འདུ་ཁང་དང་།ཆོས་གྲྭ།སློོབ་གྲྭ།དཔེ་མཛོད།ཁམས་ཚན་མི་ཚན་སོགས་ཀྱི་འཛུགས་སྐྲུན་ཡང་མི་དམན་པ་ཡོད་ཅིང་།དེ་དག་ཏུ་སྐུ་གསུང་ཐུགས་རྟེན་ཡང་གསར་སྐྲུན་གང་འཚམས་རེ་ཡོད།གཞན་ཡང་ཚོང་ཁང་དང་།ཟ་ཁང་།མགྲོན་ཁང་སོགས་དགེ་འདུན་པའི་འཚོ་བའི་མཐུན་རྐྱེན་སྐྲུན་ཐབས་རེ་ཡང་ཡོད། གྲྭ་ཚང་འདིར་ཐོག་མའི་འཆད་ཉན་པ་དྲུང་གྲགས་པ་རིན་ཆེན་ནས་ད་ལྟའི་དགེ་བཤེས་འཇིགས་མེད་རྒྱ་མཚོའི་བར་གདན་རབས་གྱ་གཅིག་བྱོན་ཏེ་འཆད་ཉན་གནང་ཞིང་། སྔར་གྲྭ་ཚང་འདི་ལ་བོད་རྒྱ་སོག་གསུམ་གྱིས་མཚོན་པའི་སློབ་གཉེར་བ་རྒྱས་དུས་༥༠༠༠ལྷག་ཡོད་པར་གྲགས་ཤིང་།དེ་ལས་དགའ་ལྡན་ཁྲི་པ་དང་།བོད་ཀྱི་རྒྱལ་ཚབ་སོགས་ལོ་རྒྱུས་ཐོག་གི་མཁས་པ་ཡང་མང་པོ་བྱོན་ཡོད།རྒྱ་གར་ནང་འབྱོར་ནས་བོད་དང་།རྒྱ་གར།བལ་ཡུལ།འབྲུག་ཡུལ།སོག་པོ།ར་ཤི་ཡ།ཐའེ་ཝན།ཨོས་ཊོ་ལི་ཡ་སོགས་འཛམ་གླིང་གི་ཡུལ་ལུང་འདྲ་མིན་གྱི་སློབ་གཉེར་བ་གྲྭ་ཚང་དུ་སྒྲིག་ཞུགས་ཞུས་པ་ད་བར་ཞལ་གྲངས་༥༦༡༠ཡོད་པ་དང་།དེ་དག་ལས་ད་ལྟའི་ཆར་ཁམས་ཚན་བཅུ་བདུན་ནང་གཏན་བཞུགས་དགེ་འདུན་པ་༡༧༢༥ཡོད་ཅིང་།དེ་ལ་བསྙེན་བཀུར་ཞུ་མཁན་ཡང་འཛམ་གླིང་གི་ས་ཕྱོགས་གང་སར་ཡོད། གྲྭ་ཚང་གི་གཙུག་ལག་ཁང་དུ་སྐུ་རྟེན་གཙོ་བོ་གསེར་ཟངས་འབའ་ཞིག་ལས་གྲུབ་པའི་རྒྱལ་བ་བྱམས་པ་མགོན་པོའི་སྐུ་བརྙན་བྱིན་ཅན་མི་ཚད་ཙམ་དང་།ཐུབ་དབང་གཙོ་འཁོར་གསུམ་གཙོ་བཞུགས་ཀྱིས་སྐུ་བརྙན་གྲངས་བརྒྱ།བལ་ལི་ལས་གྲུབ་པའི་ཀུན་མཁྱེན་འཇམ་དབྱངས་བཞད་པ་ངག་དབང་བརྩོན་འགྲུས་དཔལ་བཟང་པོའི་སྐུ་བརྙན་སོགས་དང་།གསུང་རྟེན་ལ་རྒྱལ་བའི་བཀའ་འགྱུར་དང་བསྟན་འགྱུར་སོགས་རྒྱ་བོད་ཀྱི་མཁས་པའི་གསུང་རབ་གླེགས་བམ་བརྒྱ་ཕྲག་དུ་མ་དང་།ཐུགས་རྟེན་བྱང་ཆུབ་ཆེན་པོའི་མཆོད་རྟེན་སོགས་མཆོད་རྫས་སྣ་ཚོགས་བཞུགས་ཡོད། གྲྭ་ཚང་འདིས་སྦྱང་བྱ་གཙོ་བོ་བོད་བརྒྱུད་ནང་བསྟན་མཚན་ཉིད་རིག་པ་ཡིན་ལ།གཞུང་ཆེན་བཀའ་པོད་ལྔར་ལོ་བཅུ་དྲུག་རིང་སློབ་གཉེར་བྱས་ཏེ་འཛིན་གྲྭ་བཅུ་དྲུག་འཐོན་དགོས།དེ་ནས་དགེ་ལུགས་རྒྱུགས་སྤྲོད་ལོ་དྲུག་ལ་ཞུགས་ན་ད་གཟོད་དགེ་བཤེས་ལྷ་རམས་པའི་མཚན་གནས་ཐོབ།ཞར་བྱུང་དུ་དེང་རབས་ཚན་རིག་འཛིན་གྲྭ་དང་།ཡུལ་ལུང་གཞན་གྱི་སློབ་གཉེར་བའི་ཆེད་བོད་ཡིག་འཛིན་གྲྭ།ཨིན་ཡིག་དང་རྒྱ་ཡིག་གི་སློབ་ཚན་སོགས་ཡོད་པ་མ་ཟད།གྲྭ་པ་ལོ་ཆུང་རྣམས་ལ་གྲྭ་ཚང་གི་སློབ་གྲྭ་འཛིན་རིམ་བརྒྱད་པ་བར་ཡོད།དེར་སུམ་རྟགས་དག་གསུམ་དང།བློ་འཛིན།བོད་ཨིན་སྐད་ཡིགཚན་རིགབསྡུས་གྲྭ་བློ་རྟགས་སོགས་ཀྱི་སློབ་ཚན་ཡོད།དགེ་བཤེས་ཐོན་ཟིན་རྣམས་ལ་ལོ་གསུམ་རིང་སྔགས་ཀྱི་ཆོས་གྲྭ་ཡོད། དེ་ལྟར་ཀློག་པ་ཐོས་བསམ་གྱི་འཁོར་ལོ་གྲུབ་ཟིན་ནས་གྲྭ་ཚང་རང་དུ་བཤད་སྒྲུབ་འཆད་ཉན་ལ་འབད་པ་དང་།མཚམས་ཁང་དུ་ཕེབས་པ།བྱ་བྲལ་ལ་ཕེབས་པ་སོགས་སྤོང་བ་བསམ་གཏན་གྱི་འཁོར་ལོར་བརྩོན་པ་དང་།གཞན་ཡང་བོད་སོགས་རང་རང་གི་གཞིས་དགོན་དང་།ཕྱི་རྒྱལ་གྱི་ཆོས་ཚོགས་ཁག་ཏུ་ཕེབས་པ།གྲྭ་ཚང་རང་གི་ཕྱག་མཛོད་སོགས་ལས་ཁུར་སྣ་མང་ཞུ་བ་སྟེ།བྱ་བ་ལས་ཀྱི་འཁོར་ལོར་བརྩོན་བཞིན་པ་བཅས་ཀྱི་ངོ་སྤྲོད་མདོར་བསྡུས་སོ།།།།

༄༅།།དཔལ་མཉམ་མེད་རི་བོ་དགེ་ལྡན་པའི་ཁུངས་སུ་གཏོགས་པའི་དཔལ་ལྡན་སྲད་རྒྱུད་གྲྭ་ཚང་ནི།དབུས་གཙང་ཕྱོགས་སུ་སྲད་ཀྱི་ལུང་པ་ཞེས་པའི་ཕུ་ན་གཡག་ཤི་ཞེས་པ་དེར།འཇམ་དབྱངས་མིའི་རྣམ་རོལ་ཤར་རྒྱལ་བ་ཙོང་ཁ་པ་ཆེན་པོའི་དངོས་སློབ་བུ་ཆེན་བཞིའི་ཡ་རྒྱལ་གསང་བདག་མིའི་རྣམ་རོལ་༸རྗེ་བཙུན་ཤེས་རབ་སེངྒེ་མཆོག་ལ་སེ་ར་ཆོས་སྡིངས་སུ་གསང་སྔགས་ཀྱི་བསྟན་པའི་བདག་པོར་མངའ་གསོལ་རྗེས། “གཙང་ཕྱོགས་སུ་བྱོན་ནས་བསྟན་པ་སྤེལ་ལ་རྒྱུད་གྲྭ་ཚུགས།”ཞེས་རྗེ་བདག་ཉིད་ཆེན་པོའི་ལུང་བསྟན་བཞིན།ཕྱི་ལོ་༡༤༢༨ཙམ་ལ་གྲྭ་ཚང་འདི་ཉིད་ཕྱག་བཏབ་སྟེ་རྒྱུད་ཀྱི་འཆད་ཉན་བཙུགས།ཁོང་གི་སློབ་མ་རྒྱུད་ཆེན་འདུལ་བ་འཛིན་པ་དཔལ་ལྡན་བཟང་པོ་མཆོག་ལ་རྒྱུད་ཀྱི་འཆད་ཉན་པར་བསྐོས།རྗེ་བླ་མའི་ཐུགས་དགོངས་བཞིན་དམ་ཆོས་འགྲེལ་པ་བཞི་སྦྲགས་ཀྱི་མཚོན་པའི་རྒྱུད་ཀྱི་འཆད་ཉན་རྐང་འཛིན་པའི་རྒྱུད་གྲྭ་ཕུན་སུམ་ཚོགས་པ་བྱུང་བ་མ་ཟད།དེ་ནས་བར་མ་ཆད་བར་མཁས་གྲུབ་གཉིས་ལྡན་གྱིས་རྒྱུད་ཆེན་གྲགས་ཆེ་བ་དུ་མ་བྱུང་།རྒྱུད་ཆེན་དེ་རྣམས་ནས་རིམ་བཞིན་མདོ་སྔགས་ཀྱི་བསྟན་པའི་ཁུར་མཛད་ནས་མཚན་སྙན་བོད་ཆོལ་ཁ་གསུམ་དུ་གྲགས། ཕྱི་ལོ་༡༩༥༩ལོར་རྒྱ་དམར་དཔུང་ཚོགས་ནས་བོད་ས་ཡོངས་རྫོགས་བཙན་འཛུལ་གྱིས་གྲྭ་ཚང་འདི་ཡང་ཉམས་ཆགས་སུ་བཏང་བ་མ་ཟད་གྲྭ་མང་རྣམས་ཀྱང་ཁ་འཐོར་དུ་སོང་།ལོ་དེར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དབུས་རིས་མེད་ཀྱི་སྐྱེས་ཆེན་དམ་པ་རྣམས་དང་བོད་མི་ཁྲི་ཚོ་འགལ་བར་རྒྱ་གར་དུ་བཙན་བཅོལ་དུ་ཕེབས་དགོས་བྱུང་།སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་དུ་བཙན་བཅོལ་དུ་ཕེབས་ཐུབ་པའི་ཐུགས་རྗེ་བཀའ་དྲིན་ཉག་ཅིག་ལ་བརྟེན་ནས་རྒྱ་གར་ནང་བོད་ཀྱི་ཆོས་དང་རིག་གཞུང་མི་ཉམས་གོང་འཕེལ་དང་ཉམས་པ་སོར་ཆུད་ཐུབ་པ་བྱུང་ཡོད།སྲད་རྒྱུད་གྲྭ་ཚང་འདི་ཡང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲིན་དང་བཀའ་སློབ་ལམ་སྟོན་འོག་ཞིང་གཤེགས་དམ་པ་༸རྗེ་བཙུན་བྱམས་པ་དབང་རྒྱལ་མཆོག་ནས་ཕྱི་ལོ་༢༠༠༠ལོར་སཱ་ལུ་གྷ་རར་དཔལ་ལྡན་སྲད་རྒྱུད་གྲྭ་ཚང་རྟེན་དང་བརྟེན་པ་ལེགས་པར་གསར་བཞེངས་གནང་རྗེས་ཕྱི་ལོ་༢༠༠༡ཟླ་༡༡ཚེས་༢ཉིན་༸གོང་ས་༸སྐྱབས་མགོན་ཆེན་པོ་མཆོག་ནས་དབུ་འབྱེད་རབ་གནས་དང་སྦྲགས།བདུན་ཕྲག་གཅིག་ལྷག་ཙམ་རིང་གསུང་ཆོས་ཡི་དམ་གསང་བདེ་འཇིགས་གསུམ་གྱི་སྨིན་བྱེད་དབང་དང་།གྲོལ་བྱེད་ཁྲིད།མགོན་ཆོས་བཞི་སོགས་ཀྱི་རྗེས་གནང་དང་།ཚེ་དབང་སོགས་བཀའ་དྲིན་སྩལ།སྐུ་རྟེན་གྱི་གཙོ་བོ་དཔལ་གསང་བ་འདུས་པའི་སྐུ་བརྙན་དང་།༸གོང་ས་མཆོག་གི་སྐུ་བརྙན་གཅིགབོད་ནས་གདན་ཞུ་གནང་བའི་སྒྲོལ་མའི་སྐུ་ཆུང་ཞིག་ཡོད།གསུང་རྟེན་༸གོང་ས་མཆོག་གིས་གསོལ་སྩལ་གནང་བའི་འགྲེལ་པ་བཞི་སྦྲགས་ཀྱི་པོད་གཅིག་བཅས་ཡོད། ཞིང་གཤེགས་སྲད་རྒྱུད་རྡོ་རྗེ་འཆང་མཆོག་ནས་གྲྭ་ཚང་འདིའི་ཆོས་སྲིད་གང་སྤྱིའི་ཐད་སྐུ་ངལ་འཛེམས་མེད་བསྐྱོན་ནས་སྔར་བོད་དུ་ཡོད་པ་ལྟར་གཙོ་བོ་དམ་ཆོས་འགྲེལ་པ་བཞི་སྦྲགས་ཀྱི་འཆད་ཉན་བཟང་པོ་དང་ཁྲིད་ཆེན་བརྒྱད་སོགས་ཚགས་ཚུད་ཡོང་སླད་དུ་༸སྐྱབས་རྗེ་པང་གནང་རིན་པོ་ཆེ་མཚོན་པས་སྐྱེས་ཆེན་རྣམས་གདན་ཞུས་ཐོག་འཆད་ཉན་མཛད་པ་ཙམ་དུ་མ་ཟད།ལོ་ལྟར་རྡུལ་ཚོན་དཀྱིལ་འཁོར་དང་འབྲེལ་ཡི་དམ་གསང་བདེ་འཇིགས་གསུམ་གྱི་སྒྲུབ་མཆོད་སོགས་ཀྱང་ཆག་མེད་ཕྱག་ལེན་དུ་གནང་བཞིན་ཡོད།༸གོང་ས་མཆོག་གི་བཀའ་དགོངས་བཞིན་མཚན་ཉིད་ཀྱི་གཞུང་ཆེན་ཁག་དུའང་སློབ་ཁྲིད་འཆད་རྩོད་ཡོད་པའི་ཁར་དེང་དུས་ཀྱི་ཤེས་ཡོན་སྦྱོང་སའི་སློབ་གྲྭ་འཛིན་རིམ་དང་པོ་ནས་བརྒྱད་པ་བར་སློབ་ཁྲིད་གནང་མུས་ཐོགགྲྭ་པའི་ཞལ་གྲངས་༢༣ཆགས་ཀྱི་ཡོད། དེ་ནས་ཕྱི་ལོ་༢༠༠༧ལོར་དཔལ་ལྡན་སྨད་རྒྱུད་གྲྭ་ཚང་གི་མཁན་ཟུར་མཐུ་སྟོབས་མགོན་པོ་མཆོག་ལ་སྲད་རྒྱུད་གྲྭ་ཚང་གི་མཁན་པོའི་ཕྱག་རྟགས་གསོལ་སྩལ་ཐོག་ལོ་གསུམ་གྱི་རིང་རྒྱུད་གྲྭ་འདི་ཉིད་ལེགས་པར་བསྐྱངས།དེའི་རྗེས་སུ་རྒྱུད་གྲྭ་སྨད་སྟོད་གཉིས་ཀྱི་མཁན་ཟུར་རྣམས་ལ་མཁན་པོའི་ཕྱག་རྟགས་རིམ་ཕེབས་ཀྱི་མཁན་ཐོག་རེ་རེ་ཐོག་དམ་ཆོས་འགྲེལ་པ་བཞི་སྦྲགས་ཀྱི་མཚོན་རྒྱུད་ཀྱི་འཆད་ཉན་རྣམས་ལེགས་པར་བསྐྱངས་ཏེ།ད་ལྟའི་ཆར་མཁན་ཐོག་༡༠༣པ་རྒྱུད་སྨད་མཁན་ཟུར་རིན་པོ་ཆེ་དགེ་བཤེས་བློ་བཟང་དབང་འདུས་མཆོག་སྲད་རྒྱུད་གྲྭ་ཚང་གི་མཁན་པོའི་མཛད་ཁུར་བཞེས་བཞིན་ཡོད།།།།

༄༅།།བཙུན་དགོན་བྱང་ཆུབ་ཆོས་གླིང་ནི། རྒྱ་གར་ལྷོ་ཕྱོགས་ཀར་ན་ཀྲ་ཀ་མངའ་སྡེའི་མོན་གྷོ་འདོད་རྒུ་གླིང་བོད་མིའི་གཞིས་ཆགས་ཀྱི་གཞིས་གྲོང་གསུམ་པའི་ནང་ཡོད།བཙུན་དགོན་འདི་ཉིད་༸གོང་ས་༸སྐྱབས་མགོན་ཡིད་བཞིན་ནོར་བུ་མཆོག་གིས་༡༩༨༤ལོར་མོན་གྷོ་བོད་མིའི་གཞིས་ཆགས་སུ་ཞབས་སོར་འཁོད་སྐབས་དམིགས་བསལ་བཀའ་སློབ་ཕེབས་དགོངས་བཞིན།ཕྱི་ལོ་༡༩༨༧ཟླ་༧ཚེས་༡དྲུག་པ་ཚེས་བཞི་སྟེ་ཆོས་འཁོར་དུས་ཆེན་ཉིན་ལེགས་པར་གྲུབ་ནས་དངོས་གཞིའི་མཛད་སྒོའི་སྐབས་༸གོང་ས་༸སྐྱབས་མགོན་ཆེན་པོ་མཆོག་སྐུ་དངོས་ཀྱིས་དབུ་འབྱེད་དང་རབ་གནས་གནང་ཞིང་།བྱང་ཆུབ་ཆོས་གླིང་ཞེས་མཚན་བསྩལ་བར་མཛད་ནས་གསར་ཞུགས་བཙུན་མ་གྲངས་བཅུ་དགུའི་གཙུག་ཕུད་བྲེགས་ཏེ་བཀའ་དྲིན་བསྐྱངས། ཕྱི་ལོ་༢༠༠༣ལོར་༸གོང་ས་༸སྐྱབས་མགོན་ཆེན་པོ་མཆོག་ལ་དགོངས་སྐོར་ཞུས་ཏེ།འདུ་ཁང་རྙིང་པ་བཤིགས་ནས་གསར་པ་རྒྱག་དགོས་ཚུལ་བཀའ་ཕེབས་པ་ལྟར་འདུ་ཁང་གསར་རྒྱག་གི་ལས་གྲྭ་བཙུགས་ཏེ་འདུ་ཁང་ཐོག་བརྩེགས་བཞི་ཅན་རྟེན་དང་བརྟེན་པ་ལེགས་གྲུབ་ཀྱིས་ཕྱི་ལོ་༢༠༠༧ལོར་༸མགོན་པོ་མཆོག་གིས་དབུ་འབྱེད་རབ་གནས་མཛད་དང་བཀའ་སློབ་ལམ་སྟོན་བཀའ་དྲིན་བསྩལ། བཙུན་དགོན་འདིའི་ནང་སྐུ་རྟེན་གཙོ་བོ་སྟོན་པ་ཐུབ་པའི་དབང་པོ་དང་།སྒྲོལ་མ་ཉེར་གཅིགའཕགས་པ་སྤྱན་རས་གཟིགས།༸རྒྱལ་བ་ཙོང་ཁ་པ།དཔལ་ལྡན་ལྷ་མོ་སོགས་དང་།གསུང་རྟེན་ལ་༸རྒྱལ་བའི་བཀའ་འགྱུར་རིན་པོ་ཆེ་དང་བསྟན་འགྱུར་རིན་པོ་ཆེ་སོགས་མཇལ་རྒྱུ་ཡོད། ཕྱི་ལོ་༡༩༨༩ནས་བཟུང་སྟེ་གཞུང་ཆེན་བཀའ་པོད་ལྔ་ལ་སློབ་གཉེར་བྱེད་འགོ་བཙུགས་ཤིང་།ད་ལྟའི་ཆར་བསྡུས་གྲྭ་འཛིན་གྲྭ་ནས་འདུལ་བ་འཛིན་གྲྭའི་བར་འཛིན་གྲྭ་བཅོ་བརྒྱད་དང་།དགེ་བཤེས་མའི་དམ་འཇོག་རྗེས་གསང་སྔགས་ལ་ལོ་གསུམ་ཐོས་བསམ་གནང་གི་ཡོད།བཙུན་དགོན་བྱང་ཆུབ་ཆོས་གླིང་གི་བསླབ་གཞི་གཙོ་བོ་གཞུང་ཆེན་བཀའ་པོད་ལྔ་ཡིན་ཞིང་།དེ་མིན་བོད་ཀྱི་རིག་གནས་དང་།རྒྱའི་སྐད་ཡིགཨིན་ཇི།ཚན་རིག་སོགས་སློབ་ཁྲིད་བྱེད་ཀྱི་ཡོད།ད་ལྟ་བཙུན་མའི་ཞལ་གྲངས་༢༨༠ཡོད་པ་ལས་དགེ་བཤེས་མའི་རྒྱུགས་སྤྲོད་ཐོན་པ་ཞལ་གྲངས་༢༢དང་།དགེ་བཤེས་མའི་རྒྱུགས་སྤྲོད་ཕེབས་བཞིན་པ་ཞལ་གྲངས་༣༢ཡོད།།།།

༄༅། །རི་བོ་དགེ་ལྡན་པའི་སྲོལ་འབྱེད་ཆེན་པོ་༸རྗེ་ཙོང་ཁ་པ་ཆེན་པོའི་སྐུ་ཚེའི་སྨད་དེ་ཕྱི་ལོ་ ༡༤༡༩ ལོར་སེ་ར་ཆོས་སྡིངས་སུ་༸རྗེ་རིན་པོ་ཆེའི་འཁོར་སློབ་མཁས་མང་འདུས་པའི་དབུས་སུ་གསང་སྔགས་ཀྱི་ཆོས་སྐལ་གནང་བཞིན་པའི་སྐབས། ༸རྗེ་ཙོང་ཁ་པས་དཔལ་གསང་བ་འདུས་པའི་རྒྱུད་ཀྱི་གླེགས་བམ་ཕྱག་ཏུ་བཏེགས་ནས། མ་འོངས་པར་འདིའི་བདག་པོ་ནུས་པ་སུ་ཡོད་ཅེས་ལན་གསུམ་གྱི་བར་བཀའ་བསྒྲགས་པ་ན། མཁས་པ་གཞན་སུས་ཀྱང་ལན་ཞུ་བར་མ་སྤོབས་པའི་ཚུལ་དུ་བཞུགས་སྐབས། ༸རྗེ་བཙུན་ཤེས་རབ་སེངྒེ་མཆོག་མཁས་མང་རྒྱ་མཚོའི་དབུས་ནས་བཞེངས་ཏེ། མ་འོངས་པར་དགེ་ལྡན་གསང་སྔགས་ཀྱི་བསྟན་པ་བདག་གིས་འཛིན་ནོ། །ཞེས་༸རྗེ་ཙོང་ཁ་པའི་དྲུང་དུ་དམ་བཅའ་ཕུལ་བ་ལ། ༸རྗེ་ཙོང་ཁ་པ་ཆེན་པོ་ཐུགས་ཤིན་ཏུ་དགྱེས་ནས། དཔལ་གསང་བ་འདུས་པའི་སྐུ་བརྙན་བྱིན་ཅན་དང༌། རྒྱུད་འགྲེལ་ཆེན་མོའི་ཕྱག་དཔེ་སོགས་དམ་རྫས་ཁྱད་པར་ཅན་མང་དུ་གནང་ནས་གསང་སྔགས་བསྟན་པའི་བདག་པོར་མངའ་གསོལ་བ་བཞིན། ཕྱི་ལོ་ ༡༤༣༣ ལོར་རྗེ་བཙུན་ཤེས་རབ་སེངྒ་མཆོག་ནས་རྒྱུད་སྨད་གྲྭ་ཚང་འདི་ཉིད་ཕྱག་བཏབ། དེ་ནས་ད་ལྟའི་བར་ལོ་ ༥༩༡ ཕྱིན་ཡོད། གསུང་རྟེན་བཀའ་འགྱུར་བསྟན་འགྱུར་ཚར་ཁ་ཤས། རྗེ་ཡབ་སྲས་དང། ༸རྒྱལ་དབང་པཎ་ཆེན་སོགས་མཁས་གྲུབ་དུ་མའི་གསུམ་འབུམ་སོགས་མང། གྲྭ་ཚང་རང་གི་ཡིག་ཆ་པོད་དུ་མ། སྐུ་རྟེན༸རྗེ་ཤེས་རབ་སེངྒེའི་འབྲལ་སྤང་སོགས་སྐུ་རྙིང་། འདུ་ཁང་དུ་རྟེན་གཙོ་ཐུབ་པའི་དབང་པོ། རྗེ་ཡབ་སྲས། ཡི་དམ་རྣམ་གསུམ་གྱི་སྐུ་དང་བློས་བསླང་དཀྱིལ་འཁོར། ལྷག་པར་དུ་༸རྗེ་ཤེས་རབ་སེངྒེའི་སྐུ་བརྙན་བཞིན་འཛུམ་མ་སོགས་ཧ་ཅང་མང་། ཞལ་ཐང་ནི། ཙོང་ཁ་བརྒྱད་ཅུ་དང། དཔག་བསམ་ཁྲི་ཤིང་སོགས་གྲངས་ལས་འདས། གདན་ས་ཁག་ནས་ཕེབས་པའི་དགེ་བཤེས་གཙོ་བོར་གྱུར་པའི་སློབ་མ་རྣམས་ལ་མཁན་རིན་པ་ཆེ་ནས་སྔར་སྲོལ་གསང་སྔགས་ཀྱི་འཆད་ཉན་མང་དུ་ཡོད་པའི་སྟེང་། དེང་རབས་ཀྱི་འགྲོས་དང་བསྟུན་ནས། དགེ་འདུན་ན་གཞོན་རྣམས་ལ་ཐུན་མོང་བའི་རིག་གནས་སྐད་ཡིག་སོགས་དང། མདོ་སྔགས་གཉིས་ཀའི་གཞུང་ཆེན་སློབ་གཉེར་ལོ་ངོ་བཅོ་ལྔ་འགྲིམ་དགོས་ཤིང་། ལོ་སོ་སོར་རྒྱུགས་སྤྲོད་དང། མཐར་སྔགས་རམས་ཐོན་པ་ཡིན། གྲྭ་ཚང་དུ་གཏན་བཞུགས་ ༤༠༠ སྐོར་དང། དགེ་བཤེས་སོགས་ཕྱི་ལ་བཞུགས་པ་ ༡༢༠༠། ཕྱི་ནང་གཉིས་ཀ་བསྡོམས་དགེ་འདུན་ཞལ་གྲངས་ ༡༧༠༠ སྐོར་ཡོད། དེའི་ནང་བོད་རིགས་དང། ཧི་མཱ་ལ་ཡའི་རི་རྒྱུད་ལ་དྭགས་དང་། མོན། ཁུ་ནུ། བལ་ཡུལ་སོགས་དང། སོག་པོ་དང་། འབྲུག་པ་བཅས་ཚུད་ཡོད་པ་བཅས།། །།

༄༅། །བླ་བྲང་བཀྲ་ཤིས་འཁྱིལ་ནི། མདོ་སྨད་ལྷོ་བྱང་གི་སའི་ཆར་གཏོགས་པའི་བསང་ཁོག་བཀྲ་ཤིས་འཁྱིལ་ཞེས་པར་ཕྱི་ལོ་ ༡༧༠༩ ལོར་ཀུན་མཁྱེན་འཇམ་དབྱངས་བཞད་པ་སྐུ་ཕྲེང་དང་པོ་ངག་དབང་བརྩོན་འགྲུས་ཀྱིས་འདུ་ཁང་གསར་བཞེངས་དང་འབྲེལ། ཐོས་བསམ་གླིང་དང་རྒྱུད་སྨད་གྲྭ་ཚང་གཉིས་གསར་བསྐྲུན་གྱིས་འཆད་ཉན་གྱི་བྱ་བ་རྣམས་ལེགས་པར་བཙུགས། དེ་རྗེས་ཁོང་གི་ཐུགས་སྲས་ངག་དབང་བཀྲ་ཤིས་ཀྱིས་ཡུན་རིང་བསྐྱངས་པ་དང་། རིམ་བཞིན་ཀུན་མཁྱེན་སྐུ་ཕྲེང་གཉིས་པས་སྔར་གྱི་འདུ་ཁང་དེ་ཀ་བ་བརྒྱ་དང་བཞི་བཅུར་རྒྱ་སྐྱེད་གནང་བ་དང་། དུས་འཁོར་དང་སྨན་པ་གྲྭ་ཚང་གཉིས་གསར་འཛུགས་གནང་། སྐུ་ཕྲེང་བཞི་པས་ཀྱེ་རྡོར་གྲྭ་ཚང་བཏབ་ཅིང་བཙན་ཁང་ཆེན་མོ་སོགས་བཞེངས། སྐུ་ཕྲེང་ལྔ་པས་རྒྱུད་སྟོད་གྲྭ་ཚང་གསར་དུ་བཏབ་པ་སོགས་ཀུན་མཁྱེན་སྐུ་ཕྲེང་རིམ་བྱོན་དང་། གུང་ཐང་བསྟན་པའི་སྒྲོན་མེ་སོགས་གསེར་ཁྲི་རྣམ་པ་བཞི་དང་། མཁན་པོ་རྣམ་པ་བརྒྱད་སོགས་སྐྱེས་ཆེན་དམ་པ་དུ་མས་ཆོས་སྲིད་གཉིས་ཀྱི་ཆ་ནས་ལེགས་པར་བསྐྱངས་པའི་ཆོས་སྡེ་ཞིག་ཡིན། བྱེས་ཀྱི་གདན་ས་བླ་བྲང་བཀྲ་ཤིས་འཁྱིལ་ནི། ༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དགོངས་ལྟར་སྐུ་ཞབས་གུང་ཐང་ཚུལ་ཁྲིམས་ལགས་ཀྱིས་ཐུགས་འགན་གཙོ་བོར་བཞེས་ཏེ། ཕྱི་ལོ་ ༡༩༦༥ལོར་མདོ་སྔགས་བསྟན་པའི་འབྱུང་གནས་བླ་བྲང་བཀྲ་ཤིས་འཁྱིལ་གྱི་དགོན་ཚབ་དུ་རྒྱ་གར་བྱང་ཕྱོགས་སྡེ་ར་ལྡུན་དུ་ཕྱག་བཏབ་ཅིང་། ཕྱི་ལོ་ ༡༩༦༧ ལོར་༸གོང་ས་མཆོག་སྐུ་དངོས་སུ་ཕེབས་ཏེ་རབ་གནས་དང་བཀའ་སློབ་ལམ་སྟོན་སྩལ། འདུ་ཁང་གི་རྟེན་གཙོ་བོ་༸སྟོན་པ་གཙོ་འཁོར་གསུམ་དང་། དེའི་གཡས་གཡོན་དུ་༸རྗེ་ཡབ་སྲས་གསུམ།༸རྒྱལ་བ་བྱམས་པ། སྤྱན་རས་གཟིགས། རྗེ་བཙུན་སྒྲོལ་མ།༸རྗེ་རིན་པོ་ཆེའི་སྟོང་སྐུ། ཀུན་མཁྱེན་ཡབ་སྲས་སོགས་མི་ཉུང་བ་ཞིག་དང། གཞན་ཡང་བྱང་ཆུབ་མཆོད་རྟེན་ཆེན་པོའི་གཡས་གཡོན་དུ་མཆོད་རྟེན་ཆེན་པོ་བརྒྱད་ཡོད། ད་ལྟ་དགེ་འདུན་ཞལ་གྲངས་ ༨༤ དང་། གཙོ་བོ་གཞུང་ཆེན་བཀའ་པོད་ལྔ་དང་། གཞི་རིམ་སློབ་གྲྭ་ལྟར་གྲྭ་ཚང་གི་སློབ་གྲྭ་ལ་སྐད་ཡིག་འཛིན་གྲྭ་བརྒྱད་པ་བར་དང་། དེ་རྗེས་བློ་གསལ་འཇུག་ངོགས། ཡང་གསལ་སྣང་མཛོད་སོགས་དང་། ཨིན་ཇི། ཧིནྡཱི། ཨང་རྩིས་བཅས་འཛིན་གྲྭ་བརྒྱད་པ་བར་དང་། དགེ་འདུན་པའི་སྒྲིག་འཛུགས་དང་། ཀུན་སྤྱོད་སོགས་ཀྱི་ཐོག་ལ་ཉེ་འཁོར་དུ་ཡོད་པའི་མི་མང་ནས་དགའ་དད་གུས་གསུམ་གྱིས་བསྟོད་པའི་མེ་ཏོག་གཏོར་བཞིན་ཡོད་ལ། དགེ་འདུན་པ་རྣམས་ཀྱིས་ཀྱང་ཐུགས་མཐུན་ཁྲིམས་གཙང་གི་སྒོ་ནས་སློབ་གཉེར་མུ་མཐུད་གནང་བཞིན་ཡོད།། །།

༄༅།།རྭ་སྟོད་གྲྭ་ཚང་ནི། སྔོན་གྱི་གདན་ས་ཆེན་པོ་དྲུག་གི་ནང་ཚན་གསང་ཕུར་ཕྱི་ལོ་༡༤༢༠ཙམ་ལ་རྗེའི་དངོས་སློབ་མཁྱེན་རབ་དབང་ཕྱུག་གྲགས་པ་བཟང་པོས་ཕྱག་བཏབ་པའི་མཚན་ལ། རྭ་བ་སྟོད་ཅེས་ཚད་མ་རྣམ་འགྲེལ་འཆད་ཉན་གཙོ་བོར་མཛད་པའི་གྲྭ་ཚང་ཆེན་པོ་ཞིག་བྱུང་། དེ་ནས་འཇམ་དབྱངས་བླ་མ་མཆོག་ལྷ་འོད་ཟེར་སོགས་ལས་རིམ་བཞིན་འཆད་ཉན་ཡར་ངོའི་ཟླ་ལྟར་རྒྱས་པར་བྱུང་། འཆད་ཉན་གྱི་སློབ་དཔོན་༡༩པ་ཡོངས་འཛིན་ཁྲི་ཆེན་དཀོན་མཆོག་ཆོས་འཕེལ་གྱི་སྐུ་དུས་ཕྱི་ལོ་༡༦༦༧ཙམ་ནས་གྲྭ་ཚང་འདི་བཞིན་སྙེ་ཐང་དུ་སྤོས་ཤིང་། ༸རྒྱལ་དབང་ལྔ་པ་ཆེན་པོས་གཟིགས་པ་ཆེར་མཛད་ལ་བརྟེན་ནས་གཞུང་དགོན་དུ་གྱུར། དེར་འདུ་ཁང་དང་ཆོས་རྭ་ཁམས་ཚན་༩ཡོད་ཡིག་ཆ་ནི། འཇམ་དབྱངས་བླ་མ་གཙོས་གྲྭ་ཆུང་བ་སོགས་ཀྱིས་མཛད་པ་ཁག་ཡིན། ལོ་འཁོར་ཆོས་ཐོག་བརྒྱད་ལས།འཇང་དགུན་ཆོས་ལ་གདན་ས་ཁག་ནས་དམིགས་བསལ་གྱིས་རྣམ་འགྲེལ་སློབ་གཉེར་བ་རྣམས་ཕེབས་སྲོལ་ཡོད། གསང་ཕུ་དབྱར་ཆོས་ཀྱང་བླ་ཁག་བཅུ་མཉམ་ཚོགས་ཀྱིས་གསེར་ཁྲིའི་དགེ་བཤེས་ཀྱི་དམ་འཇོག་ཀྱང་བྱེད། མཁན་པོ་བློ་བཟང་དཔལ་ལྡན་བར་འཆད་ཉན་པ་དང་མཁན་རབས་༤༣བར་བྱུང་། ཕྱི་ལོ་༡༩༥༩ལོར་དུས་ཉེས་བྱུང་རྗེས་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དྲིན་ཉག་ཅིག་ལ་བརྟེན་ནས་རིམ་བཞིན་རྒྱ་གར་ལྷོ་ཕྱོགས་སུ་གདན་ས་སོ་སོའི་གནས་གཞི་ཆགས་ཏེ། དགོན་གནས་འདི་ཉིད་ཀྱང་མཁས་མང་བློ་གསལ་གླིང་གིས་གཟིགས་པ་ཆེན་པོའི་འོག་ནས་སླར་གསོ་ཐུབ་པ་བྱུང་ཡོད། དེར་འདུ་ཁང་དུ་སྟོན་པའི་སྐུ་གསེར་ཟངས་ལས་གྲུབ་པ་ཐོག་བརྩེགས་གཅིག་ཙམ་ཞིག་དང་། ཏེ་ལོ་པའི་སྐུ་བྱིན་ཅན་གཅིགཇོ་ལེགས་འབྲོམ་གསུམ། རྗེ་ཡབ་སྲས་གསུམ། རྗེ་བཙུན་སྒྲོལ་མའི་སྐུ། འཇམ་དབྱངས་བླ་མ་མཆོག་ལྷ་འོད་ཟེར་གྱི་སྐུ་བཅས་ཡོད། མགོན་ཁང་དུ་འཇིགས་བྱེད་ལྷ་བཅུ་གསུམ་གྱི་སྐུ་དང་། བསེ་ཁྲབ་གཙོ་འཁོར་གྱི་སྐུ་བཅས། དགེ་འདུན་ཞལ་གྲངས་༡༤༥ ཙམ་ཡོད། ༸གོང་ས་མཆོག་གིས་བསྐོ་གཞག་གནང་བའི་མཁན་པོ་༸སྐྱབས་རྗེ་ཆུ་དབར་རིན་པོ་ཆེ་མཆོག་ནས་ད་བར་མཁན་རབས་༦བར་བྱུང་བ་བཅས་སོ།།།།